سيرة وانفتحت.............للحوامل وغير الحوامل

[غزالة البر]

أنشاء الله تحملين ويطون من الاولاد الصالحين

[روح الدلع]

الله يرزقكن الخلف الصاااااااااااااااااااااالح

الصراحه انا بعدي لا تزوجت ولا خلفت بس طبعا الاحتياط واجب والصراحه قصصكم حلوووووووووووووه

الله يعطيكم اللي يريح بالكم ياااااااااااااارب وتسلمين يا عاشقة الحلويات على هالموضوع المميز

[عاشقة الحلويات]

هلا بك SPRAY

وهلا وغلا بعودتك على الدوام

الحمد لله أنك تخرجت اخيراً وبجدارة

بعدين ذكرتيني بأخت لي كان يوم عرسها

وكان عندها عملي لأنها كانت تدرس صيدلة

وأمي خبرتها بأن ترجع في وقت مبكر حتى تعمل شعرها وتتمكيج

فكان شو بدها تعمل مع آنسة العملي

حتى ما ينقصوا علاماتها وبنفس الوقت تروح عشان توضب حالها لعرسها

وأختي هذه شاطرة كتير وتخاف على العلامة لتروح منها

فكانت أختي قد أخذت كرت دعوة من كروت عرسها وفتحتها أمام مدرسة العملي

وقالت لها: عرسي اليوم اسمحي لي روح بس الله يخليك لا تنقصي لي علاماتي

فضحكت المعيدة بقصد مدرسة العملي وقالت لها اذهبي سماح هالمرة

بس الأسبوع القادم بتكوني هون حاضرة وإلا ؟؟؟؟؟؟

وبالمرة قالت لها أختي : هيدي عزيمة لك يا آنستي

وهيك طلعت أختي حتى تحضر حالها للعرس

فكان عذرها ولا أقوى من هيك مثل عذرك لتعيدي الامتحانات

































































هلا بك أختي غزالة البر

أشكرك على مرورك ودعائك للجميع ولي































هلا بك روح الدلع

الله يفتح بنصيبك ومتشوفك عن قريب

عم تشاركي بالموضوع وفي ببطنك بيبي صغير

الله كريم

[SPRAY]

أختي عاشقة الحلويات أنا راح أكتب عن الحساسية إللي جاتني في موضوع منفصل كيف بدأت وكيف شكلها وما العلاج إللي جربته عشان كل وحده ممكن يلفت نظرها اسم الموضوع وبالتالي يصير عليه دخول كبير
وجزاك الله خيرا على ردك

[روح الدلع]

هلا بك روح الدلع

الله يفتح بنصيبك ومتشوفك عن قريب

عم تشاركي بالموضوع وفي ببطنك بيبي صغير

الله كريم

ان شاء الله انضم للعمليات الجهاديه

اللي مريتوا فيها تحياتي يلا نترياج spray

[عاشقة الحلويات]

على راحتك اختي SPRAY

بس اوعديني أول ما تنزلي موضوعك كمان تضيفي

تجربتك مع الحساسية هون عشان تكتمل الدردشة معك

ودمت بخير وعافية























هلا بروح الدلع كيفك

ولا نقول سوى إن شاء الله أيضاً

[الامل الجميل]

ما شاء الله عليكم كل هل الردود وانا ما منتبههه بالصدفه شفت عشوقه اعطت الرابط لاخت وضعت موضوع انها حامل

المهم انا حملي الاول جاء بعد سنتين تقريبا والسبب قلي الحكيم ما شئ نفسي لانك خايفه انك بالغربه واهلك بعاد وخوف واضطرابات يعني عملني معقده هههه المهم ربي من علي الحمل بعد سنتين بعد التحليل لشتريت حذاء بيبي صغير وذهبت عند زوجي الى مكتبه ووضعتله الحذاء على الطاوله والله الفرحه ما ساعته الحمد لله


