انا هدخل علطول واقولكم انا هبقى سعيدة لو كنت معاكم وبشكر ام نور والكس وام شادي وكلكم لانكم مجموعه هايله

هقولكم عن تجاربي بقي
انا وجوزى بس معنديش اولاد قولوا كلكم ربنا يرزقنى زرية صالحه وكمان انا مغتربة ف السعودية
بس بعمل كل حاجة وبشيل كل حاجة اكنى عيلة مكونة من 10 افراد المهم مش هطول عليكم انا بفرز الفاصوليا الخضراء بغسلها واقطعها واحطها في اكياس وفي الفريزر والطماطم طبعا بغسلها واعصرها واصفيها واعبيها في اكياس على قد الطبخه واستخدم اول بأول وكمان التوم بقشر كمية وافرمها فى الكبة واحطها في كيس وابططها تكون على شكل مربع عشان كل مااعوز اقطع حته واخدها وصدقونى موضوع الطماطم والتوم دول من اكتر الحاجات اللي بتوفر فى الوقت عشان بنستخدمهم كل يوم ولا اغسل الخلاط مكان عصرالطماطم ولا الكبة مكان التوم وكمان بجيب الفلفل الأخضر الحامى تقريبا نص كيلو وراس توم وافرمهم مع شوية ملح واحطهم في علبة وفى الثلاجة ويكونوا جاهزين للسمك والسلطة علطول وكمان الجنزبيل الفريش بقشرة وافرمه واعملة زى التوم في كيس وابططة مربع وفى الفريزر والمكرونة الباشميل بفرزها نية ارتبها في الصينية واغطيها بشفاف وعلى الفريزر واطلعها اهم حاجة تاخد درجة حرارة المطبخ وبعدين ادخلها الفرن والبانيهات طبعا بفرزها بعد ما اتبلها واغطيها بالبقسماط والكفتة المصرية كفتة الرز لما بعملها بعمل كمية واقليها واحط في كل كيس على قدى انا وجوزى وتبقي جاهزة على الصلصة علطول والسبانخ اغسلها وانشفها بفوطة واحط عليها الشبت والكزبرة واقطعها وفى كيس وعلى الفريزر بس تتطلع ع الصلصة علطول بدون فك عشان متفقدش فوايدها وبرده الكوسة بجيبها واقطعها واحطها في الفريزر واقوم كل يوم من النوم ببقا عارفة هطبخ اية واول ماصحي اطلع الحاجة تفك على ما اتوضا واصلي الضهر وابتدى اطبخ الطبخ مش بياخد نص ساعه بس نصيحة اللي عاوز يفرز محشي المحشي مش بيتفرز لأن الرز بيتفتت من التجميد ولما افتكر حاجة تانية ادخلكم ان شاء الله اوعوا تنسوا تدعولى بزرية صالحه الخَلق والخُلق

ازيكم يا حلويييييييييييييييين؟
معلش انا اتخرت عليكم شوية لاني كنت مكتئبة شوية وكمان لان موضوع المربات دة ماليش فيه خالص لا بناكله ولا بنعمله مععلش بقى ان شاء الله افيد في حاجت تانية
بس ما يمنعش ان جزاكم الله خيرا على المجهود الرااااااااائع دة الوحد ممكن يعمل فايل بكل اللي تقولوه ويبقى متكامل باذن الله

وربنا يجزيكم خير يارب لكل الدعوات الحلوة اللي انتوا دعيتوهالي ربنا يكرمك ولكم مثلها ياااااااااارب

الكسز
انت فين مختفية ليه ياقمر؟؟؟؟؟؟

ايمي

ربنا يارب يرزقك بالذرية الصالحة عاجلا غير اجل اللهم امييييييييييييين
وكل كلامك ماشاء الله مظبوط وباين عليكي ست بيت شطورة

ام نور
بقولك ايه ياقمر
احنا ليه ما نعملش ملخص لكلام كل الحبايب هنا ، يعني احنا بنسمك بند بند ونتناقش فيه، ليه ما نمسكش البند دة ونحط كل الخبرات المهة فيه على شكل نقاط ونفردهم في موضوع شامل متكامل؟ وبكدة الاستفادة تعم على الكل ويبقى سهل ان احنا نرجعله بدل ما نقرا كل الكلام اللي في السابق اسهل لكل الاخوات؟؟؟؟؟؟؟

اهلا يا جماعة
شكرا ليكي *ايمي* على هذه النصائح
ربنا يا رب يرزقك بالزرية الصالحة آآآميييين
اهلا يا *فرح*عندك حق كلامك صح

صباح الخير حبيباتى ...كل سنة و انتم طيبيين و بخير يا رب...

ما شاء الله البنات اضافوا كام فكرة حلويين ربنا يجازيكم كل خير يا رب....

