ملف اكل مصرى صميم: حتى المصريين ميعرفوهوش

[ملك المالكى]

لا يا يحيى عمرى ما سمعت عن حاجة كدة

[ملك المالكى]

البامية:
اولا بامية بالصلصة معروفة طبعا "تسبيكة اللى هى بصل محمر مضاف له طماطم معصورة وبعدين تترك على النار حتى تتسبك ثم نضع فيها البامية وافضل طعم ليها لما بتتزود لحمة ضانى وشوربة ضانى وتتحط فى طاجن فخار وتغطى وشها بورقة فويل وسيبيها تستوى فى الفرن براحتها وبالهنا و الشفا
المفروكة او الويكا:
بامية خضرا نقطعها قطع ونحطها فى الشوربة مع فصين توم سليمين بدون تقطيع وقليل من الملح تترك على النار حتى تنهرس البامية او يعنى تستوى تماما وبعدين بالمفراك " وهو حاجة كدة خشب ذراع وفى اسفلها قطعه تشبه المروحة توضع فى الطعام ويتم لف او برم الذراع الخشبية للتقليب وممكن بمضرب سمى مضرب اليايى وهو مضرب حلزونى او حطيها فى الخلاط وريحى دماغك حتى تختفى قطع الباميا تماما وبعدين صبيها فى طبق وصبى عليها باقى سمن تحمير اللحم على الوجه
الباميا الناشفة:
باميه مجففة وبعدين نطحنها حتى تصير بودرة وبعدين تتعمل زى الملوخية الناشفة بالظبط لكن بدون طماطم يعنى نحمر توم وبعدين نحط البامية قليل جدا لانها بتتقل بسرعة وبعدين نحط عليها الشوربة و الملح ونقلب وتغلى غلوة واحدة فقط

[nano]

يمكن يحيي بتقصد الفايش او الرواني ولو اني بعتقد انة الفايش
انا بصراحة جربت اعمل الرواني مرة بس مطلعتشي حلوة قوي انا مدقتهاش قبل كدة بس كانت شوية ناشفة ومفرولة اتماسكت شوية لما ضيفت لها الشربات الي هو القطر

[nano]

في كمان الفولية الخضراء والفولية الحمرا بتتعمل من الفول المدشوش بتاع البصارة
علي ما اتذكر
الفولية الخضراء
بتجيبي بصلة مفرومة وتحمريها في السمنة لغاية ما يا دوب تصفر لونها ثم اضع عليها فول مدشوش واحط ليها شوية ماء لغاية ما الفول يستوي شوية ويتحط معاها معلقة ارز ثم يتحط عليها ثوم وكسبرة خضرا وشوية ناشفة وبعدين نعمل تقلية من الكسبرةالخضراءوالثوم ونضيفها عليهم
المهم الفول يا دوب يستوس مش تسيبوة لما يتهري زي البصارة لا يا دوب يستوي

والفولية الحمرا تقريبا زيها بس بنضيف لها صلصة طماطم والكسبرة تكون ناشفة مش خضراء

[ملك المالكى]

تسلم ايديكى يا نانو احنا بنقول على الفولية الحمرا دى الكسبرية بس الخضرا دى منعرفهاش
واذ كان يحيى قصدها الفايش انا عندى طريقته بس مجربتوش قبل كدة

[ملك المالكى]

مين يا بنات تعرف الخُبيزا
دى حاجة خضر شبه الملوخية ماكلتهاش من يوم امى الله يرحمها لان محدش فينا كان اتعلمها منها

[ملك المالكى]

البصارة او بيصارو "بالفرعونى"
ربع كيلو فول جاف بدون قشره
ربطتين كزبرة خضراء
بصلة متوسطة
عدد من فصوص الثوم حسب الرغبة
قليل من النعناع الجاف
ملح و فلفل حسب الذوق
- للتقلية عدد من فصوص الثوم مع كزبرة جافة او بصل


الطريقة:

- ينظف الفول و يضاف كمية من الماء كافية لسلقه , تضاف الكزبرة الخضراء و النعناع الجاف و البصلة و الثوم , يجب عدم وضع اى ملعقة اثناء تسوية الخليط لكى ينضج الفول و ندعه حتى يستوي تماماً .
- بعد تمام النضج , ندع المزيج يبرد قليلاً ثم يخلط بالخلاط .
- يعاد الخليط للنار قليلا و يتبل بالملح و الفلفل حسب الذوق .
- تتم عمل التقلية بالثوم و الكزبرة الجافة المدقوقين جيدا و يحمر فى القليل من الزيت و السمن ثم يزين بها وجه الطبق او يتم عمل بصل محمر "شبه المستعمل فى الكشرى " وهو الافضل و تقدم .

