وصفــــــــــــات شهيه متجددة بسعرات حراريه قليله ,,, وســــــــــام التميـز ,,,

[ROZALENDA]

عزيزتي homa
تكرمي حبيبتي طلبك على الطريق وجهاز المشي هوه احسن شي اشتريتيه بحياتك سدقيني انا لما اشتريته الكل قلي بكره بتستعمليه لنشر الغسيل بس سدقيني خلال سنه استعملته لحد ما اشتكى مني والحمدلله صرت من العدائين والبرنامج اللي بمشي عليه سرعته بتوصل 5,7 ميل في الساعه مع اني كان يادوب وصل لسرعة 3 مايل بيوم من الأيام فالحمدلله رب العالمين داومي عليه اوعي تركنيه على جنب والله يوفقك
الأخت العزيزه ام سميه
يا هلا نور الموضوع بوجودك والحمدلله اني مقتنعه بهالكلام لأني ما اقتنعت الا بعد ما تعبت كتير مع الريجيمات القاسيه وعمرها ما جابت نتيجه حقيقيه احسن نظام بالعالم هوه اللي انتي ماشيه عليه وان شاءالله لو مشيتي على نظام السعرات اللي كنت ماشيه عليه كتير بتلاقي حالك منظمه ومرتاحه مع الريجيم خصوصا اذا سجلتي الوجبات اللي بتقدري تختاري منها بدفتر خاص بتلاقي الريجيم صار ولا احلى من هيك اما عن بخاخ الزيت فبشتريه جاهز وعلى فكره اللي عندي سعراته الحراريه صفر بس ما كتير بحبه لأنه بخة الزيت جسمك بيحتاجها ممكن اذا ما لقيتيه تستعملي الفرشاه وتمسحي مسح خفيف جدا بها
أخت sho sho
الحمدلله انها اعجبتك عزيزتي وبتمنى تعجبك اكتر بعد ما تجربيها والله يوفقك مع الريجيم ويحققلك مرادك شكرا على الرد
أخت عاشقة الجنه
الله ينولك وينولنا الجنه قولي امين والحمدلله انها اعجبتك وبتمنى فعلا تجربيها وتجربي غيرها كمان ودمتي بصحة وعافيه

[ROZALENDA]

مجموعة وصفات اتمنى انها تعجبكم

السلام عليكم ورحمة الله وبركاته
أول وصفة بيعملوها عادة بشرائح صدور الدجاج بس انا من كتر الريجيمات وزهقي من اللحومات استبدلتها بالباذنجان حنزل اول شي طريقة الباذنجان وبعدها بكتب التغييرات اللي تعمليها لما تستعيضي عنها بصدور الدجاج حتي وصفة الباذنجان ممكن تعمليه مع لحمه او بدون
بسم الله نبدأ اول شي بدون لحمه
المقادير
باذنجان
بصل مفروم ناعم
طماطم متل العاده مخلوطه بالخلاط
جبنة موزاريلا او تشيدر قليلة الدسم
طبعا ملح ( متل العاده استغنيت عنه لأنه الجبنه فيها ملح ) بس اذا ما ببتحملي الاكل بلا ملح ما حتحتبيها بدون ملح هالمره فممكن رشه بسيطه
الطريقه
قشري الباذنجان نص تقشيره بشكل خطوط طوليه ثم قطعيه حلقات عريضه بخيه ببخاخ الزيت وحمريه بالفرن يعني شغلي الفرن من فوق بس وقربيه كتير ولما يتحمر اقلبيه على الطرف التي وحمريه من الجهه التانيه انا استغنيت عن بخة الزيت بهالخطوه وحمرته بدون شي ساده
صفيه بصينيه واعملي الصلصه كالمعتاد حمري البصل لحد ما تصير بني فاتح واضيفي الطماطم وسبكيها شوي على النار مع ملح وبهار
اضيفي من الصلصه فوق كل شريحة باذنجان ودخليها الفرن لحد ما تستوي وبعدين طلعيها ورشي الجبنه على الوجه ورجعيها خمس دقايق عالفرن من فوق بس وصحتين وهنا

