الي بدها تضعف من كيلو الى خمسه كيلو فــــقـــــــط....تدخل

[وعود الخير]

مش لوحدك حلومتي اللي خبصت
طول البارحة وانا ماسكة نفسي وفي الليل عملت مقالي وخبز مقلي وصلصة حارة ونسيت مين انا
المهم ابشرك
قررت ان شاء الله تعالى من يوم السبت امشي معاك على نظام النقاط
خلاص اتفقنا
اليوم راح اوزن وأخذ القياسات .. وربنا يسهل لاني بجد محتاجة انزل قبل الصيام قصدي صيام شعبان ..
قولي يارب.

واهلا وسهلا لكل اخت انضمن في الحملة جديدا,..
وربنا معكم في حربكم ضد السمنه..

[هالة البدر]

بسم الله الرحمن الرحيم ،،

مرحبا" حبيباتي كيفكم يا وعود وحلومة، وأنا إنشاء الله أنضم إلكم في الريجيم بيني وبينكم صارلي كم يوم شو بخبص بالأكل مو طبيعي، امبارح على العشاء همبيرجر وبطاطا وبيبسي وووو تخيلوا الوضع واليوم عاملة على الغذا معكرونة بالبشاميل مع بطاطا وسلطة وبيبسي ووو يعني دمار في دمار، وأنا حكون معك يا وعود إنشاء الله من يوم السبت أبدأ الرجيم، وصراحة خايفة أوزن ، لكن اليوم راح أغصب على حالي وأشوف قديش صار وزني لأمشي على الرجيم.

[وعود الخير]

على بركة الله يا هالة ...
بس نصيحة حاولي من اليوم تخفيف الاكل علشان ما تصدعي بسبب تخفيف الكمية مرة واحدة..

[هالة البدر]

بسم الله الرحمن الرحيم ،،

حاضر يا وعود، أمرك يا باشا حخفف من بكرة إنشاء الله.

[وعود الخير]

ليش مش من اليوم يا هالة
انا قصدي اوفر عليك شوية..

ماشي يا قمر .
من السبت ان شاء المولى عز وجل

وراح نستولي على يوميات حلومة.. ونشاركها في يومياتها

[الحلم الجميل]

مذكرات حلومه بالطريق

[وعود الخير]

GOOD LUCK

[الحلم الجميل]

سوري بناااات بس الطريق كان كثير عجقه و يدوب وصلت المذكرات

امبارح كان اليوم ماشي نوعا ما منيح و باليل رحنا عند صاحبه ماما و شربت شاي مع ملعقتين سكر, و شي اربع قطع صغار بقلاوة, و شويه مكسرات
منرفزة لانه مرق4 ايام من الاسبوع الثاني و انا لهلق مش ضعفانه شي..الاسبوع الماشي كنت ضعفانه كيلو بخلال الاربع الايام الاولى

المهم الحمد الله مافي زياده بس القهره انه باقي على المسلسل شي 8 حلقات و بيخلص..لكان متى لح اعمل الرياضه؟

****

كثيرررررر مبسوطه بانضمامكم يا وعود و هاله بس عندي لكم كم خضطه
الخطه الاولى لازم تحطوا و رقه و لما تاكلوا اي شي عالطول تكتبه و تكتبه نقطته
انا كنت قبل احطها بغرفتي للورقه بس كنت انسى, فهلق لصقتها على البراد...

خطه ثانيه...ما تاكلي على السفره ابدااااا
يعني حضري الاكل و حطي الاكل بصحنك بكميه تكفيك (احسبي النقاط قبل البدء بالاكل و سجليها) و بعدين روحي على غرفه ثانيه و احضري تلفزيون او اقعدي على الانترنت..و هيك لما تخلصي اكلك لح تكسولي تقومي مره ثانيه و تحطي اكل ..انا دائما اعمل هيك و فعلا لاحظت الفرق...لما اقعد على السفره من جد اكل و ما بحس شو اكلت و مشان هيك خبصت الكم يوم الي قبل

الخطه الثالثه..خلي الشاي الاخضر جاهز بعد كل وجبه..يعني انت و قاعده تحضري الاكل كوني عم تحضري الشاي الاخضر علشان اول ما تخلصي اكل عالطول تشربيه و بهيك بيقضي على اي اثر للجوع. علشان لو ما كان جاهز لح تكسولي تروحي تعمليه بعد ما تخلصي اكل

شو؟ كيفني معكم؟ كشفتلكم اسرار كثيره

صدقيني يا وعود..مش محتاجه تخففي الاكل و تتعودي..لح تلاقيه و لا احلى من هيك..صدقيني
تعرفي يا هاله..الاكل الي ذكرتيه كان هذا اكلي الطبيعي خلال السنوات الماضيه..
ياربي شو كنت مجنونة اكل..بس اكل و ما انتبه

[الحلم الجميل]

حابه اقلكم شوية اكلات

اذا كنتي جوعانه (خصوصا على العشاء) و مابقي نقاط كثيره فكلي ذكره مثلجه
اسلقيها و كليها
لان كوب الذره بنقطه واحده يعني ولا شي
حطي عليها ملح و بتطلع كثيررر طيبه

