تعالوا هحكيلكم

[tala1234]

الله يعوضك حبيبتي
واحنا بالانتظار

[az-butterfly]

السلام عليكم

ازيك يا اختى " 7habiba"

بجد والله قصتك ادمعت عيناى خصوصا فى الجزء اللى بتذكرى فه الايات القراءنية.. كتير الايات دى بتيجى فى دماغى وعلى طول برددها مع نفسى خصوصا الايه الكريمة .. "ماودعك ربك وما قلى " ... " ولسوف يعطيك ربك فترضى "
...... " ولا تهنوا ولاتحزنوا ... " صدق الله العظيم


وانا بجد حاسة ان ان شاء الله ربنا حيكرمك خير الجزاء والكرم من عنده جزاء لك على خير نيتك ومعاملتك الحلوة والنيه السليمة وانك بتتقى ربنا فى تعاملك مع الناس

وباذن الله حاسة كدة انك حتيجى وتبشرينا المرة اللى جايه بالاخبار الحلوة اللى وعدتينا بيها..بان ربنا رزقك بزوج ونعم الرجال ان شاء الله

بس متنسيناش فى دعوة حلوة كدة الله يخليكى

مستنينك على نااااااااااااار.....

[sana5783]

ربي يعوضك خير على صبرك
انا في انتظار البقية

[الواحة 26]

السلام عليكم
انا قرات قصتك مرة وحدة ربنا يعوض صبرك خير
وانا حاسه ان القادم افضل بكثير
((انما يوفي الصابرون اجرهم بغير حساب))

في انتظار البقية

[7abiba]

السلام عليكم ورحمة الله وبركاته

أخواتى فى الله

شافعيه

قلب خالد

amal55

منى77*

أم مالك وعمر

الشيماء 2009

doremi

shahdel7ya

عيون123

أرجو رحمة ربى

اميرة الماس

- أميرة نفسى -

tala1234

az-butterfly

sana5783

الواحه 26

وكل الناس اللى تواصلت معايا على هذه الصفحات
أو بالرسائل الخاصه

بجد بحبكم فى الله ورأيكم ومساندتكم دايما تهمنى

أنتظرونى هكمل لكم
وأعذرونى إن كنت بتأخر عليكم بس وقتى ضيق

[هدوهدة كم]

الله يعوضك على صبرك باحسن منه
وانا في انتظار البقية

[ليلآس ~]

بانتظار البقيــــــــــــــــــه

[ابريكه]

بانتظار قراءه الجانب الايجابي
ربك كريم ما ينسا عبده
العبد هو اللي ينسا ربه

[doaa hamdy]

يلا يا قمر مستنينك متتاخريش علينا

[اميره الماس]

يالا يا حبيبتى انا مستياكى وكلى شوووووووووق وانتظر بلهفه كل جديدك ويلهج قلبى ولسانى ان يكون افضل مما كنت تحلمين به مشكووووووووووووه فانا اتعلم منك الكثير

[هداية~]

عزيزتي الله يعوضك خير

[*hunny*]

يا بنووووووووووووووووووووووووووتة
فيييييييينك؟؟؟

يلا مستنييييييييييينك

[7abiba]

السلام عليكم ورحمة الله وبركاته

إسمحولى أبدأ من كلام

الأخت az-butterfly وأفكركم بحاجه كنت قلتها عن صلاة الإستخاره قلتلكم إنى كنت بصلى إستخاره فى الموضوع اللى فات ده وقلتلكم بالحرف من قلة تأدبى مع ربنا كنت عماله أدعى وأنا بصلى وأقول يارب مش عايزه أفسخ تانى المفروض اسيب الامور لربنا مادام إستخرت بس النفس البشريه وإحساسى بأنى ماليش غير رينا مخلينى بقول كل اللى فى نفسى بس إكتشفت بعد مافسخت الخطوبه الآيه اللى ذكرتها الأخت أرجو رحمة ربى (وعسى ان تكرهوا شيئا وهو خير لكم ) وزى ماذكرت الأخت عيون 123 إنى إتعلمت كتييييير من اللى حصلى نضجت وكبرت فجأه وفهمت حاجات كتير كنت غافله عنها


