الي الاخوات الليبيات(الحلويات الليبيه )

**juri** · 24-12-2005, 12:53 PM

السلام عليكم
معلش نبي نطلب من الاخوات الليبيات نبي منكم وصفات لحلويات مع القهوه بس الحاجات الجديده لاني نبي انديرهم لصحبتي اماراتيه وهي تعجبها الحلويات الليبيه واجد بكل ارجوكم نبيهم ابسرعه بشرح المفصل معلش نتعبكم معاي.
مع اطيب التمنيات

**بنت طرابلس** · 24-12-2005, 06:49 PM

اهلا اختى
انت بس قولى شنو تبى من حلاوات و انا جاهزه

**juri** · 25-12-2005, 08:39 AM

مرحبا بنت طرابلس

شكرا والله خليكي.انا نبي الانواع الجديده الي انت اتشوفيهم حلوات ونزيكات ابعتيهم لي يعني اخر صيحه وانا نعرف انا في طرابلس انواع اتجنن, لان في فرح اختي جبنا حلوياتنا من طرابلس . والله باريك فيك

**بنت طرابلس** · 25-12-2005, 05:46 PM

لسلام عليكم

هادى يا اختى طريقة العبمبر
عرفتيه الى ايديروا فيه فى الاعراس .......و تقدرى تعمليه فى البيت ....و طريقته ساااااااااااااااااااهله
و يطلع متل الجاااااااااااااااااااااهز

المقادير:

2 كوب سكر ناعم , بياض اربعة بيضات , فانيليا , مايعجنه من جوز الهند ,

الطريقة:

نخلط السكر وبياض البيض والفانيليا بالمضرب الكهربائى ثم نضع فوقه جوز الهند ونعجن عجينة متماسك

بعد دلك ناخد العجينة بالملعقة ونضعها فى القوالب الصغيرة المعدة للكيك حتى لايلتصق بالصينية او نضعه على ورق زبدة ونخبزه فى فرن هادى حتى لايحترق ونحمره من الاعلى حتى يصبح لونه دهبى ونتركه ليبرد/ ملاحضة / ممكن نعمل نفس المقادير وبدل جوز الهند لوز مطحون............... وبالهناء
و اتمنى ان تعجب جارتك الاماراتيه

**ماريا قواتالوبي** · 25-12-2005, 07:27 PM

المقادير: كوب متوسط الحجم زبدة

2/1 الكوب زيت

ملعقة صغيرة بيكيج باودر

3 ملاعق سكر ناعم

2/1 كوب عطر

دقيق ما يجعلها متماسكة

الحشو اي نوع من الالواز(احمراو ابيض) تحمسيه شوية على النارتم تهروشيه شوية بحيت يقعد كبير تم تضيفي القليل من السكر المرحي و الدقيق و العطر باش يتماسك اللوز بعد ما يطيب ...

طريقة العمل: تاخدي قوالب السلة وتحطي فيها العجينة بحيت تكون الطبقة متوسطة لان يزيد حجمها في الكوشة و تحطي فيها الحشو وتحيطها في كوشة نارها هادية و تردي بالك منها علي خاطر فيسع مااطيب و ما تحمريهاش هلبة بعتالي تبرد شوية و تعسليها بالعسل الطبيعي ...

وصحيحتين تاكليها بالهنا

واي سؤال تفضلو مش حنبخل بالاجابة..

و عندي هلبة اكلات تو انشاء الله نكتبهم...

هي سلامات

**مصراته** · 25-12-2005, 10:34 PM

السلام عليكم ورحمة الله وبركاته
شوفى هدى صورة السليله وطريقة عملها تلقيها فى الرابط الى تحتها
http://www.lakii.com/vb/showthread.p...E6%CA%ED%E1%C7
وانشاءالله حنحاول نكتبلك طرق اخرى
وهنا تلقى طريقة غريبة الزبيب وشوى حلويات تانيه
http://www.lakii.com/vb/showthread.p...E1%ED%C8%ED%C7

**juri** · 26-12-2005, 09:29 AM

بسم الله الرحمن الرحيم
شكرا واجد ماشاء الله عليكم وربي يخليكم .

بنت طرابلس شكرا تعرفي كنت ديما خاطري نعرف كيف اديرو ا في العبمبر وتوه انجربه وانقولك شنو النتيجه.
وان شاء الله يعجب صحبتي.

شكرا مارياقواتالوبي على السليله. والاخت المصراتيه شكرا كيف متقولوا انتوا هلبه (واجد)

.

نبي نسألكم سؤال كيف اتخشوا على الهدرزه الليبيه.

تحياتي
كل عام وانتوا بخير

**ماريا قواتالوبي** · 26-12-2005, 11:07 AM

انت تامري امر يا juri اولا تخشي المنتدى بعدين تخشي ركن السياحة و السفروتلقي الهدرزة الليبية ...
يلا عاد انراجو فيك باش اتشاركينا
بالسلامة

**juri** · 26-12-2005, 11:36 AM

شكرا ماريا قواتالوبي و اكيد راح نتقابلوا

**حنين 79** · 30-09-2007, 10:35 PM

الله يبارك فيك

انتقلت منتديات لكِ النسائية إلى هذا الرابط:
منتديات لكِ النسائية
هذا المنتدى للقراءة فقط.

الموضوع: الي الاخوات الليبيات(الحلويات الليبيه )

أدوات الموضوع

العرض