بانسبه لكنب النتريه ينظف بنفس طريقه السجلد للعسوله ايمي ومامتها بس بنمسك قماشه مبلوله ماء علي خفيف نشطف بها اثار المسحوق عشان نحافظ علي عمر السجاد والانترييييييييييه

اختى egyptian شكرا ليكى انى المعلومات اللي عندى عجبتك فعلا هى دى نفس الطريقة بالظبط وفعلا ماما عامله قماشة مخصوص بتمسح بيها السجاد زى ما قولتلا بالظبط هى والله عالملاها قميص بيتى معدش بيتلبس ودة معروف انه بتاع السجاد والانتريه بردة بنفس الطريقة بالظبط بس لازم الواحده لما تيجى تنظف ترتب افكارها انا عارفة ان هنظف بكرة يبقا باخد المارش كلها اغسلها الاول والورود والاشجار اللي في البيت والدباديب والحاجات دى واجيب سبت الغسيل التحف كلها امسحها واحطها فيه عشان لما اجى افرش تبقا كل حاجه نظيفة وبعدين ابقا عارفة هبدأ منين انا دايما ببدأ اول حاجه اوضة اوضة وببدا كل اوضة بالشبابيك الاول الاول تنظيف من التراب وبعد كدة انا بغسلهم بصراحه والسلك والزجاج بمسحه لكن الشيش بيتغسل ولازم كل يوم انظفة بالفرشاة بيفضل دايما نظيف والتراب مايدخلش الشقة ياةةةةةةةةةة فكرتونى بايام مصر اصل انا مغترية يالا عايزين تواصل بقا كدة ونكمل

بالنسبة لليحطان عند ماما كنا نغسلها غسيل كدة السفنجة وبعدين شطف لكن عندى لالا يادوب جردل فية شوية مياة وتايد وقماشة وامسح وبقماشه ناشفه بعديها علطول ولازم قبل مانبدأ فى الحيطان نكون هبينا السقف بالهبابه مش انتوا عارفينها ولا لألألألأ لو ليها اسم تانى قولولى والاوضة اللي اخلصها افرشها واحط المعطر فيها واقفلها لحد ما اخلص الشقة واوصل للركن بتاع الحمام والمطبخ وغالبا المطبخ ببقا عاملاه قبل الشقة بيوم او يومين ودايما اهم حاجه ياجماعه قبل ماتبدأوا تنظيف اى قطعه لازم تكونى نزلتى التراب اللي عليها لأن لو حطيتى مياة وكان فية تراب عمره ما بينظف كويس وبيسهل عليكى وبردة لازم القماشة الناشفة بعد ما مسحتى بمياة عشان التطويس وتلاقى خطوط كدة بعد ما الحاجه تنشف طولت عليكوا بس انا قاعده افتكر ايام ماكنت بنظف شقتي هنا الشغل بسيط وسهل قوى

ازيك ياايمي انا بعمل كده بس لازم عالاقل مرتين تلاته فالسنه اغسل الحيطان بالميه والشقه تغرق وكده
برده الواحد بيحس بالتغيير
كمان السجاجيد بعملهم بنفس الطريقه بس بليفه خشنه لان انت عارفه العيال بيوسخوا زياده فكل خميس بعملها كده وممكن تتغسل غسيل بقى مرة كل شهرين تلاته

السلام عليكم يا بنات
اية التجمع الجميل دة شكرا على دعوتك يا سيستر
شكرايا قمر
جميل اوى جيتوا على الجرح انا بموت فى النظافة وبموت فى ريحة النظافة وريحت الجاز والفنيك والحاجت دية بجد تحفة وكنت بحب اعمل كل حاجة بايدى بجد بس للاسف انى دلوقتى مش بقدر زاى الاول ظهرى تعبنى موت وعرق النساء تعابنى موت الحمد لله
جربت من كام يوم قلت انظف بنفسى كل يوم حاجة اعدت اسبوع وطلع عينى ونمت فى السرير يومين لانى عملت بضمير وتانى بس مت بجد الحمد لله
بحاول اعمل بايدى بس على فترات انا مشكلتى انى كنت بغسل السجاجيد فى الشهر مش اقل من مرتين بجد وحماتى الف رحمة عليها كانت تقولى كدة غلط صحتك هتروح فى العمايل بس مفيش فايدة لحد ما الحمل والولادة كملوا عليا
الحمد لله
معلش طولت عليكم بس ان شاء الله نشتغل مع بعض للحفاظ على نظافة المنزل ان شاء الله انا معاكم قلبا وقالبا

