@ @ ( مسابقه تحدى نفسك ) الفريق الثالث @ @

[yehia2007]

ازيك يا سوفه عامله ايه يا جميل
انا حبيت اقولك اخبارى مشيت النهارده كويس زى م قولتلك
وكله تمااااااااااااااااام

[sefo2]

صباح الخير يا سمسم وصباح الفل يا نور يا قمر عاملين اية ؟
انا امبارح مشيت كويس عارفة اتغديت اية عملت كبدة مشوية وسلطة اهو تغيير شوية عن المعتاد بس بليل فرحت اوى نزلت اشوف لبس ليا المهم لاقيت مقاسى نزل نمرة ههيييييييييييييييييية كنت سعيدة بصراحة حسيت ان فية امل ان شاء اللة .......
انهاردة بئة شربت نسكافية عشان افوق شوية وكلت بيضة مسلوقة اما الغدا جمبرى مشوى وسلطة و3 معالق رز والعشا زبادى وتفاح

[yehia2007]

صباح الخير يا سوفه على فكره انا كتبتلك بالليل شوفى ردى وانا نايمه الساعه 6 الصبح طبعا من نووووووووووووووور
ومبروك على النمره ههههههههههه برافو يا سوفه
النهارده انا لسه مش عارفه اكل ايه انا صحيت علشانك وداخله انام بس ابقى ادخلى فى اى وقت وانتى تعرفى
بااااااااااااااااااااااى متخفيش مش حلبخط

[reowesh]

حبايبى وحشتونى وحشتنونى وحشتونى
اذيكم يا قمرات وايه اخباركم ها خسيتم اد ايه ؟؟؟؟؟ قولوا متخبوش
انا بقه يا قمرات الحمد لله ماشى على الرياضه كويس جدا وحاسه بتغيرات جذريه والحمد لله فى شكلى بقى احسن من الاول
وحاسه ان فى مرونه فى جسمى وعلى طوووول عاوزة اتحرك غير الاول خالص والحمد لله
اما الرجيم بقى فا الصراحه مش ماشيه عليه اوى بس كويس الحمد لله
مش بلخبط اوى
ربنا يقدرنى واعمل رجيم كويس واستحمل ادعولى يا بنات
انا خلاص جبت عفش الشقه فاضللى الرافيع وتنظيف الشقه والستائر وكدة
ان شاء الله قربت اخلص ادعولى يا احلى بنات
وسلامى لاحلى كتاكيت
سلالالالالالالالالالالالالالالام

[yehia2007]

ياااااااااااااااااااااااااااه واخيراااااااااااااااااااا هنننننننننننننننننننننننند معقوله انا مش مصدقه عينيه وحشتيييييييييييييييينا احنا خلاص كنا فقدنا الامل فيكى انا قلت دى اكيد فى شهر العسل هههههههههههههه

ربنا معاكى يارب والف الف مبروك وعقبال عفشى انا كمان يارب

شدى حيلك كده فى الرجيم علشان تتجوزى رششششششششيقه لاحسن العريس وبعدين
واحنا مش ناقصين يقول علينا ايه

















ازيك يا سوفه عامله ايه يا جميل احب اعرف ان سمسم شاطره اوى وامبارح باه فطرت على الساعه 11واكلت جبنه بالخيار مع عيش سن ونمت وعلى الساعه 3 ونص العصربصراحه مش فاكره اذا كنت اكلت حاجه خفيفه كده ولا لاء المهم على الساعه 8 المغرب كان الغدا صدر فرخه مشويه مع حبة مكرونه وسلطه وعلى الساعه 11 جعت اكلت تفاحه
ايه رايك باه استاهل ايه

