السلام عليكم ورحمة الله وبركاته

حدخل فى الموضوع علطول

انا اميــــــــــــنة

امينة السميـــــــــــنة ......

امينة الطخينـــــــــــــــــه......

اى حاجة فيها اينة فى الأخر

عمرى 32 سنة

متزوجة بس مش من السيد احمد عبد الجواد ... واحد تانى بس ما يفرقش عنه كتيييير

انا يا جماعة من اصحاب الوزن الثقيل .... الثقيل قوى

وزنى للأسف 85 كيلو ....

طبعا واحدة حتدخل دلوقتى تقولى يعنى هو 85 كيلو ده كتير دا انا نفسى اوصلهم

اقوم انا اقولها......

اصلى انا مش طخينة وبس لا وقصيرة كمان يعنى شبه انبوبة البوتاجاز من الأخر ههههههههه

عموما يا جماعة انا قررت وعزمت وان شاء الله توكلت عليه انى مبقاش لا سمينة ولا طخينة ولا حتى امينة هههههههههه

قررت بجد مبقاش ضعيفة ولازم اتحدى الطفاسة وحبى للأكل

معقول حتة شيكولاتة تبقى اقوى منى.....
معقول حتة جاتوه تبقى اقوى منى.......
معقول بيبسى كانز تبقى اقوى منى.......
معقول عزومة بره فى مطعم فاخر بيقدم اكل جامد جدا تبقى اقوى منى...........

لا والف لا

انا اقوى من كل الأكل اللى فى الدنيا

علشان صحتى وعلشان شكلى اولا .... وبعد كدة علشان جوزى وعينة متزوغش لا هنا ولا هناك ومنها لله بقى هيفاء وروبى ونانسى والحاجة زهرة هى وازواجها الستة ههههههههههه

المهم القصة بقى علشان مطولش عليكم وافتح فى الرغى اللى اختكم استاذة فيه

قررت انى اخس بأذن الله ويوميا ادون يومياتى مع تحدياتى للسمنة

طيب واحدة تقولى

واحنا مالنا ومش ناقصيين زهق حنعملك ايه ... يعنى دى لا مسابقة حنشترك فيها ولا فريق ولا رابح اكبر ولا رابح اصغر .....وواحدة حتقعد ترغى على قلبنا وخلاص .....

اقولها يا ريت ولو كلمة تشجيع لما اعمل حاجة كويسة وبرضه كلمة توبيخ تهزيئ لما اطافس وانسى نفسى حيفرقوا معايا قوى

وانا بقى حقولكم على الخطة الخمسية بتاعتى ان شاء الله

انا زى ما نوهت ( حلوة نوهت دى ) انى 85 كيلو وزى ما حيبان على شريط الوزن اللى فى التوقيع

الدكتور وكل المواقع اللى على النت قالت انى المفروض وزنى يكون 55 كيلو

طيب ليه ؟؟مش المفروض الوزن ده يبقى الطول ناقص 100

يعنى انا طولى 160 يبقى وزنى المثالى المفروض يبقى 60

قالك لأ .... الستات علشان دايما حظهم حلو فى كل حاجة زى ما كلنا عارفين

لازم يبقوا على الأقل ناقصيين عن وزنهم المثالى بخمسة كيلو

يعنى انا قدامى 30 كيلو تحدى

وطبعا انا علشان متفائلة وعلشان شوفت ناس خسوا ب30 وال 35 كيلو

فدا حلم مش بعيد المنال ان شاء الله

انا حقسمهم على عشرات

يعنى التحدى الأول

من 85 الى 75

التحدى الثانى

من 75 الى 65

التحدى الثالث

من 65 الى55 ان شاء الله

وعلشان اكون واقعية مع نفسى اكتر واكتر مش حقول بقى اعمل رجيم الميه ولا رجيم 12فى 12 ولا رجيم التمر واللبن ولا كل الكلام ده

انا حمشى على رجيم دكتورة منى راداميس اللى كنت ماشية معاها من سنتين وخسيت فعلا 14 كيلو معاها بس رجعتهم تانى للأسف لظروف كدة مش وقتها احكيهالكم

وحدى نفسى من 1.5 الى 2 كيلو فى الأسبوع

علشان اكون واقعية

يعنى من 6 كيلو الى 8 كيلو فى الشهر

وبرضه علشان اكون واقعية اكتر و اكتر مع نفسى حدى لنفسى مرتين فى الشهر وجبة فرى اكل فيها اللى انا عايزاه

ده بس علشان اقدر اكمل ....لأنى لو قلت حقد 3 شهور او 4 شهور مكلش بره او مكولش شيكولاته ابقى بضحك على نفسى وعليكم

لكن ممكن اصبر نفسى باليوم الفرى ده وابقى محرمتش نفسى برضه

ايه رايكم ..... دام فضلكم

خلاص بقى الواحد زهق من شكله المكعبر ونفسه يبقى سمبتيك

وخصوصا ان جوزى عمال يخس وانا عمالة اطخن وبقول انا حعمل دايت من اول اغسطس واهو فات اغسطس وداخلنا فى سبتمبر ومافيش حاجة حصلت

ان شاء الله حكتبلوكم يومياتى يوم بيوم وحنزل الرجيم كل يوم جمعة باليل علشان لو حد عايز يعملوه ......