الف شكر لدعوتك الكريمة لى بالاشتراك فى هذه المجموعة
يااخت سيستر
ويكفى اننى ساكون مع هذه المجموعة الجميلة من الاخوات العزيزات على قلبى
وديننا يحثنا على النظافة فى ابداننا وملابسنا ومنازلنا وكل مايحيط بنا لان
النظاااااااااااافة من الايمان

السلام عليكم بجد مجموعه جميله جدا وانا بحب النظافه موت فقلت ادخل بينكم ونفيد بعض واتمنى تقبلونى بينكم

يااااااه ازيكم يا بنات فكرتونى بالشقة وعمايلها
لسه عاملاها من اسبوع بس إيه بضمير قوى قوى والصراحة مش باقدر اعملها دلوقتى لوحدى
ربنا يكرمها زوجة خالى بتساعدنى فيها كتر خيرها المهم الواحد زماااااااااااان كان يشيل ويحط عند ماما كل اسبوع
دلوقتى خلاص بقى راحت علينا......... الحمد لله
بالنسبة للحيطان احنا بنغسل بليفة اسفنج بتاعة المواعين خشنة شوية بس مش بتجرح الحيطة وبعد كده ندلق فى الميه ونعوووووووم
معلش طولت عليكم بس احسن حاجة ان احنا نشجع بعض

سلااام عليكم ... ازيكم يا حلوين كلكم ... يارب يكون الجميع بخير ... الف سلامة عليكي يا لولو ربنا يشفيكي ويعافيك يااارب اللهم امين
ايمي يا حبيبتي ...بجد جزاكي الله خيرا ...معلوماتك كتير حلوة ... ومفيدة بجد انا بعمل تلاتربعها وكمان كنت عند ماما كدا ... بجد تسلم افكارك يا قمر ... افدتيني والله كتير ... وانا زي ما قولتلك فعلا بقيت احط فويل على البوتاجاز ... وان شاء الله هابقى اجيب الفرخ المخصوص ليه ... وواهم حاجة داخلة دماغي موضوع الجاز دا ونفسي اجربه وفعلا ان شاء الله هاقول لجوزي وهوا جي مرة يجيبلي جاز ... اكيد هيستغرب ... بس مدام دي الحاجة اللي بتشيل الدهون وبتفرق كدا ما شاء الله زي ما بتقولي ... وان شاء الله برضو هاجرب موضوع البخاخة دي زي ما انت قولتيلي...انا كمان اصلي بموت في ريحة الديتول والفنيك والنظافة والصابون والكلور ... بجد بستريح نفسيا جدااااااااا لما بشم الريحة دي ....
وفعلا موضوع الحيطان دا ماما بتعمله والفرش كمان انها بتغسله على الناشف زي السجاجيد ... الف شكر ليكي يا قمر على اهتمامك ... ومعلوماتك ومجهودك ...جزاكي الله خيرا ... ربنا يرزقك ان شاء الله من حيث لا تحتسبي ياااارب اللهم امين ...انت وبقيت الاخوات يااارب جميعا يااااارب اللهم امين ....

يا بنات هي الحيطان كلها كده ولا المدهونة زيت لها حاجة مخصوص والبلاستيك حاجة تانية
أنا عندي بلاستيك بس بخاف اجي ناحيته بالمية بصراحة بكتفي بمسحه على الناشف وخلاص وأنا ابني لسه صغير مش بيبهدل الدنيا على الحيطة لسه هو يدوبك بس مخرب لي سجادة اوضته

سلام عليكم
ماشاء الله على التجمع الجميل ده
بس في حاجة عايزة انبه عليها انا كنت سمعت قبل كدة ان استعمال الفنيك بيؤدي إلى فشل كلوي والعياذ بالله وبصراحة من ساعتها وانا بطلت استعمله انا اصلا قلبت عليه الدنيا هنا في السعودية مالقتوش بس بجد انا سمعت تحذيرات منه ياما بس من باب الريحة الحلوة هاحكيلكم حكاية
سبحان الله الي يروح الحرم بيشم ريحة حلوة قوي وهي الناس بتنضف فعلا ريحة بصراحة عجبتني في الاول كنت بقول سبحان الله ربنا مخلي ريحة الحرم حلوة قوي سبحان الله ومرة في مرة بقيت ابص على العمال وهما بيمسحوا لقيتهم بيحطوا مع مية المسيح تايد وديتول بسسسسسسسسسس
تايد وديتول مع مية المسيح وفعلا انا لما بقيت امسح بيهم فرحت قوي لما ريحة الحرم بقت عندي في البيت بجد جربوها مش هاتندموا

