فعلا يا ام نور انا ملتزمة الصمت عن اى نقطة خارج تنظيم الوقت بس حبيت اقدم معلومه عن الاطفال من خبرتى

وفيه حاجه كمان لتوفير الوقت انا باعمل معجنات بكميه كبيرة وباحطها فى اكياس واحفظها فى الفريزر واطلها اما على التسخين او اسيبها تفك براحتها ولا تسخين ولا حاجة

برافو تيتى انا بحب الالتزام

مساء النور يا شخبوطه........

شكرا ياقممممممممر

اختى لولو شكرا على ردك يعنى انا عايزة اوفر كل شهر واجيب حاجة فى المطبخ يعنى انا لما بحتاج اعمل الفلافل بعمله على الماكينة اليدوى ودى بتخد وقت وجهد وطبعا عندى اولاد وبيخدوى وقت كتير يعنى الافضل انى انزل اشترى حاجات كل اسبوع احسن

انا ملتزمة بالموضوع ياام نور

ساعات زوجى بيجيب كمية من العيش الفينو عشان المدرسة هو ممكن انى احطه فى الفريزر بس بتكون طازة زى ما يكون جاى انا بعمل مع العيش البلدى بس الفينو بينفع

اختى ام نور انا واثقة فيكى وفى شاطرتك

اهلا اختى هندام......
ايوه العيش الفينو كمان بيتحط فى الفريز وتنزليه من بالليل فى التلاجه تحت عشان يفك وتعملى بيه احلى سندوتشات

تي تي حلو اوي حكايه ان نحطه في الفريزر جاهز عالتسويه اهي دي اختصار تاني للوقت
ان نور وحشاني يا قمر

اهلا نايس اخبارك ايه.......

ازيكوا ياحلوين
انا لسه مش بطبخ ياام نور بس انا مجهزة الاكل من بالليل ويدوب عالتسوية
وده بخليه على قبل ميعاد الغدا واحسب هيحتاج وقت اد ايه عالنار
علشان يكون سخن وميبردش واضطر اسخنه تانى
وبالنسبة لى من ناحية توفير الوقت وبماانى مش بفرز اى خضراوات او لحوم واسماك
انما انا ليا طقوس تانية بعملها برضه بتوفر لى فى الوقت
زى ان انا بقشر كمية من التوم واحفظها فى التلاجة بتبقى سهل ساعة الطبخ بلاقيها جاهزة
لو حاجة محتاجة تتبيل زى النهاردة(فراخ مشوبة )بتيجى من قبلها بيوم انضفها واتبلها
ولو خضار زى الملوخية برضه اقطفها واغسلها واصفيها وتانى يوم تكون جاهزة على الخرط
ولو محشى نفس النظام بيكون فى سهرة قبلها بيوم واعمل حلتين واحطهم فى التلاجة نيين
اسوى واحدة والتانية لتانى يوم او بعدها بكام يوم لما نشتاق له
ونصيحة ياستات محدش يشيل المحشى فى الفريزر نى لان الرز بيبوش وبيتكسر ويتعجن فى الطبخ ولو ضرورى تفرزنيه يبقى بعد التسوية
وبتطلعيه قبلها يفك وعالبخار فى مصفاة تسخنيه بيبقى زى الطازج تمام
بعمل ايه كمان
بغسل كمية من الرز وانقعها واصفيها واطحنها واتركها تجف كويس وبعدين املا بيه كيس واشيله فى التلاجة وده بينفع لوعاوزة كفتة بيتى او مهلبية بيسهل العملية غير انك تطحنى فى وقتها وقبل ماالكمية تخلص اعمل غيرها
من الاكلات ال ممكن اجهزها واشيلها فى الفريزر
الكفتة البيتى واصبعها واعمل اكلة واشيل اكلة لانها بتاخد وقت فاوفر عمل يوم
كمان البهارات بجيب كمية من كل نوع انقيها واشيلها فى التلاجة
واطحن منها بكميات بسيطة لان النكهة بتروح منها لو طولت وهى مطحونة زى الفلفل الاسود مثلا
والسمسم انقيه واحفظه فى برطمان زجاجى بالتلاجة ووقت الاستعمال بيكون جاهز
كمان لو الرز جه فى مرة مش نضيف ويحتاج نقاوة انقى كمية كمية علشان وقت الطبخ يبقى جاهز اعاير واغسل على طول
اه دايما بحتفظ فى التلاجة بكمية غير كبيرة من الخضرة(بقدونس _شبت_كسبرة_كرفس)
اغسلهم واحطهم فى فوطة قماش فى التلاجة لانك ممكن تحتاجيهم فى اى وقت لانهم بيتحشروا فى حاجات كتير ولو جه جديد عليهم ومش محتاجاهم اقطعهم صغير جدا واشيلهم فى كيس فى الفريزر وممكن استعملهم فى المحشى بيبقوا جاهزين
كفاية كدة دلوقت
وعاوزين خبراتكم وتجاربكم ليه مش بتقولوا علشان كلنا نستفيد من افكار بعض

سندس كلام جميل بصراحه افدتيني

تي تي ازيك يا قمر