معلش رغيت كتيييييييييير معاكم .... ادعولى ربنا يقوينى

ليه التوقيع مش باين ؟؟؟

وخصوصا ان جوزى عمال يخس وانا عمالة اطخن وبقول انا حعمل دايت من اول اغسطس واهو فات اغسطس وداخلنا فى سبتمبر ومافيش حاجة حصلت

يعني في ناس زيي
ههههههههههههههههه
انتي عسل ودمك شربات
وماشاء الله شجعتيني بجد
أنا بعد ولادة ابني وكل يوم بقول أنا حلعب رياضة
أنا حشد على نفسي شوي هههههه ولله الحمد بلا فائدة
فإن شاء الله حشد معك واشجعك لأنك بجد رهيبة
أنا وزني 84
وطولي 164

وبالنسبة للوزن المثالي كل وحده حسب طولها وكثافة العظم عندها
وبالنسبة لي أنا لما وصلت 64
كان بدي بس 2 كيلو وبكون ممتاز
وخليني معك أصل ل 60 بكون مبسوطة كثير

يعني على رأيك بدي تقريبا 25 كيلو

وربنا يوفقك

ما قلت لنا شو هو رجيم منى؟؟
وماهي رياضتكِ
وربنا يوفقك يارب

.

العزيزة أمينة اللي إن شاء الله مش حتبقى سمينة

كلامك حلو ومنطقي ولذيذ وربنا يعطيكي العزيمة وتوصلي لهدفك وكلنا معك يا وزة بس إنتي ما تتراجعي وشدي الهمة .

وزي ما حكيتي إحنا بنسمن وأزواجنا بينحفو وربنا المستعان يا عسل .

.

العزيزة مرمر واميرة

شكرا حبيبتى على مرورك وعلى دعائك

وطول ما انتوا معايا وبتشجعونى ان شاء الله مش حتراجع ابدا ابدا عن هدفى بأذن الله

وفعلا احنا عمالين نطخن وازوجنا بيرفعوا .... زوجى ما شاء الله عليه عنده ارادة فولاذية بدا الدايت واحنا فى المصيف .... تخيلى

قدامة ال open buffet فيه كل ما لذ وطاب من سلطاته وبابا غنوجه وحلوياته ومشروباته وهو كان بيختار اقل القليل وميرضاش ياخد غيره

واختك بقى نزله معندهاش يا امه ارحمينى من كل صنف معتقتش حاجة الا لما لازم ادوق

حسبى الله ونعم الوكيل

بس ان شاء الله اقدر اقوى على نفسى شوية بتشجعيكم ليا ووجودكم معايا

حبيبتى بنت الأحرار

شكرا على مرورك وترحيبك بيا

وكويس انى لاقيت زملاء معايا فى الكفاح ضد السمنة ههههههه

بصى انا من النهاردة بدأت التخفيف فى الأكل لكن الدايت حبتدية من يوم السبت القادم ان شاء الله وحنزله يوم الجمعة من كل اسبوع بأذن الله

والرياضة المشى ... والأيروبكس فى البيت

وربنا يوفقنا جميعا ان شاء الله

ساكون من المشجعات لك يوميا

كان الله في العون

ومن النهارده لل30 كيلو لا تستسلمي للحلويات

كويس وأنا مثلك بدأت تخفيف ومن يوم السبت حبدأ برجيم النقااااااااااط
هو رائع جدا

والرياضة بإذن الله مشي وتمارين رياضية للجسم
وربنا يقدرنا ياااااااارب

كتبت بواسطة الدنيا 2005

ساكون من المشجعات لك يوميا

كان الله في العون

ومن النهارده لل30 كيلو لا تستسلمي للحلويات

حبيبتى ربنا يخليكى يارب ومتحرمش منك ابدا

وانا ان شاء الله اكون عند حسن ظنكم

كتبت بواسطة - بنت الأحرار -

كويس وأنا مثلك بدأت تخفيف ومن يوم السبت حبدأ برجيم النقااااااااااط
هو رائع جدا

والرياضة بإذن الله مشي وتمارين رياضية للجسم
وربنا يقدرنا ياااااااارب

ربنا يقدرنا جميعا يارب

بالتوفيق عزيزتي
وربي يناولك مافي بالك