مختفيه اهلا بيكي
تيتي ازيك
ام نور اكيد حلوة كمان ان المكعبات نعملها كده
منكم نستفيد يا قمر

ازيكم ياستات ياقمرات
معلش انا مش موجوده اليومين دول اصل الاولاد تعبانين ومش عارفه اسيبهم
المهم بالنسبه لموضوعنا
بالنسبالي يمكن مشكلتي زي فرح ان عندي 3 سنين وعشر شهور
جوزي بينزل 7 الصبح ويرجع 8 او 9 بالليل
الاولاد كمان بيصحوا بدري
بقوم بفطرهم بعدين بفرشلهم اللعب واسيبهم يلعبوا وابدا الشغل احيانا وده قليل ببقى سايبه مواعين من اليوم الي قبله فبغسلها واروق المطبخ واطلع حاجه الغدا واسيبها تفك بعدين ابدا فالشقه
غرفه النوم بعدين الصاله وبقيه الشقه انا عندي لازم امسح الشقه كل يوم لان في مباني بتتبني حواليه فدايما الشقه بترب او بيكون فيها تراب علطول بروق وامسح من فوق الوش وفي عندي يومين بشيل الكنب والكراسي وكده الاتنين والخميس بالليل
يوم الاتنين بجيب شغاله والخميس بعملها انا علشان اخفف ضغط عليه شويه
كمان لان العيال فالسن ده مبتتهنيش على توضيب ولاحاجه
بعد كده بتبقى مثلا الساعه 11 بقعد مع العيال شويه وعالنت شويه بس مش كتير
بعدين بعمل الغدا واسيبه وبالليل عالتسخين
احيانا كتير بيبقى اكل الاولاد مختلف عن ابوهم خصوصا الصغير
بالنسبه للخضار انا بجبها مرتين فالاسبوع على قد الاسبوع نفسه واللحمه بجبها كل شهر لانه حسب وقت فراغ جوزي اما الفراخ اسبوعيا
كل اسبوعين مثلا انا وحماتي بنجيب قفص طماطم للصلصه ونقسمها ونسبكها وعلى الفريزر
وبخلي بطرمان في التلاجه
واعمل شويه مكعبات في قوالب التلج على قد المكرونه
التلاجه بتتنضف مرة كل اسبوع
السجاجيد كل اسبوع بعمل شويه ميه مع صابون وافركها من فوق الوش مش بغرقها واحطها فالشمس ساعه بتنشف علشان تفضل علطول نضيفه لان الاولاد بيعملوا معاهم الواجب
المحشي لمابعمله بعمل حلتين
وحده بسويها كامل والتانيه نص سوا ولما تبرد بشيلها فكيس فالفريزر
كده الرز مش بيكسر
ولما احتاجها اطلعه واكمل سواها
كمانالحواوشيبعمله واحطه فالعيش وعالفريزر
البطاطس بعمل شويه بقطعهم صوابع واسلقهم شويه وافرزهم علشان لو اتزنقت فمرة الاقيهم
معلش هكمل مرة تانيه لان ابني بيزن هشوفه وارجعلكم

وطبعا غالبا مبلقيش وقت لنفسي لاني على اخر اليوم ببقى خلصت

بالنسبه للبيتزا انا خالتي كانت فاتحه مشروع بيتزا من البيت وكانت بتفرد العجينه في الصواني ومجهزة حاجتها بمجرد مالطلب ييجي تروح مطلعاها وفارشه عليها الحاجات وفي الفرن عدل
وانا عاوزة اجرب افرزنها بالحاجات الي فوقيها حتي الموزاريلا لان انا كنت بشتري بتاعت ساديا كده وكانت بتكون ظريفه

ويبي الله يكون في عونك والف سلامه علي اولادك

شكرا نايس ربنا يخليك

كمان عندي حاجه بعملها قبل رمضان
بركز قوي على تجهيز اكلات مختلفه علشان يبقى عندي وقت وكمان لان بيكون المجهود اقل لان غالبا برمضان ببقى ياحامل يابرضع
فهمتي على قدي
بعمل كبيبه واشيلها فلفريزر
همبورجر نص سوا ولحمه مفرومع مع بقدونس وبصل وبجهزها لداوودباشا
بنقع بقوليات واسلقها
بعصج لحمه للجلاش او المكرونه بالباشميل وفالفريزر
كمان حشوة القطايف بعمل كميه واشيلها واعمل شربات كميه واشيلها فالتلاجه
البقدونس والشبت والكرفس بغسلهم ونشفهم والفهم في ورق علشان بيقوا جاهزين لسلطه او محاشي
والصلصه اجهزها وفالفريزر
ده غير المحشي والحواوشي
كده بيبقى كل شيء جاهز بس عالتطبيق
ومبياخدش مني وقت كتير

