تعالوا هحكيلكم

[7abiba]

بنوته كتكوته

الشفاعه

annoos_2010

مغربيه بكل فخر

أرجو رحمة ربى

*hunny*

- أميرة نفسى -

بيرو 73

قلب خالد

emans

دلوعة ليبيا

ابريكه

أشكر متابعتكم وردودكم

وآسفه جدا على التأخير عليكم لأن وقتى ضيق شويه

وكل اللى قصدته بالعتاب على قلة الردود كنت بكتب وألاقى مفيش ولا رد لمدة 24 ساعه والقراءه كتيره جدااااا كنت عايزه أحس بتواصلكم معايا لأعرف هل أكمل ام لا

إنتظرونى

[sorry fals]

متابعينك ياقمر
يارب تكون اخر الام

[سواد العيون]

متابعينك بكل شوق لمعرفه باقي التفاصيل

[ابريكه]

متابعينك والله

[قلب خالد]

في انتظااااااااااااااااااااارك

[7abiba]

وفى الآخر جه زارنا وقعد مع والدى وقعد يحاسبه شوفتوا البجاحه إن امى طمعانه فيه (إفتكروا موضوع الطقم الخفيف وإن أمه هى اللى قالت نجيب حاجه معاه تقريبا أصلهم يهود نظام قلب الحقايق ) وقعد يتكلم مع بابا من البدايه فى الإتفاقات اللى إتفاقوها ومين عليه إيه مراجعة ليلة الإمتحان وللأسف والدى متواضع وإبن اصول وعاقل بزياده ومش عايز يبوظ الموضوع ولام عليه على إسلوب أمه وأتفقوا إننا نشترى الشبكه إحنا التلاته والدى وأنا والمخلوق ده اللى إسمه العريس حسبى الله ونعم الوكيل

بعد ما إشتريناها طلب إنه ييجى يزورنا هو وأهله فى يوم وافقنا وجايين يحددوا يوم الشبكه وأمه عايزه تراجع مع والدى لتالت مره الإتفاقات بتاعة تجهيز الشقه ومصره تشيلنا أى حاجه زياده من اللى على إبنها مع إن يوم الإتفاق والدى سأل إبنها عايز تجيب إيه بالظبط وإبنها اللى إختار وأقنعنا إننا نعمل حفله صغيره فى البيت عندنا وإننا نعمل بعد كده فرح كبير فى الزفاف

إشتريت فستانى مادفعش فيه مليم روحت للكوافير جه أخويا وإبن عمى والعريس أخدونى روحنا البيت كان يوم حلو جدا بيتنا كبير الرجاله قاعدين فى مكان والستات فى مكان آخر منفصل عنه بعد لبس الشبكه العريس راح قعد مع أقاربه والرجاله شويه أصحابى البنات كتير هيصوا ليا وشدونى أرقص معاهم رجع لقانى برقص معاهم شدنى ورفض أرقص إتصورنا مع الضيوف جه وقت العشاء أمى جهزت عشاء فاخر أصناف كتيره أخت العريس إستئذنت مع أقارب لهم بدرى ومشيت وأمه رفضت تاكل وقعدت مكشره جدا أهلى يرحبوا بيها ودى ترد بالعافيه

اليوم خلص بعدها إسبوع مايردش على الموبيل ولا يتصل وجه بعدها يزورنا وجلسة المحكمه بدأت وقالى: كنت فاكر عندك حياء إيه اللى عملتيه إنتى وأصحابك ده كان اسوء يوم فى حياتى ده يوم إسود مش عايز افتكره) طبعا فهمتوا كانت أمه مكشره ليه ومش عايزه تاكل وقالى إنه كان قرر يفسخ الخطوبه بعد اللى حصل موت فرحتى طيب أنا فين ماردتش ليه لأنه عمره ما إدانى حق إنى أعتب عليه دايما أنا اللى غلطانه وفيه مواقف تانيه كتيره هقولكم عليها