الوحامه الحمد لله كان ما كتير مزعج بس كرهت رائحة المطبخ والاواني يعني كنت موت ما اعرف وين اسكب الاكل حتى اكل ولا اعرف بشو اشرب ماء هيدا كان اصعب شي


وصرت اتوحم على سوداء غنم ودهنه هههههههه مع اعن ما بحبها بس ما بعرف شو صار والمشكل انه وقت وحامي وحبل كنت ناقله على مقاطعه جديد وما بعرف شي فيها فما كنت اعرف وين في ملاحم ذبح حلال والغريب انه ابني ولد وفي على اخر ظهره علامه سوداء وعلى رجله علامه بيضاء ههههه كلهم قالولي انه من الوحام اكيد هيدي السوداء والدهن مع اني ما بصدق هل شي


المهم الحمل كان هادي بس ما شاء الله ابني كان ما يهدا ضرب وخبط تقولي معارك داريه
والحكيمه اخبرتني ان البيبي راسه كبير واني صعب اولد طبيعي لانه الحوض وعند صغير واني لح اتعذب كتير بالرغم من هيك قلتلها لالالالالا طبيعي ما بدي قيصري


المهم باول التاسع بداء الطلق بس بدون فتح للرحم وفجئه بحس ان البيبي قلب بشكل غريب ببطني وبلش يحركككك ويضرب بشكل غريب ففضلت اروح والقي نظره عند الطبيبه لاني ما كنت مرتاحه
المهم كانت الساعه الثاله والنصف فحصتني الحكيمه وقالتي خلص خلينا نولد ليوم قلتلها بس ما فتح الرحم قلتل خلص قيصري انا خفت وقلتلها في شئ قلت لا فطلبت منها ارجع جيب تيابي والشنطه فقالت الساعه 6 ونصف بدك تدخلي العمليات طلعت بالساعه يا ربييييييييييي صارت 4 ونص والمستشفى بعيده عن بيتي اكثر من نصف ساعه بالسياره هيدا اذا ما عجقة سير المهم ركضت واتصلت بزوجي وقلتله اني لح اولد بعد كم ساعه هههههه وركض كمان قلي بلاقيك بالمستشفى
دخلت العمليات لوحدي من دون اهلي انا بميل واهلي بميل ما معي غير رب العالمين والدعاء اخخخخخخ من الغربه صرت قول وينك يا امي وبلش ابكي (لح اقلبها فيلم درامي ) المهم طلبوا زوجي لدخول معي بالاول زوجي رفض بس قالولو اني تعبانه وخايف لازم يدخل
بنجت بس نصف صاحيه حسيت كف سحب ابني شعور غريب جدا شيئ عم ينسحب منك عاش داخلك 9 شهور
المهم يالطيف لونه كحلييييييي انصدمت ليش هيك في زراق على ضهره اخبرتني الطبيبه انه كان وضع البيبي بخطر وانه لف الخلاص عليه لانه قلب وجلس
المهم الحمد لله اليوم ابني عمره 3 سنين و2 شهر وحامل انا هلق بس الوحام صعب كتيررررررررر وضغط واطي وحاله الله يتمم على الكل بخير



اسفه على الاطاله

[عاشقة الحلويات]

هلا بك أختي الأمل الجميل

بصراحة طريقة تبليغ زوجك رائعة جداً

ورح حطها ببالي

مسكينة مشكلتك مثل مشكلتي غربة بغربة

وأنا كمان ولدت بدون وجود أمي الله يحميها

ولكن شو بدي أعمل كله بأمر الله والحمد لله على كل حال

والحمد لله على سلامتك

وإن شاء الله تقومي بالسلامة هلأ كمان والخلقة التامة للجنين

والله يعينك على وحامك يلا كلها أيام وتمر

الله يوفقك ويقيمك بالسلامة

[aminavenga]

