تويت
تورتة Noamnasry...خطوة بخطوة وبالصور لاحلى منتدى فى الدنيا
النهارده جايبه لكم هديه لعضوات ومبدعات منتدى لك الغالى
تـــــــــــــــــــــــــــــــــورتـــــــــــــ ــــــــــــــــــــــــة
والله سهله جدا وما اخدت وقت ابدا وطلعت فى النهايه روعــــــــــه
اولا : انا عملت الكريم شانتيه من قبلها بيوم وحطيته فى الثلاجه علشان يتماسك ويعطى نتيجه احلى
والطريقه اعتقد كلكم عارفينها
كوب دريم ويب + 1/4 كوب حليب ساقع
وضربتهم حوالى 15 دقيقة
مقادير الكيكة الاسفنجيه :
1 كوب دقيق
1 كوب سكر بودرة
7 بيض ( تقريبا كوب بيض )
1 ملعقة كبيرة بيكينج بودر
1 ملعقة صغيره فانيليا
واخدين بالكم المقادير سهله ازاى ...كوب من كل حاجه
دلوقت هقول لكم السر فى نجاح الكيكة
افصلى البياض عن الصفار واضربى كل واحد لوحده لمده 15 دقيقة
دى خطوة مهمه جدا جدا
وبعد الضرب بالمضرب الكهربائى طبعا
البياض هيبقى مارينج هش...والصفار لونه هيفتح ويصبح مثل الكريمة
ضيفى الصفار على الماريج ببطئ واضربيهم على اقل سرعه
وضيفى ليهم الفانيليا
ملحوظه مهمه ( الضرب كله فى جميع الخطوات فى اتجاه واحد )
اخلطى المقادير الجافه مع بعضها وانخليها مرتين
1 كوب دقيق
1كوب سكر
1 ملعقة كبيرة بيكنج بودر
ونبدأ نضيف المقادير الجافه لكن بحرص ملعقه ملعقه بطريقة النخل
ونستمر فى الضرب على اقل سرعه فى اتجاه واحد وببطئ شديد علشان ما نخرج منها الهوا اللى دخلناه بالضرب قبل كده...
بياخد وقت حوالى 15 دقيقه او لحد ما نحس ان الدقيق اختفى والعجينه تجانست مع بعضها.
عند الخطوة دى نشغل الفرن على اعلى درجة حرارة
وندهن صينية مقاس 28 بسمن نباتى ( احسن من الزبدة او الزيت ) ونرشها بالدقيق
ونخبط على ظهر الصينيه علشان لو فى دقيق زياده ينزل
ونصب فيها الخليط النهائى ونستودعها الله وندخلها الفرن
ولا نفتح عليها ابدا قبل 30 دقيقة
انا الفرن بتاعى درجة حرارته عالية جدا علشان كده بحطها على اعلى درجة حرارة فى البداية وبعد 15 دقيقة تقريبا بهدى الفرن شويه ( طبعا من غير ما افتح عليها ) واسيبها تستوى براحتها
علشان ماتتحرقش من الخارج ولا تفضل عجين من الداخل وتاخد حقها فى الارتفاع
لو الفرن بتاعك حرارته عاليه اعملى زى ما بعمل اضمن لك كيكة مرتفعه ومستويه ولونها ذهبى جميل ان شاء الله
اكتر وقت ممكن تاخده فى الفرن 45 دقيقه
واول ما تستوى نخرجها فورا من الفرن وتقلب على منخل ونسيبها تبرد خالص
ولما تبرد
نبدأ نقطعها لثلاث اجزاء
وبعدين ابدأى على كل طبقه رشى قليل من الشربات لو عصير او السائل اللى بيكون مع الكمبوت فى العلبه ...انا عملت كده
وحطى شوية كريمه على كل طبقه وشوية كمبوت مقطعه واى مكسرات عندك
وفى النهايه نغلف الكيكه كلها بالكريمه
وهنا بقى جه دور حسك الفنى...كل واحده تبدع زى ما هى عايزه
انا كنت مستعجله وعملت بالكمبوت والكريز والكيوى الشكل ده
وحطيت بسكوت سيجار على الجوانب مع الشيكولاته الفورماسيل الملونه وربطهم بشريط دهبى رفيع
يارب اكون عرفت اشرح كويس وتكونوا فهمتم منى
ويارب تكون التورته عجبتكم
دى هديه منى ليكم يا احلى اخوات فى الدنيا
بس اللى تعجبه ما يقوليش شكرا ويسلم ايدك
ادعوا لى ربنا ييسر لزوجى عسرته ويفرج كربته ويرزقه من حيث لايحتسب
[
تعليق