[ملك المالكى]

طاجن عكاوى
نشترى العكاوى وهى "ديل البقرة او الجاموسة" وعشان كدة بتبقى عبارة عن فقرات عظمية
نخليها نخلى العظم عن اللحم نسلق العظم عشان الشوربة واللحم نحمره مع بصل واى خضار تفضليه وبعدين شوية شوربة عكاوى السابق عملها وطماطم وصلصة طماطم وندخله الفرن وبالهنا و الشف

[nancy kareem]

اهلا يا ملك ازيك موضوعك جميل
انا مره كنت اكلت اكله بيعملوها الفلاحين بس هى حلوه عامله زى الكيك بيتقطع وبيبقى ناشف شويه
مش عارفه تقريبا اسمها الحلبه ياريت لو تعرفيها تقوليلى عليها

ايوة هية عاملة زى الكيك بس لونها بيبقى اصفر اوى و بتبقى ناشفة اكتر هبقى اسال عليها و انزلها لو عرفت

[nancy kareem]

انا نقلتلك طريقة الخبيزة يا ملك زى ما بنعملها بالظبط

الخبيزة على الطريقة المصرية


المقادير:
1/2 كيلو خبيزة
حزمة سلق
حزمة شبت
حزمة كسبرة
نص وعاء شوربة لحم
ربع كوب أرز
2 بصلة كبيرة
4 ملاعق كبيرة سمن
رأس توم مدقوقة

الطريقة:
يغسل الشبت والكسبرة ويقطع إلى قطع رفيعة جدا بالسكين ثم نضعهم على الشوربة على نار متوسطة.
نغسل الأرز واضعه ليسلق مع الشوربة.
تنظف الخبيزة جيدا (تقطف الزهرة (وتغسل وتُصفى ثم تُخرط مع السلق، أو نضعها على النار لتسلق مع السلق ثم نضربهم في الخلاط.
خذي الخليط وضعيه على الشوربة وبعد غلوتين وبعد أن نجد الخليط قد أصبح سميكا بعض الشيء نطفي النار.

الطشة:
نقشر البصل ونبشره بالمبشرة ونضعهم مع السمن في وعاء على نار متوسطة لتحمر.
بعد أن يصفر لونه ضعي عليهم رأس التوم المدقوقة
بعد أن يحمر الثوم ضعي عليهم الخبيزة (الخليط الذي تم صنعه سابقا)
ثم أقلب وأطفي.

[azmiralda000]

يسلم ايديكو يا بنات بس مش عارفة ليه ماحدش مشارك فى الموضوع غير المصريات حتى لو بالاستفسار او التشجيع
\انا كمانفى اكلات كتير ما اكلتهاش من يوم جدتى الله يرحمها توفت زى البصارة و الخبيزة
ان شاء الله لما اكلم ماما قريب على النت هسألها على طريقة الكشك و اشارك بيها فى الموضوع هنا ان شاء الله ولو حد عارفها ينزلها و اهو نستفيد كلنا مع بعض و جزاكم الله خيرا

[azmiralda000]

نسيت اقولكو عارفين اللوبيا اللى بعين سودا (نوع من البقول) فى ناس بتعملها بالصلصة لكن احنا بنعملها بالسلق زى القلقاس و بتكون تحفة هسأل ماما برضو ان شاء الله و انزلها

[نوشا]

ملف هايل كمللى ومتابعينك

[Om 7abeba]

تسلم ايديكم

[عروس الجنه]

ايه الجمال ده تسلمو يا بنات مصر

فكرتونى باكلات زمان

انا هعلق على المكرونه باللبن لانى من بحرى وبنعملها دايما




دى مكرونه مقصوصه بنسلقها ومنغسلهاش

وبعدين نغلى اللبن وندوب نشا فى كوبايه ميه ونضيفه على اللبن ونحط السكر والسمنه البلدى

وبعدين نجيب صنيه وندهنها سمنه ونضيف الكرونه على انشا باللبن ونقلبهم ونحطهم فالصنيه

ونحط مكسرات جوز هند وزبيب واى مكسرات عندك

وفوق الوش معلقتين سمنه وندخلها الفرن لحد متتماسك وتتحمر

وتتقطع بعد متبرد مربعات وبالهنا والشفا