االسلام عليكم
الفكرة جد ممتعة و قصصكم حلوة
انا كنت حامل لكن ربنا لم يرد
الله يتمم للحوامل علي خير و يصلح الاطفال للامهات
جزاك الله خيرا علي فتح هذا الموضوع

[عاشقة الحلويات]

هلا بك أختي aminavenga

ولا يهمك يا أختي أنا كمان كنت مثلك

والله كريم وقادر اللي عطانا أول مرة يعطينا كمان وكمان

الله لا يحرمك ولا يحرمنا ولا يحرم كل واحد مشتهي الخلفة الصالحة

إنه على كل شيء قدير

والله يتمم لكل واحدة حامل ويقيمها بالسلامة والخلقة التامة

[أم التقى]

انا تزوجت وعمري 18 سنة طبعا تزوجت فورا على الغربة اهئ اهئ اهئ
يعني زوجي كان عبيدرس ببريطانيا ومابيحسن ينزل عشان ياخدني فسافرنا انا وابي لعند زوجي
ووالدي جلس عندي 3 اسابيع وبعدين راح وانا صرت اعاني من الغربة الله لايذوقها لاحد
المهم بقيت سنة ونصف متزوجة وماحملت وطبعا انا هلكت زوجي عشان ياخدني عند دكتورة تشوف ليه ماحملت وهو يقولي لسة بكير على الحمل ليه مستعجلة خلي ناجل فكرة الحمل لبعد مااخلص دراسة ونرجع على بلدنا سوريا
المهم انا كنت كثير ميلة وزهقانة واخر شهر كنت اقوم بالليل ادعي وابكي ودائما ادعي هالدعوة ياربي احمل بتوأم كاملين الخلق والخلق بس ماصارلي نصيب احمل بتوأم
المهم كانت تتلخبط علي الدورة كثير وكل شهر اسو يتحليل بول ومايطلع شيء
اخر شهر بعد سنة ونصف من زواجنا تاخرت اسبوعين وانا مالي معتمة لانو كالعادة كل مرة تتاخر
وانا كنت مسوية رجيم ورياضة وركض طول النهار الله ستر ثبت
المهم مرضت صار معاي التهاب لوز وانا مااخد دواء ابدا وزوجي الا بدو يعطيني دواء التهاب وانا ارفض اقوله بخاف اكون حامل والحمد لله مااخدت
بعدين بقيت اسبوع مرضانة ومن دون دواء تعبت كثير قلت بدي اقوم اسوي تحليل بس عشان اطمن اصلا بعرف النتيجة لا
المهم كل مرة زوجي يكون جنبي وعمنطلع على التحليل عجب خطين والا خط الا هالمرة مااجى ههههههه لانو كالعادة بيعرف النتيجة لا
رحت سويت تحليل وتركته حتى ماطلعت عليه وبعد نصف ساعة رجعت والا الاقي خطين وانا ركض عند زوجي هههههههههههههههههههه خطين خطين قالي وش صار ههههههههه ماصدقنا قمنا سوينا اختبار ثاني وماصدقنا ههههههههههههه حتى رحنا ثاني نهار عالمخبر عشان نسوي اختبار بالاخير صدقنا والحمد لله يارب
طبعا مابقي حد الا عرف وانا كنت مااحب يعرف احد بس مااحسن طبعي غير طبع زوجي ابدا كل شيء بصير لازم يقوله وانا مااحسن اقول اي اولا
ووحامي كان \بعا الشهية انفقدت مع انه اكلي من قبل كويس يعين مالي نحيفة بس اول ثلاث شهور بتعرفي الوحام والله صعب
طبعا رحنا على بلجنا اجازة لانو كنا حاجزين بالطيارة قبل مااعرف انو حامل وعرفت انو حامل قبل باسبوع من السفر
وكل ماانعزم على عزيمة اجلس على الاكل والله مااكل غير لقمتين واقوم واقولهم دخيل الله لابقيت تعزموني عشان عبيتكلفوا وماعبحسن اكل
المهم بعد مارجعنا من الاجازة
طبعا مو اكل بريطانيا يختلف عن اكل السوري مااحسن اكل الاكل هون ههههههههه لوقت مااعتدت بالغصب
ووحامي طول الحمل كان من عدا الشهور الثلاثة الاولى
كنت مااكل الدجاج لحتى دخلت الشهر السابع لحتى اتقبلت اكل دجاج ههههههههه
وحامي غريب يعني اكل لحمة ومااكل دجاج
ومن دخلت الشهر السابع رجع الوحم كمان لوعة بالمعدة ونوم لازم انام بالنهار ساعتين
يعني كل يوم اقوم من الساعة 8 الصبح افطر واتغدى على الساعة 1 واتعشى على الساعة 6 وانام الساعة 11
اما هلق لازم انام ساعتين بالنهار والله يعين
والمهم هلق انا باخر الشهر السابع
هذا اول حمل لي
سامحيني كل هالكلام ولسة اول حمل لي وماولدت لو يكون عندي اولاد كان صارو خمس صفحات ههههههههههه
ادعي لي ربي يرزقني بالولد السليم المعافى من دون زيادة ولانقصان
لانو سويت اشعة بالشهر الخامس قالوالي انو ولد وانه الولد عندو الكلية اليسرى متضخمة شوي وقالوالي اغلب هذي الحالات تختفي قبل الولادة وعطوني موعد تصوير ثاني ب 18/9
بقى ادعي لي اروح بعد اسبوعين وتكون الحالة مختفية تماما يارب انك على كل شيء قدير
وجزاكي الله خيرا على هذا الموضوع

