شوفى يا اليكسس بالنسبه ليا انا حعرض نظامى عالاخوات
طبعا انا بستعين بشغاله نظرا لظروفى اللى انتى عارفاها ولكن سأعرض نظامى بدون شغاله
وده النظام اللى كنت ماشيه عليه وان شاء الله سأكمله بعد الاستغناء عن الشغاله وده مرتبط بحاله ذراعى
نعود للموضوع
جدولى كالاتى
يوم الاربعاء بعد المغرب زوجى غالبا بينزل انا بشيل ستاير البيت والمفارش واحطهم فى الغساله
والمشايات والسجاجيد الصغيره بنقعها فى ماء ومسحوق وكلوركس للالوان

وامسك دواليب الملابس اروقها وطبعا لما بيكون ترويقها اسبوعيا بتكون لازالت مترتبه يعنى مبتاخدش منى وقت كبير وكمان برتب دواليب المطبخ وبغسل الثلاجه واغير ورق البوتاجاز
وارتب ددولاب النيش فى الريسبشن وانضف النجف من التراب وانفض الشقه كويس جدا جدا
واسيبها على حالتها كده وطبعا قبل ما انام بنشر الستاير والمفارش واغسل المشايات وانشر كل الحاجات
يوم الخميس الصبح لما زوجى بينزل هوه ونور بلم الغسيل بتاعنا واحطه فى الغساله
وببدأ فى مسح الشقه كلها بالكلور والديتول وتكون الستاير والمشايات نشفوا
اخلص مسح وافرشهم وطبعا لازم يكون عندى اكل بايت من يوم الاربعاء علشان الوقت
والساعه تيجى 12 او 1 الضهر الشقه تبقى الحمد لله فل ومترتبه
وبعد الغدا اغسل المواعين وانشر الغسيل
وبالليل نخرج ونتفسح او اروح سوق الخضار اشترى خضار بكميات علشان احطه فى الفريزر غالبا بيكفينى عشر ايام او اسبوعين
وطول الاسبوع بصحى الصبح ارتب البيت بعد ما زوجى ينزل واطلع الاكل اللى حعمله وطبعا بيكون متنضف ومتفرزن يعنى بيوفر عليا وقت كبير
اقدر اقعد عالنت او اختم القران
ده نظامى اتمنى نسمع نظام الاخوات ونستفيد

طبعا يا ميرو اهلا بيكى
اتفضلى معانا

ام نور
ايقاع جميل ومنظم لتنظيف وترتيب البيت يوفر الوقت والجهد خلال الاسبوع مما يتيح لك الفرصه لادا العديد من المهام الاخرى على اكمل وجه
ممكن تكلمينا عن نظامك فى التفريز واعداد التتبيلات

توفيرا للوقت والمجهود بالنسبه لى
بشترى الخضار بكميات يعنى مثلا الطماطم كذا كيلو
اسبك جزء منها عادى واوزعه فى اكياس كل كيس على قد الطبحه اللى تكفى يومين
وجزء تانى اسبكه بالبصلواحط عليه توابل المحشى من غير الخضره واكتب عالكيس انه تسبيكه المحشى علشان يوم ما افكر اعمل محشى اطلع الكيس واحط عليه الرز والخضره واحشى بسهوله
واحتفظ بكام طمطمايه جامدين اوى للسلطه طول الاسبوع او العشر ايام
لما بروح سوق الخضار ببقى عارفه طبعا زوجى وبنتى بيحبوا ايه وغاليا ببقى عارفه خلال العشر ايا حطبخ ايه
يعنى ازود فى الباذنجان مثلا علشان حعمل مسقعه
اجيب كرنب علشان المحشى او تشكيله باذنجان وكوسه وفلفل برده للمحشى
بالنسبه للكرنب اول ما برجع من السوق بجهز الطماطم زى ما قلت وكمان اسلق الكرنب واقطعه واحطه اكياس فى الفريزر
لو فيه قلقاس برده اقطعه واغسله واعبيه اكياس
وهكذا
اجيب سبانخ او فاصوليا او اى خضار يتعمل ومهم يبقى يوم فى الاسبوع نوع بقوليات
طبعا بجيبها من السوبر ماركت فاصوليا او لوبيا او او
طبعا البصل والبطاطس والجزر استهلاكى ليهم كبير فبجيب كتير منهم علشان يكفونى

ممكن كمان تحضرى خلطه القلقاس .بافضل تكون غير مطحونه واطحنها وقت الاستخدام نتيجتها بتكون افضل وبتسهل كتير جدا
ممكن كمان تجهيز صوص البيتزا فى برطمان زجاج فى الفريزر ...بيريح جدا