بعدها بدأ معايا إسلوب جديد عرفينى بس وقت خروجك قلتله حاضر بس طبعا الإستئذان ده حق أهلى لأنى لسه فى بيتهم ومخطوبه بعد كده الموضوع إتطور وبقى لازم أستئذن منه لو رفض ما أخرجش حتى لو كنت خارجه مع أهلى وإن أتأخرت وأنا مع أهلى يتصل يزعقلى وأنا شخصيتى ممسوحه معاه

كان جاى يزورنا فى يوم والدى قاله بالنص إن شاء الله تفطروا معانا بكره كنا فى رمضان وإن شاء الله نتصل ببيت أختك نعزمهم تانى يوم إتأخروا على ميعاد الفطار وصل لوحده بعد المغرب بنص ساعه وهو مكشر جدا وقال إنه مكنش يقدر يسيب أمه تفطر لوحدها وقال لوالدى إنت عزمتنى انا وأختى فقط وتعمدت ماتعزمش والدتى شوفوا سوء الظن

بعد رمضان قررنا نعزمهم ولأن ظروف عمل أمى وأبى صعبه شويه فى يوم كان والدى ووالدتى آخدين أجازه فأمى أتصلت بوالدته توجه لها العزومه بأعتبرها الكبيره تفاديا لما حدث قبل كده الكلام ده كان الصبح قبل آذان الظهر بوقت كافى والغدا عندنا بعد آذان العصر أمه رفضت بشده وجت زارتنا تانى يوم وزعلانه من امى إزاى تعزمينى وماتعزميش إبنى وبنتى أمى فهمتها إنها متصله تعزم الكل ودى مصره إنها هى لوحدها الى كانت معزومه ومش لاقيه حاجه تانيه تتقمص منها تقول لأمى إيه مش من الأصول خالص إنك تعزمينا يومها مالناش دعوه بظروفك شوفتوا قلة الذوق جايه تعلمنا الأصول لأننا غلطنا وعزمناهم على الغدا وطبعا هو زعلان على زعل أمه

بعد الخطوبه بمده فوجئت بيحكيلى على خطوباته اللى قبل كده عرفت إنه مش كان خاطب مره واحده زى ماسألنا وعرفنا ووالدى إتكلم معاه وسأله كان خاطب مرتين غيرهم وحكالى إنه كان متوفق جدا فيهم بس ماكنوش عاجبين والدته فكانت بتختلق مشاكل معاهم لدرجة إنها كانوا لما يتصلو تشتمهم فى التليفون

مفيش كلمه حلوه ولا كلمه رومانسيه وإن لمحت له يقولهالى بصراحه أنا مش عيل من سنك والكلام ده مايناسبش سنى مع إن أول ما إتخاطبنا فهمته إنى قلقانه من فرق السن عملى البحر طحينه وفهمنى إنه يقدر يجارينى فى سنى

إتصل فى يوم بيا لقانى ببكى مالك بالعافيه على ماقلتله كانت أمى مريضه جدا صبرنى وإتكلم معايا وخلصنا المكالمه بعدها جه يلومنى على اليوم ده وقالى إنتى نكد

كان محرمنى أتكلم مع امى أو أهلى فى اى حاجه تخصنا وكنت بفوجأ إنه حاكى لأهله على كل كبير وصغير بينا

بعد الخطوبه حكالى إنه خطبنى لأنى فيا مواصفات شكليه معينه كان بيدور عليها ومن أول يوم خطوبه لآخر يوم خطوبه دايما يقعد يفحصنى بنظرات غير محترمه رغم إنى والله العظيم ملتزمه فى لبسى وحجابى أمامه جدا

كل ما أتصل أطمن على أمه تفضل تنبه عليا إبنى محدش يقدر ياخدوا منى ومن أخته وولاد أخته وكان يشتكيلى دايما من طلبات أمه الكتيره لولاد أخته رغم إن زوجها مقتدر ماديا وإن أشترى أى شىء لنفسه أو لأمه مايلقيهوش ويلاقيه فى بيت أخته

إن حصل أى مناسبه عائليه يرفض بشده يحضر معايا ويتحجج بأى حجه أو يتخانق معايا على أى شىء تافه قبلها من النكد أقرر ما أروحش مع اهلى المناسبه دى أو أروح من غير نفس وبيبقى واضح على شكلى وعلى لبسى

