"فَإِن لَّمْ يُصِبْهَا وَابِلٌ فَطَل"

[raindrops]

"فَإِن لَّمْ يُصِبْهَا وَابِلٌ فَطَل"

علشان نتعلم في حياتنا كلها إن الحساب عند ربنا مختلف تماماً عن الحساب اللي بتقعد نحسبها احنا مع نفسنا
ربنا سبحانه وتعالى بيضرب مثل في سورة البقرة للناس اللي بتساعد غيرها لوجه الله:
(وَمَثَلُ الَّذِينَ يُنفِقُونَ أَمْوَالَهُمُ ابْتِغَاءَ مَرْضَاتِ اللَّهِ وَتَثْبِيتًا مِّنْ أَنفُسِهِمْ كَمَثَلِ جَنَّةٍ بِرَبْوَةٍ أَصَابَهَا وَابِلٌ فَآتَتْ أُكُلَهَا ضِعْفَيْنِ فَإِن لَّمْ يُصِبْهَا وَابِلٌ فَطَلٌّ)

هنا ربنا سبحانه وتعالى بيشبه الناس اللي بتساعد غيرها دي ببستان نزل عليه مطر شديد (وابل) فالبستان طرح (ضعفين) كمية الثمار اللي كان بيجيبها ــ وكأن اللي انت قدمته لغيرك كان سبب في هطول المطر الشديد على أرضك فطرحت رزق مضاعف ليك
لحد هنا جميل ::
لكن تكملة المثل في الآية تفهمنا نقطة أدق في الموضوع .. ربنا بيقول إن نفس كمية الرزق المضاعف دي هتعطينا حتى لو منزلش على أرضنا المطر الشديد ده (فإن لم يصبها وابل) وكان اللي نزل هو بس شوية مطر خفيف عامل زي الندى (فطل)

فهمنا النقطة اللي ربنا عايز يوصلهالنا من الآية دي ؟؟
مطر غزير ، مطر خفيف... أياً كان كمية المطر اللي نازلة مش هي السبب في طرح أضعاف الرزق اللي جالنا لما احنا ساعدنا غيرنا ! لإن أرضنا كده كده هتجيب نفس الكمية المضاعفة في الحالتين ــ الفكرة في أرضنا نفسها
لما احنا ساعدنا غيرنا .. أرضنا زادت خصوبة ! فبقى حتى القليل بيجيب معاها كتير !
ودي اللي اسمها (البركة) !

ودي اللي تعرفنا ان الحساب عند ربنا مختلف تماماً عن الحساب عندنا

مرتبك بسيط .. لكن بمساعدة غيرك ربنا بيطرح فيه البركة
وقتك ضيق .. لكن بمساعدة غيرك ربنا بيطرح فيه البركة
مهارتك قليلة .. لكن بنيتك انك تساعد بيها غيرك ربنا بيطرح فيها البركة

القليل بقى بيجيب معاك كتير لإن بركة ربنا دخلت في الحساب ..
فالأضعاف جاية جاية حتى لو مش شايفها ملموسة في ايدك دلوقتي

علشان كده ساعد غيرك دايماً من غير تفكير .. لإنك بكده بتزود خصوبة أرضك .. فأياً كانت كمية المية اللي هتنزل عليك هتجيب أضعاف

وأول ما تحس انك متردد قل لنفسك : "فَإِن لَّمْ يُصِبْهَا وَابِلٌ فَطَل"

منقول للفائدة