طبعا انا هون ببريطانيا الطب عندهم ماعجبني ابدا تخيلي بس طول فترة الحمل بسوو موعدين اشعة بس بالاسبوع ال 13 والاسبوع ال 21 وبس لنهاية الحمل بس لانو انا شافوا الكلية عند البيبي متضخمة فعطوني موعد ثالث بالاسبوع ال 33 واستنى هالموعد بفارغ الصبر وش اسوي نفسي اطمن على البيبي وزنه صحته مااقول غير اااااه والله يرجعنا على بلدنا يارب

[عاشقة الحلويات]

هلا وغلا ببنت بلدي أم التقى

عجب أكيد أنت حلبية فالكلام واضح وصريح

هلا والله بأهل حلب كلهم

عزيزتي الله يصبرك لموعد التصوير وتزول كل مخاوفك

لما تشوفي ابنك بيديك سالماً معافى عم يزعق ويزعج كل من حوله ببكاءه

عزيزتي لكل شيء إذا ما تم نقصان

وبالذات حالتنا نحن من في الغربة

فسعادتنا لا تكتمل بسبب عدم وجود الأهل حولنا

ولكن يكفيك بأن تعوضي كل ذلك بوجود زوجك

وأنا أرى بالنسبة لتصوير البيبي بالعكس بيفهموا

فكيرة التصوير تؤذي الجنين على حد علمي

بدك تسمعي نصيحتي وخذيها من مجرب مش من حكيم

اقرأي كل يوم على الأقل جزء من القرآن

وضعي يدك على بطنك وحاولي أن تدوريها وانت تقرأي القرأن

حتى تلمس جميع أجزاء بطنك

ولكن السر ليس في القراءة فقط بل في اليقين بأن ما تقرأينه

من كلام الله عزوجل فيه شفاء ورحمة عندها يكون الشفاء بعون الله وأمره

عزيزتي أنا جربت هالوصفة التي قلتها لك لما كنت حامل بابني

وكان الجميع يقولون إجهاض منذر لا محالة بسبب نزيفي لمدة الشهر الثالث والرابع بحملي