او على الغذاء اذا بدك شي خفيف كلي تونة بالماء مع جزر و سلاري و ذكرة و ملعقتين كبار مايونيز خفيف الدسم و ملعقه صغيره ماسترد
و يا حبذا لو تاكلهيا بدون خبز يكون بكثيررر احسن
هذه اظن 6 نقاط
ناسيه لانه مش متذكره التونة كم نقطه

و شاي اخضر كمان بيصد النفس تمام عن الاكل او القهوه
على فكره ماتاكلوا سكر مع القهوه و الشاي
صدقوني لح تضيعوا نقاط على الفاضي

[الحلم الجميل]

اليوم قمت تقريبا عالساعه 12 و اكلت منقوشه جبنه و نص علشاعه 2 و عالطول شاي اخضر
مابعرف المنقوشه كم نقطه بس حسبتهم 10 نقاط
عالساعه 6 استحليت كوكيز و اكلت اثنين (4 نقاط )
بس كان كثير جعبالي
يعني باقي 6 نقاط
بس الساعه هلق 9 يعني خلاص لح شطب عليهم

[وعود الخير]

ما شي حلومة .. راح انزل اشتري شاي اخضر
بس انا عادة بعد الغدا باشرب كوب مية مع عصير نص ليمونة

وان شاء الله تعالى راح اتبع خطتك السرية ..
ويا انا يا السمنة
بدي انزل كم كيلو علشان اعوضهم بعد العيد.. ههههه

[هالة البدر]

بسم الله الرحمن الرحيم ،،

خلاص حلومة إنشاء الله ببدا مع وعود من يوم السبت لأن اليوم معزومين عند أهلي على الغذا وطبعا" اكل الماما لا يقاوم، وححضر كمان الشاي الأخضر لكن عندي طلب صغيـــــــــــــر، أي شيء بتقوليلنا عند إنك أكلتيه بس ضلك حطيلنا السعرات وبالنسبة للذرة عجبتني الفكرة كثير، وأي تعليمات على التنفيذ فورا" يا فندم في سبيل الرشاقة (قال يعني حصير غزال) .

وعــــــــــــــــــود معاك على الخط وإنشاء الله ننتصر (تقولي داخلين حرب) .

[وعود الخير]

طبعا هالة داخلين حرب
يعني الاكلات اللي ما شاء الله بنحضرها وبنعملها لاهل البيت ومحرومين من تذوقها منش حرب
ولما تنزلي السوق وعينك على محلات الحلويات .. مش حرب
والاخوات في اركان المطبخ ما بيقصروا الاطباق اشكال والوان .. ولما تجربي ما فيك تذوقي مش حرب
صارت حرب داحس والغبراء..

ربنا معنا ...
وسلام مربع يا افندم.

[الحلم الجميل]

وعود الخير
هو الشاي الاخضر مش ضروري بعد الغذاء عالطول بس انا هيك بشربه علشان لو في شويه احساس بالجوع يروح عالطول
و بعدين لازم تضعفي قبل العيد علشان تطلعي حلوه بالملابس الجديده
و لازم ما تخربيها بالعيد علشان تبقي حلوه للعيد الثاني

بعدين ليش بتقولي ان الاكل الي بتحضريه لاهل البيت ما بتقدري تذوقيه؟
انا باكله مش بس بذوقه
لكان ليش برايك مكيفه هالمره و مش فارقه معها اذا عم اعمل رجيم او لا؟
علشان مش عم تعملي اكل خصوصي الي
لاني باكل من طبيخ البيت عادي
بس الكميه هي الي تختلف
و لو كنت شاطره بتمشي كل عائلتك على هالرجيم
يعني دائما استعملي الجبنه, المايونيز, الحليب كمان قليل الدسم
انت اتحكمي بمقادير الطبخه

********

هلا هاله
الظاهر كلنا لازم نعمل حرب على اكل الماما
بس اقولك ولادنا بعد 30 سنه لح يعملوا حرب ضد اكلنا؟ او ياحسره علينا؟
و خلاص ان شاء الله بكتب النقطه لكل اكله باكلها
و بعدين ليش ما تصيري غزال؟ عقبال ما تركض وراك و نفتش عليك بالمايكروسكوب على قوله وعود

[الحلم الجميل]

لو عندي ميزان بالارقام كان قالي ان وزني هلق 53 و شوي
بس الحمد الله مازدت كثير رغم اني خبصت كثير
امبارح لما قلتلكم لح سكر تمي عالساعه 9
رحت اكلت تقريبا نص اوزي (عجينه بفباستري و ارز) + 2 كوكيز
بس كثيرررررر جعبالي الحلو


اليوم خلص عندنا سكر الرجيم فشربت القهوه مع ملعقتين سكر عادي (1 لكل ملعقه سكر)
و كان في جبنه سلايز كرافت (الشريحه بنقطتين ) + شريحه توست اسمر (نقطه)
يعني على الفطور لوحده 5 نقاط

انا كتبت اكل هذا الاسبوع على نفس ورقه الاسبوع الاول
و يااااويلي لما قارنت اكل الاسبوعين
مخبصه تخبيصه محترمه هالاسبوع
ما احلاني الاسبوع الماضي كيف كنت
لا و قال شو بدي اصير 50 كيلو قبل ما تبدا الجامعه