طبعا ممكن تاكليها مع رز مسلوق او خبز او بدون شي
اما اذا حبيتي تستخدمي اللحمه المفرومه
اشوي الباذنجان بنفس الطريقه وحمري البصله بعدين اضيفي عليها اللحمه وقلبي لحد ما تستوي اللحمه بعدين اضيفي الطماطم وسبكيها وصبيها على البانجان وعالفرن لحد ما تستوي بس بهالحاله مافي داعي للجبنه لأنه اللحمه فيها بروتين كفايه وهي عملتي مسقعه دايت وممكن ايضا اضافة شرائح الفلفل بتطلع لذيذه طبعا موضوع الملح والبهارات بيرجع لذوقك
الطريقة الثالثه
كباب الباذنجان اللي بنعمله بسوريه وهو كالأتي للي ما بتعرف
حمري الباذنجان بالفرن كمان بنفس الطريقة
افرمي على جنب البقدونس مع بصله وااعجنيها مع اللحمه المفرومه وملحك وبهارك
اعملي صلصة الطماطم اللي ذكرتها سابقا طبعا بدون لحمه او ممكن تفرمي الطماطم وتستخدميها كصلصه عالوجه بدون اي طبخ مسبق
هلأ جيبي شريحتين باذنجان واعملي من اللحمه قرص متل قرص البرجر وحطي بالنص بين كل شريحتين وممكن كمان تقطعي الطماطم بالنص وتفرغيها شوي وتحشيها بنفس الطريقه استعملي لبها بالصلصه للوجه
رتبيهم بصينيه واضيفي الصلصه وسويها مع بعضها بالفرن وصحتين
سامحوني انا بالمقادير مو شاطره لأنه على حسب الكميه اللي بدك تعمليها ومنيح كتير اني عم اقدر رتب افكاري واكتب طريقه لأني فوضويه كتير من هالناحيه وعمري ما اتبعت طريقه بحذافيرها ولا حتى اتبعت نفس الطريقه مرتين دائما بغير من عندي على حسب المزاج
اما اذا قررتي تعمليها بصدور الدجاج
بتحتاجي
صدور دجاج مقطعه شرائح وممكن تنقعيها من قبل بيوم ببهار وليمون وبودرة توم على ذوقك ( بكره بصير اسمي روزاليندا على ذوقك )
حلقات فلفل اخضر او اي لون بدك
شرائح فطر
شرائح بصل
الصلصة اللي ذكرتها سابقا بدون لحمه وممكن هنا تضيفي الأوريجانو عليها بس خلي فيها مي كتير لا تنشفيها لأنه حتطول بالفرن
جبنة موزاريلا طبعا قليلة الدسم ( ممكن الاستغناء عنها )
الطريقة
بهري شرائح الدجاج وصفيها بصينية الفرن
اضيفي عليها الصلصه وفوق الصلصه شرائح الفلفل والفطر والبصل
دخليها الفرن وبعد ما يستوي الدجاج اضيفي الجبنه المبشورة ورجعيها كام دقيقه وبالهناء والعافيه
هي صار عندك اربع افكار لوصفات جديده يارب تعجبكم
ام مراد تابعيني عزيزتي راجعه بكره بافكار للحلويات ان شاءالله بتعجبك

[em morad]

ما شاء الله عنك صراحة زيك ما بشوف حتى المحشي اعملتيه بطريقة خفيفة وحلوة المهم بعيدة عن الرز او استخدام الرز بشكل بسيط الله يجزاك الخير والباذنجان صراحة انا بعمله دائما كطبقات في الصينية والحشوة بالوسط لحمة مفرومة وبندورة وفلفل وبيطلع زاكي اكثير وببرش عليه جبنة صراحة كفيتي وفيتي يا روز الدور والباقي على الحلويات محسوبتك بتحب الحلويات اكثير

[طيـــف]

مشاءالله عليكِ

جد مشاءالله مشاءالله


جد بسسسسسسسسسسسسسسس بدي اضللللللل اطلع في وصفاتك
ياريتك لو تشاركي رندوش في وصفاتك الشهيه للرجيم
رح تفيدي كتير الصبايا فيها

[ROZALENDA]

اخت ام مراد
الله يسلمك حبيبتي وان شاءالله كون افدتكم ولو بشيء بسيط والحلويات جايتك عالطريق
طيوف
تسلمي حبيبتي مرورك دائما كله رقه ونعومه مثل اسمك بس كيف ساعد رندوش بوصفاتها ؟ مافهمت اذا بقدر اعمل شي من هالعين قبل هالعين

[ROZALENDA]