المهم فيه مثل مصرى بيقول ربنا قبل مايقطع من هنا بيوصل من هنا اللى حصل إيه أنهيت آخر سنه دراسيه ليا مع فسخ الخطوبه بتاعتى طيب إيه علاقة ده بخطوبتى آخر سنه دى كان فيه مشاريع دراسيه إشتركت فيها وأنشطه بتشرف عليها الكليه والجامعه كنت بحضر مع بنات أصحابى وكنت طبعا الفتره دى وبالتحديد الترم التانى من السنه الأخيره كان قبل فسخ الخطوبه بشهور كنت مش مركزه فى أى حاجه بسبب المشاكل اللى أنا فيها وكنت أهملت فى نفسى مع إنى معروف عنى إهتمامى بنفسى وزنى نزل جدا خسيت تقريبا 15 كيلو فى فتره قصيره وأنا أصلا كان وزنى معقول فلما أخس ده كله أكيد أثر على شكلى جامد المشاريع والأنشطه اللى كنت مشتركه فيها دى لم تنتهى بنهاية آخر سنه دراسيه الموضوع تطور ونشاطنا زاد قبل فسخ الخطوبه بأسبوع وكان بعد إنتهاء إمتحانات آخر تيرم دراسى بأسبوع تم تكلفتى من أساتذتى بنشاط معين بالتعاون مع أحد زملائى من الشباب ماكنتش أعرفه قبلها رغم إننا مع بعض من سنه تقريبا من بداية المشروعات الدراسيه والأنشطه دى المهم أخدت بالى منه لأول مره بعد فسخ الخطوبه ب حوالى 10 أيام روحت مكان تجمعنا مع أستاذنا إنتبهت لشخص مرح مهذب وده اللى لفت نظرى له لأن ده الأحساس اللى كنت محتاجاه ساعتها وعرفت بعد كده إن ده الشخص اللى أنا تم تكليفى معاه بشغل واحد من قبل فسخ الخطوبه لكن لم أشعر بأى مشاعر تجاهه ولمده طويله لأنى كنت لسه مكتئبه من اللى حصلى وفضلت مده كبيره عايشه حالة الإكتئاب ورافضه فكرة الجواز ومقرره إنى عايزه آخد ريست جامد من المعارك اللى كنت فيها فى الفتره دى لاحظت إن زميلى ده إهتمامه بيزيد مع الوقت بيا اللى أكدلى الموضوع ده موقف هحكيلكم عليه بس الأول أعرفكم على حاجه


كنا مجموعه رائعه من البنات والشباب جميعنا الحمد لله ملتزم علاقتنا بأستذتنا زادت وأصبحت علاقه إنسانيه جميله وأصبح أساتذتنا وأهلنا على إتصال ببعضهم البعض والعلاقه بين الجميع توطدت ببشكل لايغضب ربنا ولا أهلنا و أهلنا بقوا عارفين بعض وكنا عارفين مناسبات بعض الحزينه والسعيده فى يوم كنت هعمل عمليه بسيطه جدا فوجئت بيهم حوليا فى المستشفى عددهم كبير وجايبينلى بوكيه ورد جميل وفضلوا معايا لحد مادخلت أوضة العمليات رغم إن العمليه بسيطه بعد ماخرجت وروحت أمى وإخواتى حكولى إن كل الناس راحوا إرتاحوا فى الكافيتريا إلا زميلى اللى بقولكم عليه فضل مع والدى ووالدتى وإخواتى قلقان قلق شديد لحد ماخرجت من العمليه المهم تلميحات كتيره لمده طويله إستمرت أكتر من سنه وأنا ملتزمه معاه جدا فى المعامله وهو كمان كان فى منتهى الإحترام معايا


