الحقوني يا بنات ابني عنده اكتئاب ساعدوني من فضلكم
السلام عليكم و رحمة الله و بركاته
ازيكم يا بنات
انا مش هأطول
انا حامل في الشهر السادس و عندي مؤمن عنده 3 سنوات
المشكلة ان مؤمن مش قادر يتقبل ابدا فكرة وجود بيبي تاني و بيقول هيرميه من الشباك حاولت معاه أجيب له الحاجات اللي هو بيحبها وأقوله من البيبي
لما يعرف كده يرميها و مش يرضي ياخدها
هو بيروح مركز خاص للتخاطب عشان كان شوية حروف عايزة تتظبط و طبعا في متابعة سلوك و كشف شهري عند دكتور هناك متخصص في طب نفس الأطفال
المهم كنت نازلة يوم الثلاثاء الماضي أشتري شوية حاجات للبيبي و كمان لمؤمن طبعا و أخدته معايا عشان يختار حاجاته و كمان حاجات البيبي لقيته ساااااكت خالص و مش طبيعته و مش رضي ياكل او يشرب اي حاجة و لقيته بيقول ان الحاجات بتاعته هو كمان بتاعة البيبي مش بتاعته هو و زعلان جدا حاولت أقنعه ان دي بتاعته هو بس مفيش فايدة
المهم راح ميعاده للدكتورة بالليل و انا تعبت ف والده راح يجيبه لقيته بيقولي الدكتورة بتقول مؤمن مش طبيعي خالص خايف و بيعيط و بيقول ماما و بابا ضربوني مع ان انا و باباه مش بنضربه خالص لينا طرق تانية في العقاب طبعا باباه مش كان يعرف باللي حصل
المهم رحت امبارح اتكلم مع الدكتورة عشان الموضوع ده لقيتها بتقولي ان مؤمن بيمر بمرحلة نفسية صعبة جدا لأنه مرتبط بيا اوي و متخيل ان البيبي الجديد هياخدني انا و باباه منه و ده مأثر عليه و لازم اجي اشوف الدكتور عشان يشوف هنعمل ايه
رحت للدكتور قال هي دي مشكلة كبيرة لأن لو مش لحقناها دلوقتي هتبقي أكبر بعد البيبي ما ييجي و سألني ان كانت في حاجات جديدة حصلت قلت له ايوة هو بينام في حضني لسة و بقي بيصحي بالليل يعيط و هو نايم و يقول ماما عايز حضن و يخاف من اي حاجة او اي صوت و ده مش طبيعته خالص
المهم الدكتور كتب له دوا مضاد للأكتئاب لأنه كمان بيعمل بي بي بالليل علي السرير
و قال لازم يزيد نشاطه و يلعب و احنا هنا هنحاول نعرفه انه كل الناس بيبقي عندهم اخوات و ده عن طريق اللعب يعني بطريقة غير مباشرة
ايه رأيكم يا بنات
قلبي مقهور و مش بأنام خايفة علي مؤمن جدا
معلش انا طولت بس اعذروني
رد مع الاستدلال
.
الروابط المفضلة