النهارده باه لسه مش عارفه حفطر ولا حنام واتاخر واتغدى على طول المهم انا عندى من امبارح فراخ عاملاها فى الفرن ومكرونه لانى طابخه بالليل نور قالبالى يومى الفتره دى ممكن اكل صدر فرخه واكتر من السلطه وعلى العصر تفاحه وعلى العشا كورن فليكس مع اللبن وربنا يسهل نفسى الاسبوع ده انزل نزله كويسه امبارح كان نفسى فى الحلو بس لا والف لا انا مستنيه علشان لو نزلت حكافئ نفسى يوم الخميس بالحلو
قوليلى يا سوفه هو سيف طلعتله السنان من امتى وامتى قال ماما وبابا فى اى شهر.
يلا احكيلى انتى عملتى ايه امبارح واخبار جارتك ايه نفسيتها بقت احسن دلوقتى لما قرت الردود

[sefo2]

هنننننننننند اخيرا شوفتى من فرحتى بيكى عمالة اتنطط هههههههههه مبروك ياقمر وعقبال ماتمليها كتاكيت



سمسم اية ياستى الشطارة دى بس ربنا معاكى ونور عاملة اية ؟ بوسيهالى كتير الشقية دى
انا برضة امبارح كنت شاطرة بس خرفت الصبح عمالت سندوتش جبنة فلمنك فينو كمان بس زهقت وقلت اكسر الملل بالهبل هههههههههههههه بس ناوية ان شاء اللة اتغدى فراخ مشوية وسلطة آآآآآآآآد كدة
شوفى يا ستى سيف مشى الاول كان عندة 6 شهور بينقل على الكراسى وكدة اما السنان بدأها عندة 9 شهور وبدأت معاناة السنان والعيا كل شوية لما الدكتور كان بيستنانى لما اتأخر يسأل علينا هوا ههههههههه
اما جارتى دى يا سمسم صعبانة عليا أوى دا عندى طفل ولما فكرت بحمل تانى وتأخر كنت زعلانة وانا معنديش حاجة الحمد للة مابالك هيا ومشكلتها انها حاسة ان السبب فيها مع انى بقولها دة كل شىء بأمر اللة وليها معاد تجيب فية طفل للدنيا وساعتها قات لجوزى ناس حتتجنن على طفل وناس تقول نأجل الحمل البنى أدم دة غريب

[yehia2007]

هو فعلا فى اطفال بيمشو من 6 شهور يا ريري اصل انا حاسه ان نور حركتها بتزيد وساعات بحس انها عايزه تقوم امبارح لاحظت كده بس مره واحده بس
بالنسبه لجارتك ربنا معاها يارب بس مش تحط الموضوع فى دماغها اوى علشان ماتتعبش هى تشوف دكتور شاطر وتعرف السبب وتتعالج وتسيبها على ربنا
اما عن الحمل انا كمان ساعات بزعل من نفسى اوى لما بقول مش عايزه اخلف تانى ده حتى ماما لسه اول امبارح بتقولى يلا انزلى حامل باه وسيبيلنا نور وخليكى مع التانى قلتلها لاااااااااااااء خلاص كده كفايه خلينا نقدر عليهابس والحمدلله وقبلها بيوم كنا خرجنا وقابلت مراتات صحاب جوزى ولما اتكلمنا فى الموضوع ده برده قلتلهم لاء وامبارح لما بقول لجوزى على ماما ضحك بس انا قلتله نفس الكلام بصراحه بضايق بعدها من نفسى لما بقول كده وبستقغر ربنا وبقوله سامحنى يارب انا مش قصدى بس انا عارفه الوضع دلوقتى ميستحملش عندنا اقساط وسلفه الولاده لسه مخلصتش ولسه الشقه متفرشتش ونور مصاريفها كتير ولما تكبر كمان حتزيد وانشاء الله عايزه ادخلها لغات وانتى عارفه المصاريف ازاى ودلوقتى الحمل والولاده والتربيه والدراسه مش زى زمان رخيص لاء دلوقتى الحياه ناااااااااار يعنى علشان يبقى معاكى طفل وعايزه تعيشيه فى مستوى كويس وتعلميه كويس وتلبسيه كويس وتعمليله مستقبل كل ده ازاااااااى فى الغلا صعب يادوب تقدرى على واحد فهمتى قصدى والسبب اللى انا مش عايزه تانى مع انى من جوايا ساعات ببقى نفسى بس لما اسيب عاطفة الامومه وافكر بعقلى بقول لاء تعرفى انا نور كلفتنا ولادتها 15 الف ريال يعنى فوق العشرين مصرى هنا كل حاجه غاليه قيصريه ونور كمان نزلت تعبانه وحطوها فى الحضانه 3 ايام مش قادره اقولك المصاريف فهمتينى