طلب منى أكتر من مره أروح أزور أمه فى البيت لوحدى فى الوقت اللى هو فيه فى الشغل وأشوف طلباتها وقالى إن ده طلبها وهو كمان عايز كده رفضت طبعا لأن مايصحش أزورهم من غير أهلى طول فترة الخطوبه ولم اتجرا وأعرض الموضوع على أهلى وزى ماكنت قلتلكم هو وأهله ناس بسيطه يعنى مش منفتحين لدرجة الطلب ده

جه وقت توضيب الشقه اللى هنسكن فيها كل ما أختار حاجه أمه وأختخ كل مايكلمونى ينتقدوا ذوقى ويختاروا هما ويضغطوا عليه بإختياراتهم كان متفق مع مهندس ديكور الرأى الأول والأخير لها ولأمه ولأخته وكان بياخد برأيى لو مقتنع بيه فقط وكان نفس رأى مهندس الديكور ماحسسنيش إن ده بيتى وإن من حقى أختار رأيى كان آخر حاجه ومش رأى أساسى

جه يوم عائلتى نظمته عائلتى للشباب والبنات من العائلة المخطوبين والمتزوجين حديثا وجه معانا الرحله أخويا واولاد اعمامى وعم من أعمامى اليوم ده كان بيتكلم معايا ووجه ليا كلام لايصح إلا بين المتزوجين طبعا فاهمنى صديته بدون غلط ورديت عليه رد مناسب قام زعل وإتقمص وتركنى مع الناس والكل يسأل راح فين أقولهم مشوار ومجاش لنا غير فى آخر اليوم قبل مانروح وطبعا خاصمنى فيها إسبوعين لا تليفون ولا زيارات كلمت أخته عملت نفسها ماتعرفش حاجه ووقفت فى صف أخوها رغم إنى حكيت لها بالتفصيل أهلى يسألونى إتكسفت أحكيلهم وفهمتهم إنى زعلته منى وهو كمان ببجاحه جه إشتكانى لوالدى وطبعا من غير مايقوله هو قالى إيه أساسا خلانى صديته وطلعت أنا الغلطانه وكلامه معايا مده بعدها بقرف وقالى إنه كان قرر يفسخ الخطوبه

فاضل جزئين بداية النهايه

وبعد كده نتكلم عن الأيام الحلوه

وَلَسَوْفَ يُعْطِيكَ رَبُّكَ فَتَرْضَى {5} سورة الضحى

المواقف كتيره بس كانت أيام أتعلمت منها كتيييير وإلى الآن مش مستوعبه اللى كان بيحصل وصبرى أنا وأهلى

إنتظرونى

[قلب خالد]

لاحول ولاقوة الابالله

كل شوية يهدد بفسخ الخطوبة

الله يهديه ويعينك

ويصبرك

الله اذا احب شخص ابتلاه

وكله خير

اكيد ربنا مختار لك شي احسن

[amal55]

الله يكون فى عونك ويصبرك ويهديه
ويدرك اخطائهو ويعاملك بلطف
وكملى نحن ىفى انتظارك

[yehia2007]

بجد يا صبرك والله لو مكانك مستحملش ابدا كل تهديداته وتصرفاته
لانه بصراحه مفيش وحده مجبوره تتعامل كده وتسكت لاء وكمان فى فترة خطوبه اللى هى فترة اختبار ودراسه للطرفين
كملى احنا معاكى متابعين
وربنا يسعدك ايامك الجايه

[بنت الهاجري]

ياه الله يعينك هلا هو زوجك ولا فسختي

[** الشيماء **]

ربنا يكون في عونك

كملي أنا بستنه البقية

[أرجو رحمة ربي]

الحمد لله ربنا عوض صبرك خير
لا حول ولا قوة الا بالله
ربنا يديم النعمة عليكي


كملي القصة اختي
احنا بالانتظار

[ليلآس ~]

انا متتااااابعه القصه من الأول

بس بصمت ..

ننتظرك ..

[ananas]

اهم حاجة انك تكونى كسرتى وراه قله فى الاخر
ان شاء الله ربنا يعوض صبرك خير

[sana5783]

في انتظارك يا اختي