تسهيلا للعمل ..لما بكون باعمل كنافه فى رمضان بازود الكميه وافركها كلها بالسمن ...استعمل جزء واحفظ الباقى فى كيس محكم الغلق ...وقت الاستعمال يادوب تفك وابدا اشتغل فيها .....بتكون رائعه
ونفس الحال بالنسبه للقطايف ..تحفظ محشيه جاهزة ومنها على القلى مباشرة وهى مجمدة

يفضل حفظ الصلصات فى الفريزر فى برطمانات زجاجيه

السلام عليكم ممكن ياجماعة تقبلونى معكم واستفيد منكم وشكرا

اليكسس روعه بصراحه بس المشكله في حجم الفريزر اظن ان الواحد كده محتاج لفريزر اضافي

اهلا بالاخت مختفيه
والاخت هندام البيت بيتكم اتفضلوا معانا
ان شاء الله تستفيدوا ونستفيد جميعا
بيبى حبيبتى الف الف سلامه عالاولاد
ان شالله القطه السوده الوحشه وهما لا

مساء الخير يا بنات
انا لسه اللى شايفه الموضوع وحابه اكون معاكم يارب تقبلونى فى المجموعه الحلوه دى ويارب اقدر افيدكم واشارك معاكم دايما

اهلا اماني ومختفية وهندام معانا يارب الكل يستفيد
نايس
انا فعلا دلوقتي بحاول اخلي حبيبة تشيل مكانها اللعب عشان اما تبهدل ما تبهدلش قوي صحيح بتعد سنة على ما بتشيل، واروح انا لامة عشان قلبي بيوجعني بس اهوه حاجة والسلام، ربنا يعينك على ولادك يارب

ام الحلوين
ربنا يعينك ويعني يااااااااااااارب ويقدرنا على المجهود دة

ام نوووووووور
انا فعلا بروجرامي زي ما بتقولي
بقوم اعمل الفطار وافطرهم واما جوزي بينزل بحط لهم اللعب في اوضتهم يا اوضة المعيشة واغسل المواعين واطلع حاجة الغدا واروق عشان بالليل يبقى العمايل على الخفيف والاكل بسسسسسسس
بس طبعا برضو ما يمنعش ان الشقة بتتنكش ودي تبهدل هدومها ودي مش عارفة تعمل ايه مورستان يعني الله المستعان يارب
هو من رحمة ربنا ان انا مش رايقة في ستات يعدوا يعملوا في الحاجة عشر ساعات وانا بكره كدة حتى من قبل ما اخلف كنت دايما اول باول اخلص اكل يبقى مافيش طبق في الحوض، ناكل اشيل برضو نفيس النظام، وبوضب كل حاجة وانا واقفة ، يعني مرة يوم وقفة عرفة جوزي اتصل الساعة 3 وقال جاي على الفطار مع اني كنت سالته الف مرة قبلها على نظامه قال مش هينفع
رحت مطلعة بطاية وسلقتها ومن شوربتها عملت طبق ملوخية كنت مخرطاها ومفرزاها وحلة محشي ورق عنب صغيرة وشوربة، لانه قاللي انا جاي افطر بس عاوز حاجة كدة جامدةةةة ههههههههه، والحمد لله فطرنا في المعاد

اهلا بيكى ياامانى تنورى كلنا اسرة واحدة واخوات وال موجودة ترحب بالجديد
وان شاء الله تتبسطى معانا ونستفيد من بعض
وردة مصرية انتى كمان واحشانى اوىىى وازى جوجو
نور الهدى ههههههههه اهلا وسهلا بيكى ياقمر تشرفى والنهاردة كان عندى سمك مشوى
وانتى عارفة ال فيها الاولاد مش بيكونوا مبسوطين والله سايبينه متفصص فى الاطباق (وطبعا كانت مسؤليتى التقشير والمصمصة لانهم للان ميعرفوش يقشروا السمك ياكلوه متفصص عالجاهز)عارفة ابنى النهاردة موتنى من الضحك لما لقى الغدا سمك قالى ياماما انا قربت تطلع لى زعنفة هههههههههههههه
يابنات بالنسبة للطماطم المتسبكةالمتفرزنة لانى عمرى ماعملتها طعمها مش بيكون متغير ؟؟؟؟؟؟؟؟؟؟
نايس كانت بتسال عن المكرونة ال بالبشاميل
انا يانايس لما بيتبقى من المكرونة بشيلها فى الفريزر كام يوم كدة واطلعها جنب اكل اليوم ده وعادة بيكون فراخ وشوربة او فراخ مشوية بتلاقيها زى الهدية بدون تعب بتطلعيها تفك وبعدين تحطيها تتسخن بتكون زى الطازة تمام
لكن كون اشيلها نية مجربتش ولو حد جربها يقولنا
سعيدة انى معاكم واشوفكم على خير لتكملة باقى التجارب والاخبارالمجربة
رغم اننى ارى ان جميعكن شطورات واستاذات وماتقومون به فى عديد من الاشياء هو نفسه مااقوم به بل استفيد منكن رغم اننى اكبركن (سنا بالطبع وليس مقاما)

يا ينات عندى مفاجاه حاااااااااالا
انتظرونى