[sefo2]

اوعى يا سمسم تقولى مش عايزة تانى لحسن انا كنت بقول كدة اول ماجيت وكنت بدعى انى مش عايزة اطفال تانى عشان موضوع الغدة وكنت خايفة لو حملت على البيبى اللى ممكن يجى بس لما ابتديت افكر فى الحمل بعد ما ما ماقالتلى سيبيها على ربنا واقنعتنى بأن ربنا هوا الحافظ للبيبى وللحمل وكدة لما تأخر الحمل كنت زعلانة ولحد دلوقت بس خلاص اتفقت مع جوزى نأخلر الحمل عشان هو رأية زى كلامك الولاد والمصاريف واحنا فغربة عشان الفلوس وطفل تانى يعنى مصاريف وكنا متفقين انى لو حملت حنزل مصر ومارجعش تانى النيا هنا غالية اضعاف مصر ودة السبب اللى مخلية رافض حمل دلوقت عشان مايقعدش لوحدة فرصة بئة لاقى اللى يعملة طلباتة هههههههه

[yehia2007]

هههههههههه ربنا يخليكو لبعض يارب لا ده انا جوزى عايز يدخل نور مدرسه هنا بعد ما كان بيقول لما ييجى معاد المدرسه تسافرو تقعدو فى مصر احسن دلوقتى غير رايه طبعا كمان هنا اللغات غاااااااااااااالى نار يعنى معنى كده حياتنا حتبقى طول عمرنا اللى تقبضه نصرفه على العموم احنا نخليها على ربنا ومنقولش حاجه ربنا اللى كاتبه حنشوفه خير ولا شر احسن حاجه بعد كده الواحد ميتكلمش فى الموضوع ده ويقول لاء واه نقول ربنا يسهل وخلاص وربنا يرزقنا بالخير يارب من اوسع ابوابه ومحدش عارف فرج ربنا ايه

[sefo2]

شااااطرة يا سمسم اللى ربنا كاتبة حنشوفة يا ما ناس بيحملو وهما مستعملين وسائل لمنع الحمل ودى ارادة ربنا وربنا يكتب الخير لينا ولاولادنا

[sefo2]

صباح الفل يا سمسم اخبارك اية ونور حبيبتى عاملة اية ؟ اخبار الشطارة اية ؟؟ انا امبارح كنت شاطرة بس مش عارفة لية بقالى يومين بقوم من النوم جعانة وعايزة اكل المهم انا فطرت جبنة فلمنك وكوب شاى بلبن وكمان شوية حاخد تفاحة والغدا تونة بس عارفة من امبارح فعلا بحس بجوع بش ماليش نفس بمجرد ماحط اكل عشان اكل احس انى شبعت بس الاقى بطنى بتوجعنى وجع الجوع قلت يمكن برد او زهق برضة

[yehia2007]

