تجربتى فى تخليص ابنائى من الكذب(تجارب تربوية)(تجربة قيمة)
السلام عليكم ورحمة الله
موضوع جميل كالعادة للكبار قبل الصغار
لان المربى قدوة لا يجب ان ينهى عن شئ وياتى بمثله
ربنا يجنبنا جميعا واولادنا الكذب
اول مالا حظت على ابنتى الكذب تقريبا على سن 4 او 5 سنوات
لما نقلنا لبيت العيلة ابنت عمها تقولها مثلا انا عندى كذا او بابا جابلى كذا
ترد وتقول وانا كمان عندى من غير ما يكون عندها
كان رد فعلى بسيط الصراحة لانى متفهمة الغيرة التى بين الاطفال
قلتلها انك ممكن تقولى انا عندى حاجة تانية جميلة برضه او بابا ان شاء الله هايشترى لى
وشويه شوية فهمتها هى وبنات عمها وعماتها ان ما ينفعش حد يغيظ حد بحاجة معاه
بس طبعا لا حياة لمن تنادى
وجاءت مرحلة الروضة
واول حاجة خدوها اغنية جميلة فيها ان ربنا بيحب الى بيصلى والكداب بيدخل النار
على الرغم من اعتراضى على هذه الجملة للاطفال
الا انها بدات تفهم ان الكذب حرام
واخذت ايضا حديث رسول الله صلى الله عليه وسلم المشهور عن الصدق والكذب
(ان الصدق يهدى الى البر وان البر يهدى الى الجنة .......)
ووضحت لها ان الكاذب يخاف من الناس اكثر من الله وربنا عزوجل لا يحب ذلك
وطالما المسلم بيقول الحقيقة اذن ربنا معاه وهينصره
حاولت افصل فى حكاياتها بين الخيال والكذب
اقعد اسمع منها وتسرح بخيالها كتير وبعدين تيجى تقولى ماما مش كل ده حصل
اقولها طب ليه قولتيه تقولى عايزة احكى معاكى
خلاص يا حبيبتى احكيلى بس اقولى فى الاول ان ده من دماغى
وخليتها قبل النوم تحكيلى قصة من تاليفها
حاليا (7 سنوات)مشكلتى معاها الكذب فى الهزار
تقولى حاجة توقع قلبى وبعدين لما اتخض تضحك وتقولى كنت بهزر
فى الاول الصراحة كنت بصرخ فيها
وبعدين فهمتها ان ده كذب وليس هزار او مزح لان الرسول صلى الله عليه وسلم كان يمزح ولايقول الا حقا
والحمدلله لم تعد تفعلها
واحيانا تيجى تقولى ماما انا قولت لصاحبتى فى الحضانة على حاجة وهى مش حقيقية
انا كده هدخل النار وتكون خايفة (جملة الحضانة زمان لسه فى دماغها)
اقولها لا ان شاء الله بس استغفرى ربنا واوعديه انك ما تكدبى تانى
الامورة التانية حكاية لوحدها
هى عندها اربع سنوات الحمد لله مش بتكدب الا فى موضوع واحد
لما تكون عايزة حاجة حلوة ويكون ميعاد الاكل مثلا اديها ساندوتش واقولها خلصيه الاول وبعدين اديك الكاندى
تروح تغيب شوية وتخبيه فى اى حتة وتيجى تقولى اكلته واديها الحلوى
وبعدين وانا بنضف الاقى الاكل اقولها ليه كده يا اسراء تكسف وما تردش
فهمتها ان ربنا شايفك وعارف انك ضحكتى على ماما وما تعمليش كده تانى
كتير الحمدلله بقول للصغيرة امام الكبيرة ما تضحكيش على ماما يا اسراء
شوفتى اروى ما شاء الله ما بتكدب على ماما
(وبكده اضرب عصفورين بحجر)
اتمنى ان افيدكم بتجربتى البسيطة هذه
واسال المولى عز وجل ان يرزقنا جميعا وذرياتنا حسن الخلق فى القول والفعل
.gif)
رد مع الاستدلال
كتبت بواسطة CHEROUK
الروابط المفضلة