[موضوع متميز ]كل يوم اكلة دايت هديتي لكل اللي عاملة رجيم

healthy انتى جميلة والله كلامك سكر والف الف مليون شكر ليكى ام انس على رفع الموضوع بالشكل ده ويارب كل اللى ردت عليا تخس وتبقى احلى مانيكان هههههههههههه وعشان خاطر ردودكو الحلوة دى وطعامتكم السكر زيادة هاديكو وصفة احلى واطعم من الاولانية
حواوشى اسكندرانى وبرضو دايت
طبعا اول ما اجيب سيرة الحواوشى الناس هتفتكره والدهون بتنقط منه ويا طعامته مع الطحينة هههههههههههههههههه انا بقى عملته اكتر من مرة بطريقتى ( الدايت)
مقادير العجينة : 2 كوب دقيق اسمر ( عشان الريجيم ) + كوب شوفان مكسر ( ممكن استعمال كويكر)
ملعقة كبيرة خميرة فورية + نصف كوب زبادى او لبن رايب
رشة ملح + رشة سكر + ماء دافئ للعجن
نخلط المكونات مع بعضها ونسيبها تخمر فى مكان دافئ( ممكن اشعال الفرن لدقيقتين ثم اطفاؤه ونضعها فيه) علامة العجينة المظبوطة انها ماتلزقش فى صوابعك ولو اضفتى ماء زيادة ولزقت فى ايديكى نحط رشة دقيق مرة او اتنين لحد ما تبقى زى الكورة ولا تلتصق بالاصابع
وده شكل العجينة اول اما اتعجنت وبعد ماخمرت ( بعد ساعتين)
[ATTACH]134003[/ATTACH]
ممكن استبدال الزبادى والماء الدافئ بلبن حليب دافئ
ملحوظة: انا اضفت الشوفان لانه اقيم غذانيا + حبوب كاملة= الياف = هضم افضل وابطأ = جوع اقل
بس محدش يتذاكى ويزود الشوفان عن المقدار ده لانه بيقسى العجينة ( بينشفها )
مقادير الحشو :
تلت كيلو لحمة حمرا مفرومة ودى ماتاخديهاش جاهزة من الجزار لانهم بيضيفو لها دهون اما تخليه يجيب لك قطعة حمرا ويفرمها قصاد عينيك او تاخديها قطعة حمرا للبيت وتفرميها فى الكبة
بصلتين مفرومين ناعم + خضار مقطع مكعبات ( فلفل الوان - طماطم وممكن جزر مبشور) + بقدونس مفرى ( الافضل منه الكرفس المصرى بس للاسف مش موجود عندى)
توابل ودى بقى اما :
ملح + فلفل + بهارات اللحم (seven arabic spices)
او على طريقتى الخاصة : ملح + فلفل + قرفة + جنزبيل + كمون + كزبرة + جوزة الطيب + نعناع جاف + كبابة صينى
الطريقة:
نبشر البصل ناعم ونصفيه من العصير ( رايحة فين ؟؟؟ ماترميش العصير هاقولك هنعمل بيه ايه)
نضيف التوابل كلها للبصل ثم نخلطه مع اللحم
عندما تختمر العجينة نضيف باقى الخضار للحم وللاسف صورى مش كتير هنا
[ATTACH]134004[/ATTACH]
طريقة العمل:
ناخد العجينة نقطعها اجزاء متساوية ونفردها كويس بسمك 1\2 سم ونقطعها دوائر
نضع كمية مناسبة من الحشوة ثم نقلب نف الدائرة على الاخر ونلصقها من الاطراف ( ممكن تبليل الاطراف بالماء للالتصاق الجيد)
نحضر صينية تيفال او بايركس ونرص الوحدات
نبلل وجهها بالماء ( مش بالزيت) ونضيف رشة سمسم او حبة البركة
تدخل فرن 200 درجة لمدة 20 دقيقة على الاكثر
[ATTACH]134005[/ATTACH]
وده بعد ما طلعت من الفرن
[ATTACH]134006[/ATTACH]
مستوية من جوه
[ATTACH]134007[/ATTACH]
صحتين
اه نسيت بالنسبة لعصير البصل انا جبت اوراك فراخ فيليه قطعتها مكعبات ولحم بقرى برضو مكعبات وحطتهم فيها لبكرة وانتظرونى غدا مع شيش طاووق وشيش كباب بالخضار

هو فين باقى البنات؟؟؟؟؟؟؟؟؟؟؟ طيب فين صاحبة الموضوع اصلا؟؟؟؟؟؟؟؟؟؟؟
طيب انزل وصفات عادى ولا اعمل ايه طيب؟؟؟؟

عموما هانزلكو الوصفة دى مؤقتا لحد ماتردو عليا
شيش كباب وشيش طاووق بالخضار
المكونات:
قطع صغيرة لحم بقرى مشفى ( او بتلو) + قطع صغيرة اوراك دجاج منزوعة الدهن والعظم + ماء او عصير بصل ( فاكرين مية البصل بتاعت خلطة الحواوشى اللى قولت لكو ماترموهاش؟؟)
خضار مقطع مكعبات ( فلفل الوان - طماطم - بصل - جزر) اسياخ شواية خشبية
[ATTACH]134105[/ATTACH]
تنقع قطع اللحم والدجاج فى ماء البصل من بالليل فى الثلاجة
وتانى يوم:::::
هتلاقى لونها اتغير هتلاحظيها فى اللحمة اكتر من الفراخ طبعا زى كده
[ATTACH]134104[/ATTACH]
عندنا طريقتين
الطريقة السهلة : تصفى مكعبات اللحم والدجاج من ماء البصل وتضيفى ملح + فلفل + قرفة + جنزبيل
الطريقة الاخرى : تصفى مكعبات اللحم والدجاج وتضيفى الخلطة التاليه
ملعقتين زبادى + ملعقة فلفل احمر حلو مفروم ( ممكن معجون طماطم بداله) + بهارات شوى اللى هى ( ملح - شطة او فلفل احمر مطحون + نعناع جاف+ اوريجانو + كارى + كمون)
وشكلها اهو [ATTACH]134106[/ATTACH]
ودى ليه بقى وليه التعب ده؟؟؟
طبعا عشان تطرى اللحم فا مش نضطر نحط كاتشاب ومايونيز والحاجات دى اللى مضادة لهدفنا وهو الدايت
نجيب السيخ ونحط قطعتين خضار وقطعة لحم او دجاج وهكذا لحد ما يمتلى السيخ ( الافضل 4 قطع لحم وبينهم الخضار)
خدى بالك اصعب حاجة وانتى بتدخلى الجزر وكل ماكانت قطعة الجزر ارفع كل ماكان افضل
وده شكلهم على الشوايه
[ATTACH]134107[/ATTACH]
طبعا دى شواية كهرباء والافضل شواية فحم ولو مفيش شواية خالص ممكن ترصيهم فى صينية وعلى شواية الفرن
ممكن اضافة رشة زيت زيتون للى تحب
ملحوظة : اللحم ياخد وقت للسوا اكتر من الفراخ يعنى الفراخ ممكن ربع ساعة اللحم من 20:30 دقيقة
ودى النهاية لالالالالالالالالالالالالالا
[ATTACH]134109[/ATTACH]
انا احبها حاف او مع خبز اسمر للدايت وهى مشبعة جداااااااااااااا لكن اللى حابة تلخبط شوية ممكن مع ارز بسمتى(بريانى) او مكرونة بالجبنة
وياريت الناس اللى هجرت الموضوع تدخله عشان انا كده هاحبط وابطل اكتب حاجة