ههههههههههههههههههه هو اكيد زهق طبعا كلنا زهقانين
معلش اتاخرت عليكى النت عندى بطئ من الصبح مع انى صاحيه من بدرى بيفتح الصفحه فى عشر ساعات المهم اخبار واخبار سوفه ايه ونور يا ستى كويسه الحمدلله مجننانى مش عارفه ليه اليومين دول مش بتنام الا الساعه 6 الصبح لما خلاص حتجنن ومفيش فايده فيها مهما تقولى حاولت معاها انها تنام تصحى تانى ههههههههههه
المهم انا امبارح اتغديت على طول من غير فطار الساعه 1 اكلت صدر فرخه مع طبق سلطه كبير
وماكلتش تانى لحد الساعه 8 لانى صحيت العصر وقعدت انضف شويه ونسيت الاكل المهم بالليل اكلت طعميايه ونص صغيره وحبة فول مع اقل من نص رغيف سن وبعدها كم حبة عنب صغيرين وبلحتين انا عارفه ملخبطه شويه بس بصراحه العنب اغرانى جماله ههههههههههههههه والبلح بس مرضيتش اكتر منه
النهارده برده لسه مفطرتش ادينى بعمل الغدا وعلى الساعه 1 او 2 اتغدى لحمه فى الفرن مع شوية رز وسلطه وانا دلوقتى بشرب ميه لحد الغدا
وباقى اليوم فاكهه

[yehia2007]

صباح الخير يا سوفه
ازيك وازى سوفه يارب تكونو بخير
انا مشيت امباح زى م قلتلك بالظبط بس بالليل لما جعت اكلت ربع رغيف سن مع شوية فول
النهارده باه
انا دلوقتى اكلت شوية كورن فليكس من غير لبن وحشرب ميه للغدا
والغدا
صدر فرخه مع الخضار وشوية رز وسلطه
العشا
احتمال الخبط لانى خارجه وحشترى كيك كنت اشتريت منه الاسبوع اللى فات وعجبنى
وقلت الخميس الجاى حجيب منه تانى
طفاسه باه هههههههههههههه
وامبارح كمان جت الدوره بس اتوزنت لقيت نفسى نازله كيلو
كان نفسى انزل كيلو تانى بس مش مشكله
وانتى باه اخبارك اييييييييه
انا حدور على بيت نتكلم فيه وحستناكى هناك اوعى تتاخرى

[sefo2]

صباح الفل يا سمسم عاملة اية ونور الشقية عاملة اية
انا امبارح كنت ماشية كويس لحد بليل جوزى وهوا راجع من المكتب تحفنى بسندوتشات طعمية اكلت واحد وبصراحة كنت عايزة اطافس واكل واحد كمان بس مسكت نفسى
انهاردة انا لسة شربة نسكافية وحاكل جبنة قريش مع واحدة توست والغدا عندى بوظان محشى وفراخ
واكيد مش حتعشى كفاية مية
ولسة وزنة نفسى لاقتنى نزلت 600 جرام يلا حلوين احسن من مافيش
انا حجيلك البيت

[yehia2007]

صباح الخير يا سوفه عامله ايه يا جميل وايه اخبار عريسنا القمر
انا يا ستى يوم الخميس اتغديت حتة فرخه مع سلطه وشوية رز وعليهم لحد الساعه 7 ونص بالليل اكلت جنه بالخيار مع ربع رغيف عيش سن وعلى الساعه 1 بالليل بيضتين مسلوقين مع نص رغيف عيش سن
ويوم الجمعه الصبح بدرى على الساعه 5 الفجر شربت سفن دايت واكلت بسكوت بالشوكولاته وكيك طبعا بوظان بس مش مشكله اخر الاسبوع باه
وماكلتش حاجه تانى الاالساعه8 المغرب اتغديت مكرونه وفراخ فى الفرن مع سلطه وعلى الساعه 10 بالليل شربت سفن وكيك وبسكوت وشكراااااااااااااااا بس لما طلعت ع الميزان دلوقتى هو نفس الكيلو اللى انا نازلاه يارب ننزل اكتر الاسبوع الجاى
نبتدى باه تانى من يوم السبت انشاء الله وربنا يقويناعايزين نشد حيلنا اكتر يا ريرى الاسبوع ده
الصبح باه لما تصحى اكتبيلى تقرير ييوم الخميس والجمعه اكيد بوظان مش حيبقى زييى مقلتليش كنتى عامله محشى ايه ولا حتى عزمتينى عليه يا وحشه هههههههههههههههههه