لى عودة باذن الله ...سلااااام

السلام ليكم ورحمه الله وبركاته
ازيكم يا اخوات
ما شاء الله عليكم ستات بيوت من الدرجه اولى
ربنا يسعدكم ويرزقكم ويهديكم

مساء الخير لكل الموجودين
وحشتوني كلكم


لولو الف سلامه عليك ياقمر

شكرا فرح وام خالد السويس وربنا يجزاكوا كل خير عن الدعاء اللهم استجب

الف شكر يا ايمي على طريقتك في التفريز .... ان شاء الله هابقى اجرب منها اللي يناسبني ...انا بعمل السبانخ والفاصوليا زييك .... والطاطم ... فغسلها وسعات احطها زي ما هيا في الفريزر ... ولما احتاجها ... اطلعها في شوية ماية وبعدين الاقيها فكت من جوا ...واضربها في الخلاط بتبقى صلصة ...
والتوم بعمله زيك بس بعمل برطماااان كبير لاني بكره تقشير التوم
بس مجربتش الصراحة لا لا المكرونة بالبشاميل لاانا ملناش تقل عليها لا انا ولا جوزي ... والبوفتيك والبانية وكدا فعلا نفسي اجربه ان شاء الله لاني عمري ما عملتته وافتكر انه هيبقى اريح واوفر ....بس انا عايزة اعرف بيتبل بالتتبيلة بتاعته عادي واعديه في بيض وبقسماط وشكرا على الفريزر ... ولما اطلعه اقليه على طول ولا اسيبه يفك ...؟؟؟ والف شكر ليكي انت وباقي الاخوات

السلام عليكم شكرا يا قمرات على المعلومات
ايمى شكرا على المعلومات الجميلة
يبيبى متشكرة يت قمر الحمد لله على اى حال ابتدا الالم يبان فى كتفى وزراعى جدا الحمد لله على كل اللى يجيبة ربنا

ازيكم يا جماعه بسم الله ما شا ءالله انا بستفاد من افكاركم كلها

ربنا يبارك فيكم

ماشاء الله البنات افكراهم روعه

صباح الخير على اجمل ستات فى المنتدى
مرحبا بييييييكى يا اييمى وبكل الموجودات بلا استثناء
طبعا احنا اتكلمنا كتير عن بند المربات
الان عاوزين خبراتكن فى المخللات
لولو ربنا يجازيها خير كتبت لنا مره مخلل البصل
عاوزين وصفاتكن فى الباقى ومده حفظ كل نوع مخلل
انا اعرف ان فى زيتون بيقعد طول السنه
يا ريت اللى عندها خبره تقول لنا ازاى او لو ولدتها ماشاء الله تعرف تعمل مخللات ياريت
تجيب لنا الطريقه منها لان امهاتنا خبره كتير وعارفين اكتر طبعا
انا حبدأ بمخلل بسيط
وهو
مخلل الخيار
انا افضل انه يكون كميه صغيره لانه بيتهرى بسرعه
حقولكم طريقه والدتى
1 كيلو خيار
لتر ماء
تلات ملاعق ك ملح صخرى
ملعقه كبيره خل
حوالى 10 فصوص ثوم صغيرين
والدتى ربنا يبارك لها علمتنى ان الخيار الافضل انه ميتقطعش
بنقى الثمره المتوسطه والناشفه مش الطريه
واغسله كويس
وارصه فى علبه شرط تكون محكمه الغلق وممكن يبقى برطمان ونحط الخيار واقف عليه
نرص الخيار
وقبلها نسخن الميه ونحط فيها الملح والخل وندوب الملح
ونحط التوم بحاله مش مدقوق على الخيار
ونصب الميه اللى بالملح والخل ولو تحبى شطه مفييش مشكله
وتقلى العلبه باحكام شديد ومهم جدا ان الميه تغطى الخيار
وسبيه فى الجو العادى 3 ايام تقريبا ولو الجو حر زى بلاد الخليج كده
نحطه فى التلاجه ونفتح عليه بعد اربع ايام مثلا
حيكون لونه اتحول من الاخضر للاخضر الذهبى
ويقطع وقت التقدييم
اتمنى اكون افدتكن

السلام عليكم ورحمة الله وبركاته
أخيرا اشتركت الحمد لله
الحقيقة انا متابعة لنشطاتكم في المجموعة من فترة ولكن كنت مشغولة وان شاء الله نفيد بعض ونتناصح مع بعض
فهل ممكن تقبلوني معاكم أخت لكم
وجزاكم الله خيرا

السلام عليكم
ازيك يا * نور * منور مجموعتك يا جميل
اهلا بيكي يا زهرة الاقصى منورة
واخبارك ايه يا *فرح* الاكتئاب راح ولا لسة

وعاملة ايه يا *ايمي * كويسة

وعاملين ايه كلكم يا بنات