حاولت أصده كتير خفت تكون مشاعره ليا غير حقيقيه وخفت إنى أروح لطريق بعيد عن شغلنا وفيه معصيه بس لا أنا ولا هو ده طبعنا وخفت كمان عليه من مشاعره ليا خفت عليه يحبنى ويطصدم وأنا مجربه جرح المشاعر هتقوله الصدمه تيجى منين تيجى إنه من سنى ولسه ماكونش نفسه ومستقبله غير واضح ممكن أهلى أو أهله يعترضوا وفى نفس الوقت كنت لسه عندى نفور من موضوع الإرتباط ورغم كده كنت بدأت أنجذب له هو إنسان على خلق ودين وطموح ومرح ولسه بيبدأ حياته وده اللى كنت عايزاه هتستغربوا لآخر جزأيه دى أه أنا كنت عايزه أرتبط بشخص لسه بيبدأ حياته عايزه نتعب سوا فى كل حاجه ونقف جنب بعض عشان نحس بطعم كل حاجه فى حياتنا مش عايزه واحد جاى جاهز يشترينى بفلوسه زى ماخطيبى السابق كان دايما محسسنى عايزه واحد أحس إنه بيحبنى لذاتى مش عايز يتجوز مواصفات شكليه محدده تستخدم فى أوضة النوم زى ماخطيبى السابق كان دايما يحسسنى بيها ويأكدلى عليها ومحدش يفهمنى غلط طبعا مش عيب إن يتقدم لأى بنت حد جاهز بس اللى حصلى خلانى أنفر من إنى أرتبط بحد فيه أى تشابه فى الظروف بأى حاجه سابقه مرت فى حياتى

المهم بعد اكتر من سنه من التلميحات من ناحيته والصد والتجاهل من ناحيتى زميلى ده عرف إن فيه شخص متقدملى والموضوع كان خلاص هيتم بس والدى سأل عليه كويس وعرفنا حاجات عن طبعه لا تتناسب مع طبعى والموضوع إتفركش الحمد لله لأسباب بعيده عن زميلى لما عرف كده إتجرأ وفاتحنى وقالى إنه عايز يعرف إن كنت موافقه عليه بس أو لأ ومش هيتم بينا أى حاجه حتى الكلام هنقطع الكلام سوا لحد ما أهله وأهلى يوافقوا طيب هو لسه ما إشتغلش وأكيد أهلى هيرفضوا أعمل إيه صليت إستخاره كتير وسألتوا عن كل شىء عن أهله وحاجات دقيقه مكنتش أعرفها ومن أول لحظه فاتحنى عرفت والدتى ووالدتى عارفه الولد كويس ولاقتنى مياله له نصحتنى أفهمه إنى غير معترضه عليه بس لازم ياخد خطوه وفعلا ده اللى كنت بفكر فيه وبلغته وكان هو الفتره دى لسه بيدور على شغل فرح جدااااااااااا لمجرد إنى وافقت عليه بس فهمته إن موافقتى بدون موافقة والدى ولا شىء تفهم الموقف جدا بس كان فى منتهى السعاده وأنا كمان كنت مبسوطه بس كنت مرعوبه من الموقف اللى أنا فيه والخوف كان مضيع فرحتى وفعلا كان فيه ناس بتتقدملى وإغراءات كتيره واوقات كتير كان فيه ناس غير مناسبه ليا والمواضيع تتفركش أو إنى أتلكك وأرفضهم


لحد فى يوم تعبت من الضغط فى البيت وطلبت منه يقابل والدى فاتح أهله ووالده وافق بالعافيه لأنه لسه صغير وماكونش نفسه ولسه ما إشتغلش راح قابل والدى والدى رفضه باسلوب مهذب إتناقشت مع والدى كتير وحاولت افهمه إنه اخلاقه كويسه أو طبعه أو صفاته تناسبنى بس للأسف والدى كان بيعارض أكتر وبيفكر فى نقطة الشغل وفهمته إن ده رزق وربنا أكيد هيبعته كنت عايزه أنا وزميلى من والدى إنه يوافق بس على المبدأ ومش هيتم أى حاجه ولا نعلن حتى إرتباط إلا لما يشتغل لكن والدى إتمسك برأيه ووالد زميلى كمان بعد ماوافق غير موقفه فجأه وزميلى أخد قرار إننا نفترق خوفا عليا ومرت شهور عليا وعليه حالتنا النفسيه سيئه جداااااااااا طبعا أخبارنا إتقطعت عن بعض بس كنا بنعرف بالصدفه أخبار بعض لحد ماجه والدى فى يوم يقولى ...

فاصل ونواصل

[** الشيماء **]

يلا بالله عليكي كملي

أنا بستنه ربنا معاكي

[نور العيون123]

بالله عليك لا تعلقينا اليوم ينزل كله مفهوم ؟ولااااااااااااااااااااااااااااااااااااااااااااااا اااااااا