فرح
انا حاسة بيكي لأني كنت زيك بالظبط ان ماكانش ذيادة
لا اضحكي كمان مرة لقيت فرح بنتي بتجري ورا صرصار هي عندها دلوقتي 10 شهور ساعتها كانت 8 تقريبا لقيتها بتحبي بسرعة فجيت ابص عليها لقيتها بتجري ورا صرصار وهو التاني بيجري منها ههههههههههههههه
بس هي الحمد لله دلوقتي راحت من عندي بعد عناء طال حوالي سنة وجرربت فيها كل ما يخطر على بالك لدرجة اني كنت احيانا لمما اجي ارش انضف المطبخ كويس وارش بايجون رش وبف بفباف رش وبودرة بايجون وبودرة بف باف وعجينة صراصير ومبيدات رش تتتخيلي ومع ذلك برده كنت بلاقيها بتتفسح زي ما بتقولي ومرة طلعت الي في المطبخ كله كله كله برا في الصالة وقعدت حوالي اسبوع كل يوم ارش الخلطة الرهيبة دي قلت علشان لو الصراصير ماتت اول يوم وتاني يوم بيض فقس يبقى يموت من الرش بجد كان بلاء لدرجة كنت بروح الحرم وادعي الصراصير تروح من عندي تتخيلوا واقول لجوزي ادعي الصراصير تمشي كان يقعد يضحك عليا
بس مارحتش إلا لما مرة من المرات كنت في محل اسمه باوزير مشهور في اللسعودية كان فيه ركن للمبيدات فلقيت علبة صفرا كدة مكتوب عليها ان ريحته حلوة بتجذب الصراصير ريحته ريحة اكل لا واكل حلو كمان تتخيلي اول مرة وانا بحطه في الاركان بقول لجوزي ده ريحته حلوة قوي ادوقه ؟؟
المهم بعدها بحاجة بسيطة ناس نصحونا بنوع مبيد هو زي المبيدات بتاع الزرع مش عارفة فهمتيني ولا ايه احنا جبناه من هنا من جدة مش عارفة انتي مقيمة فين بصراحة بس اذا تحبي اسالك جوزي على العنوان اجيبهولك ان شاء الله
وادعي ربنا يخفيهم من عندك معلش طولت عليكي بس قلبتي عليا المواجع الله يعينك عليهم ان شاء الله

لولو حبيبي ربنا يارب يشفيكى من عرق النسا لأن عارفة المه النفس المطمئنه كلك زوق ياقمر والله دعوتك اثرت فيا ولكى بالمثل سودة انا اعرف ان اليلاستيك انواع نوع بيتغسل ونوع لألأ فانتى جربى فى حيطة تكون مدارية كدة وحطة صغيرة وشوفى النتيجه ومادام نضيفة ياستى متعذبيش حالك رونا لو انتى فعلا عايزة تحسي بريحه الحرم قوي فى البيت حطى فى الحوض بتاع الحمام حبة نفتالين متتخيليش ريحتة بتخلى الحمام قد اية جميلة وفعلا نفس ريحة الحرم انا كمان بحط النفتالين فى السيفون برفع الغطا واحط 3حبات وكل ما تشدي السيفون تلاقي ريحه حلوة وكمام يابنات لما تيجوا تغسلوا الحمام انا يوميا بغسلة ومرة فى الاسبوع بغسل السيفون من جوا واحط شوية تايد ونفتالين وبحط اتنين فى شبكة صغيرة واعلقها تحت الحوض فعلا ريحه الحمام بتبقا خيال علطول ومجرد انك بتشمى ريحة النظافة بترتاحى والله ربنا يعطينا جميعا الصحه والعافية ونخلى بيوتنا جنه باذن الله هاييييييييييييييييي وييييييييييف منورة ياقمر يارب يخلصك من الصراصير على خير يارب يافروحة وربنا يقلعهم وينتقم منهم لانهم بيأرقوا الناس انا خايفة يحطونى ف دماغهم هههههههه ريدانه ربنا مايحرمنا من افكارك ويخليلك زوجة خالك طالبه منكم طلب ادعولي ربنا يرزقنى زرية صالحه تقر بها عيني يارب العالمييين خلاص ست سنين قاعده ف الغربة لوحدى لما خلالالالالالاص هطق يارب افرغ عليا صبرا

ايمى اهلا بكى انت منورة المنتدى بصراحة

ربنا يكرمك يا ايمى يا رب وان شاء الله على السنة الجاية يبقى البيبى فى ايدك يا رب وتفرحى وتفرحينا ان شاء الله
حبيبتى
افكار جميلة اوى
يا سلاممممممم على النظافة امبارح اول ما قريت موضوع دة سخنتونى وانا عند ماما روحت مروقلها شقتها واتهد حيلى
طيب كنتوا سخنتونى انا فى البيت لسة هروح اقوم على شقتى انا كمان هههههههه