ولكنني كنت صابرة وأقوم لما قلته لك

ولكن في قلبي يقين بأن كلام الله تعالى فيه الشفاء والدواء

والحمد لله على كل حال

وطبعاً كلام الله تعالى يعطيك الراحة النفسية في غربتك ويعزيك كثيراً

لك مني أطيب التماني والدعوات بأن يسهل رب العباد عليك

ويقيمك سالمة غانمة وبين يديك ابنك

وتشوفي زوجك عم يأذن له ويكبر له وأنت عم تبكي من الفرحة

[أم التقى]

عاشقة الحلويااااااات
هلا والله باهل حلب
كويس عرفتيني لوحدك هههههههههههههههه
شايفة الحلبية لهجتهم مميزة

تسلمين على هالدعوة الحلوة وربي يحفظ لك اولادك يارب
وان شاء الله بطبق نصيحتك
انا دائما احط ايدي على بطني واقرا ايات الشفاء واقرا
اللهم
وان شاء الله بعد التصوير بطمنك يالغالية
صح التصوير الكثير مو كويس بس على الاقل كل شهر او شهر ونصف
لانو الوحد ودو يتطمن على البيبي
اااااااااه على الغربة الله يخلصنا منها عن قريب يارب
ان شاء الله اقل من سنة وارجع لبلدي للابد
انتي وين مغتربة

[عاشقة الحلويات]

هلا أم التقى

أنا بحب أهل حلب

ولو خيروني أن أعيش في البلد التي فيها بيتي وبين حلب

لاخترت بأن أبيع بيتي وأسكن بحلب

أنا يا عزيزتي مغتربة بالسعودية مع الباش مهندس زوجي الله يبارك فيه ويحميه

بالنسبة للتصوير فطولي بالك

يعني ما بقي غير عضة كوساية كلهم شهرين أو أقل

وتشوفي الباشا بين يديك سالماً غانماً

وتشوفي فرحة أبوه فيه كمان

يلا الله يهونها عليك

شدي همتك وشدي عزماتك حتى تبشرينا بالبيبي عن قريب

أمين يا رب العالمين

[الريم2]

موضوع بجنن...بس الكلام فيه و الكتابه ما تخلص..
... تزوجت في 9\12\2005 ...ولاني بدرس و بشتغل في نفس الوقت قررنا تاجيل الحمل لفتره..

في 16\1 صار عندي حراره و رشح و انفلونزر...الوالد صيدلاني ,,,فرحت انا و زوجي عند اهلي ,عشان أخد إبره..فض بابا يعطيني الابره...إطلع على وجهي وحكالي :ما راح أعطيكي إبره الا لما تعملي فحص حمل ....

فأنا و زوجي قعدنا نضحك إنه ما في حمل...مستحيل......

لما فحصت طلعت حامل .. ..أول شي من الصدمه...صرت اصرخ إنه جهاز فحص الحمل خربان.. .وطلبت منهم جهاز تاني ...و تالت وعلى نفس الحال...

طبعا زوجي يضحك بس مش عارفه ازا هي فرحه والا ....أما امي و اخواتي كانو طايرين من الفرحه..
روحت البيت ما عرفت انام بس ابكي خوف من شو ما اعرف....و زوجي صابه سكوت تااااااااااااااااااااااام.
و صرت قاعدتلو على نقره..إزا حكا كلمه إما ابكي أو اعمل مشكله..

حتى الصبح كان يصحيني عشان اشرب الادويه ويجيبلي كاسه الحليب ما كان يعجبني..

طبعا ما احكيلكم علي مجاعة الصومال الي صابتني...ههههههههههههههههههه
كإني في حياتي ما شفت الاكل...كنت لما افتح التلفزيون و اشوف برنامج طبخ..اشم ريحة الطبخه الي ع التلفزيون في انفي...

زوجي طلب من حماتي انها لاتجيب قدامي سيره اي اكله ...وطبعا لاتوصي حريص ...كأنه قاللها العكس...
كل ما اجلس معها تبدأ:ما تخلي نوع اكل ولا فواكه الي مش موسمها الا تزكرها...