بعض الأفكار حتى تحلي تمك وضميرك مرتاح

السلام عليكم ورحمة الله وبركاته
ام مراد شو رأيك بهالباي ؟

اذا عجبك اتفضلي الطريقه
المقادير
تفاحه مقشره ومقطعه شرائح صغيره
قرفه
خبز النان الأسمرساده طبعا او اي خبز اسمر بس يفضل خبز نان ( انا استخدمت الخبز الابيض لأنه ما كان عندي نان )
بديل سكر بني والكميه على حسب كيف بتحبي حلاوتها
الطريقه
ضعي شرائح التفاح بالمكرويف دقيقتين مو اكتر او بالفرن حوالي خمس دقايق الغايه انها تدبل بدون ما تستوي عالأخر
طلعيها من المكرويف ورشي عليها قرفه وبديل السكر واحشيها بخبزة النان وبعدين على النار بخي المقلاه ببخاخ الزيت وحمريها من الطرفين وخلص صارت جاهزه ( اللي عندي بالبيت رشو عليها عسل واكلوها )
انا اخدت من التفاح المخلوط بالقرفه بعد ما برد واكلته مع فنجان القهوه سدقوني لذيذ كتير حتى بدون ما تعمليه باي بس مهم كتير يكون برد او ممكن تحطيه بالبراد
اما الموز اللي بالصحن فهو كالاتي
اقسمي الموزه بالنص بشكل طولي ( على فكره ما اسودت بالعكس لونها كان بيفتح النفس بس انا رشيت عليها قرفه )
امسحيها مسح بعصير الليمون ورشيها ببديل السكر البني وشغلي الفرن من فوق وحمريها شوي وانا بعد ما طلعت رشيت عليها قرفه لأني بحب القرفه كتير اذا ما بتحبي القرفه ممكن تستغني عنها حتى مع التفاح
طريقه حلو ثانيه
المقادير
لبن قليل الدسم
بديل السكر
قرفه
فانيليا
شرائح تفاح صغيره ضعيها في الفرن او المكرويف كما في الوصفه السابفه
الطريقه
سهله جدا وبعتقد واضحه من المكونات
اولا اخفقي اللبن بالسلك مع بديل السكر والفانيليا او ممكن تستعملي ملعقه صغيره سكر سعراتها الحراريه 35 سعر حراري فقط لا غير يعني ما حتأثر كتير
اضيفي القرفه واخلطي بالسلك بعدين شيلي السلك من ايدك وابعديه من وشك حتى ما تغلطي وتستعمليه لأنه بدك تضيفي شرائح التفاح وتحركي بدون ما تكسريها
كتير مهم انه التفاح ما يكون استوى كتير لما شويتيه يعني يادوب يدبل بس حتى ما يتغير لونه لأني مبارح اشتهيت الحلو وحطيته بالمكرويف دقيقتين ونص طلع مستوي كتير وما حبيته
ممكن تستعملي مع هالوصفه اي نوع من انواع الفاكهه بس معظمها ما بدها شوي ضيفيها على اللبن بعد ما تخلطيها بالخلاط مثلا الأناناس والفراوله بس للأمانه الأناناس مره اضفته لجبن الكوتاج صارت طعمها مر كتير وما قدرت اكلها ما بعرف السبب بس عاللبن ما جربت ضيفه

طريقه ثالثه
وهي اسرع واسهل شي وكتير ظريفه ايام الصيف
ضعي اي نوع من انواع الفاكهه بالخلاط مع قطع تلج وبديل السكر اذا بدك تكون حلوه انا بحط قرفه مع التفاح ما تكتري التلج يعني لو قطعة فاكهه وحده مكعبين تلج بتخيل انه كفايه اخفقيها بالخلاط وقدميها بكاسات شكلها حلو
مع الفراوله بتطلع لذيذه جدا وهي كمان بتنفع للي اولادها بحبو الايسكريم بس اضيفي شوية سكر وانا بستعمل للاولاد سكر بني على الاقل مغذيه ومفيده والأهم بتعرفي مكوناتها يعني خاليه من هالمواد الكيميائيه اللي بيدخلوها على أكلنا والله العالم بأضرارها سدقوني اجتني كيكه جاهزه هديه قريت مكوناتها لقيت فيها 25 ماده كيميائيه ما قدرت اكل منها ولا اكلها لأولادي ورميتها مع اني ما برمي اكل بالزباله بس صراحه ما قدرت هالمره والله يسامحني يارب
ما ننسى عزيزاتي انه لما عم نعمل هالحلويات احنا بدنا ناكلها ونستمتع ونخسر وزن بنفس الوقت يعني ما تتوقعو طعمها يكون متل حلويات ستاربكس مثلا
هي اأفكار الحلو اللي حضرتني اليوم وبوعدكم كل ما بلاقي شي جديد ومفيد بضيفه بس بتخيل بموضوع منفصل حتى ما تضلو تقلبو وتدورو بين الصفحات

[مانو]

مشكوره روزا على هالأفكار الرائعة

الله يجزيك الخير

[/LEFT]الحقيقة أطباقك كلها متميزه ورائعة

[Homa]