...ضليت على هدا الحال مده طويله...و إزدادت حاله الكآبه لما بدا شكلي يتغير ..وملابسي صاره صغيره...وبدا وزني يزداد...وصرت ازيد كل شهر 2-3 ك...طبعا ما احكيلكم على اكل الشوكولاته بكميات غير طبيعيه...النوم
بجننون...وكان عندي مشكله (الاستفراغ)استمرت لآخر السادس.و اموت من ريحه زوجي.sid

طبعا ما كنت اطبخ لاني ما بعرف...كنت اتغدا عند اهلي او حماتي ..لكن كرهت الدجاج و اللحم .

ما أكزب عليكم كنت انانيه...ضليت فتره طويله وانا ما بدي البيبي ...في آخر الخامس بدا بطني يبان...صرت متل المجنونه...ما بدي...
لكن الي خفف علي زوجي...كان يقولي شكلك كتير حلو ...و البيبي راح يكون حلو ..و سبحان الله كيف الله انعم عليكي و حط جوى جسمك روح تانيه .و انه كيف هدا البطن عباره عن غرفه للبيبي...ومن هدا الكلام..

و فعلا شوي شوي بديت اتأقلم مع حالي بديت اتعود على شكلي ..كلام زوجي كتير رفع من معنوياتي و ريحني ...حبه للي انا فيه و وقفته معي كتير ساعدتني..

....في نص الشهر السادس صار عندي نزيف...ونمت عللى ضهري فتره لابأس فبها..كان النزيف من المشيمه ...

في هاي الفتره بدا البيبي يتحرك...كنت كتير اخاف....شي غريب...و شوي شوي صرت احب البيبي ...كإني بعرفها من زمان ,,و إني كتير مشتاقيتلها..بدي اشوفها و اشوف كيف شكلها... :

وصرت اشتري اغراضها و ملابسها و اخترنالها اسم..وصرت كتير متلهفه اني شوفها..

اما الشهر التامن صار عندي اوجاع. في اسفل البطن و الحوض...و خصوصا بالليل..وكان بطني يحجر(متل الحجر)
رحت على الدكتوره,كنت بالزبط في الاسبوع التاني من الشهر التامن....قالت الدكتوره اني راح اولد خلال اسبوع!!!!!!!!!!!!

.....ليش يا دكتوره؟؟؟
...البيبي كبير...(مع العلم إنه كان وزن البيبي 2,5 ك)
وإنه الولاده قيصريه...لاني في التامن(و اصرت إني لسا في السابع)يعني رجعتني اسبوعين لورا.
هدا الكلام كان في 2\8

قررنا إنغير الدكتوره,,,رحت على مستشفى..قالتلي مين قال انك في التامن !!!!
انت في التاسع..
إزا نا متزوجه في 9\12 كيف صرت في التاسع!!!!ما بعرف
المهم و قالت انه راح اولد قيصريه لانه مخرج الحوض صغير...

ورحت شفت كمان دكتوره و قالت راح اولد طبيعي مش قيصريه...وعلى هدا الحال...

الاسبوع الماضي رجعت عند الدكتوره تبعت المستشفى وقالتلي انه مخرج الحوض توسع و راح اولد طبيعي ..
طبعا في البدايه لما التنتين قالو قيصريه ...صرت اقنع حالي بالفكره,,,و الكل قالي احسن مما تتوجعي .

ولما قالتلي طبيعي صرت خايفه من الطبيعي بدي قيصريه..ممكن في المستشفى تطلبي قيصريه ازا بدك..

احلى شى في الموضوع ...رحت امبارح كمان كان عند مراجعه...
قالتلي الدكتوره انه راس البيبي بعده ما نزل في الحوض ... وراح استنى كمان عشر ايام ازا مانزل راح اولد قيصري...فراح احكيلكم شو بصير بعد عشر ايام ..ادعولي