بسم الله الرحمن الرحيم

السلام عليكم ورحمة الله وبركاته


مااااااااااااااااروعك

عملت اليوم الباذنجان وكمان الايسكريم اللي بلفواكهه روعه

وجيت تاني لقيت الحلويات الرهيبه وخطططططططططططيره

تسلم ايديكي ووووورجليكي كمان

عندي وصفات صحيه من كتاب اسرار التغذيه مع كارلا عملت منهم حاجات رهههههيبه

لكن عندي كاميرا بتاعت الكمبيوتر ومش عارفه احملها كيف

[rhf55]

وصفات رجيم

بسم الله الرحمن الرحيم

السلام عليكم ورحمة الله وبركاته

وصفة جدا مفيدة جزاك الله

[em morad]

الله يسلمك يا احلى روز صراحة كقيتي وفيتي انا غلبتك معاي بالحلو بس منيح خليتك تخترعي اشي جديد بس بياخذ
العقل الله يسلمك يا رب كل اشي من تحت اديكي بيطلع زاكي اكيد بس اليوم عندي عزومة بس مش رح اسوي شغلات فيها روجيم ما انت عارفة قدام الناس بدنا انسوي اشي وشويات

اما فطيرة التفاح لازم انجربها لانه انا بعملها بس لزوجي واولادي وانا ما بقدر اقرب عليها من كثر ما فيها سعرات حرارية عالية بس فطيرتك تحفة رح انجربها اذا شاء الله

[إخصائية تغذية]

تسلمين الغالية على المجهود الرائع

وننتظر المزيد

[قطة شامية]

ييييييييييييييييييييييييييييييييييييي والله ما انتبهت أنك حطيتيلي البيتزا

بتعرفي الجمعة بدي جربها انشالله

شكرا ياحلوة

بس وين الأكلات الجديدة؟؟
شو طابختيلنا اليوم؟؟؟؟؟؟

[ام سمية]

روزا اليوم عملت مسخن ...وللاسف الشديد لم يتبق منه شيء
عمر ابني اكل بنهم ...وانا اشاهده مش مصدقة عيني ..لانه مش اي اكلة بياكلها...وبناتي ايضا وزوجي ...بصراحة كانت وجبة ممتعة ولذيذة ...واهم شي ما كنت اقول على الاكل (كلوا...خلصوا الصحون) لانهم اكلوا صحونهم وطلبوا المزيد ...الله يا رب يسعدك يا روز
روز بدي اسألك شو هو الماسالا؟؟؟
وتسلم ايديك

[قطة شامية]

روزي ؟؟ أنا بحب كتييييييييييييييييييييير الملوخية وكذلك العمو تبعي.. ومتل مابتعرفي كتير بدها تقليب بلسمنة أو الزيت يعني بتطلع دسمة
عندك شي فكرة لحتى نخفف دسمها.. وطبعا متل مابتعرفي كمان الشوام بيطبخوها ناشفة يعني ماعم تجيني ولافكرة لتخفيف دسمها

شو بتقترحي؟؟

بعدين وينك أنت؟؟
اشتئتلك


طيف كمان مو مبينة....

[مانو]

عزيزتي قطة شامية بعتقد أنو بقدر أفيدك بالنسبة للملوخية من بعد أذن الغالية روز أنا بعملها وبتطلع خفيفة كتيييييييييييييير أنا عن نفسي بعملها مجففة وناعمه من شان هيك مابتحتاج كتير سمن بتقلايتها بالأول بحط نصف ملعقة سمنة وملعقة زيت ذره وبقلي الكزبرة والتوم(بالتأكيد مارح تستغني عن هالكمية البسيطة من الدسم لأن مافي طريقة تانيه لتقلايتهم) وبعدين بحط الملوخية الناعمة وبحمصهاوبالتحريك المستمر لأن إذاتركتيها لحظة وحده رح تلتدع (لأنها مافيها دسم )وطبعآعلى نار هادية وأكيد رح تتأخر لتصير بس صدقيني بالأخير رح تطلع كتير لذيذه وخفيفة و بس تخلص تحميص بتتركيها جانبآ 10 دقائق لتبرد شوي بعدين بتحطي مية الفروج و(طبعآبتشيلي الطبقة الدسمة ياللي على وجه المي )وإذا بدك حطي مكعبين ماجي للنكهة بتطلع واوياسلام بتاكلوا أصبيعكم وراها على قولت أخوانا المصريين وبالهنا والعافيةو أن شاء الله تعجبك وإذاعند الأخت روز طريقة تانية بكون زيادة الخير خير