طبعا الطرق دى بتوفر عليا كتير فى الوقت والتفكير لان مجرد التفكير فى حطبخ ايه واخذ قرار كمان بيرهقنى جدا وتخيلى بقى اختى
بعد استقرارك عالوجبه اللى حتطبخيها شوفى كمان عناء نزولك لشراها او اتصالك بالسوبر ماركت يبعتلك الطلبات وغالبا بتكون مخالفه للى انتى عوزاه
انما الطريقه بتاعتى دى بتوفر عليه كتير يعنى اصحى الصبح اطلع كيس اللحمه وكيس الخضار والتسبيكه واسيبهم يفكوا وعالضهر ابدا فى تجهيز الاكل فى اقل من نص ساعه
ايه رايكم
اتمنى سماع باقى الاراء يعلى استفيد وتستفيدوا معايا اخواتى

ايوه يا اليكسس بعمل خلطه القلقاس واشيلها فى الفريزر ووقت عمله بطلعها واطحنها
تتبيلات المشاوى بصراحه
بخليها طازه اول باول

تتبيل الاسماك والبانيهات بيسهل كتير جدا
لكن بافضل تتبيل الكفته فى يومها
فعلا كدة عندك حق الوقت هايتوفر ويديكى فرصه لحاجه تانيه محتاجه وقت

صبا الخير على الجميع(ام نور. الكس .ميرو)نظامك يا ام نور فعلا مميز وانا باتبعه باعتبار عندى اطفال فى المدارس والخميس اجازة فالاربع والخميس بيكونوا عندى مخصصين لتنظيف الشقة وغسل الملابس وعمل اصناف من الطعام تحتاج لوقت اطول وطول الاسبوع بيكون مقتصرعلى ترتيب بسيط للشقةووطول الاسبوع كل الوقت بيكون فى متابعة اولادى فى الدراسة وطبعا عمل الوجبات اليوميه
وباطبخ 3مرات تقريبا فى الاسبوع لانى دايما باعمل الاكل ليومين

وفى نقطه كمان بتخلينى طول اليوم متفرغة لاولادى اكتر من اى حاجة تانيه وهى انى باستغل الوقت اللى بعد نزولهم فيه للمدرسه فى عمل الاكل وترتيب الشقه لانى مش من النوع اللى بينام بسرعة ولقيت انه وقت ضايع فاستغليته فى ذلك وخصوصا ان زوجى بيرجع البيت الساعةواحدة ونصف

للاخوات اللى سالوا ام نور عن عمرنا واليكسيس
انا اليكسيس هنا لانى سجلت هنا الاول .لما حبيت اسجل فى منتدى فتكات ابنى طلب انى ادخل باسم عمرنا (مشتق من اسمه) وماحبيتش ازعله وفعلا الاسم اتقبل هناك بسرعه .فكرت اغير اسمى هنا يبقى عمرنا برضه بس انا كمان باحب اليكسيس
بالتالى انا هنا اليكسيس وهناك عمرنا .....

اما بالنسبه للتجهيز المسبق للاكل
اول حاجة باعصر كميه من الطماط واصفيهاواغليها فقط مع نقطة زيت واحفظها فى برطمنات فى التلاجه تحت مش فى الفريزر بكميه تكفى من اسبوع لعشر ايام
ودى طبعا بتسهل عليا عمل جميع اصناف الخضار والمكورنه
كمان باعمل صلصة البيتزا واعبيها فى اكياس على قد كل مره واحتفظ بيها فى الفريزر
وايضا كل مره اعمل فيها بشاميل اضاعف كميه الدقيق والزبده ولما يبردوا احطهم فى اكياس ووقت الحاجة اضلعم واضربهم فى الخلاط مع الشوربه والحليب ودى اسهل طريقة لعمل البشاميل

انت فين يا ام نور والكس

صباح الخير على الجميع
خايفه انسى حدا منكم
بس يا اليكس مجهمود كبير انتى وام نور
والتوفير مش اكل بس لكن اشياء اخرى كتير
وطبعا انتى ذكرتيهاااااا
نظامك حلو يا ام نور وعجبنى
انا تقريبا بقلب الشقه يوم الخميس والبنات فى المدرسه
علشان باقى اليوم نخلص الهوم ورك واخرجهم جمعه او السبت
بيكون محتجين يفصلو الدارسه والاجازة
بس مش شرط حديقه غاليه يعنى مره دريم بارك
واخريات حديقه الازهر والفرق فى السعر معروف
وساعات نروح عند امى او عماتهم
انا بنزل كل يوم اوديهم المدرسه لاقيت خضار عجبنى وسعر حلو بجيب منه وانظفه واحطه فى الفريز
طبعا برتب الشقه كل يوم واجهز الغداء قبل الساعه 1.5 ظهرا
بعد الغذاء ببداء رحله الغذاب
قصدى الواجبات وقيبل لو دخلت المطيخ عملت فيه حاجه
بسبهمم
بس حاسه ان مفيش وقت لى انااا للاستمتاع بيه لنفسى
حاسه انى فى دوامه حتى دخول النت بقى قليل
لان عقبال هما ما ينامو على 8 او 9 باليل بكون انا هلكت لانى بصحى من 6 الصبح
فان شاء الله استفيد من خبراتكم فى الوقت

اهلا شخبوطه يارب تكونى بخير انت وبناتك
فعلا وجود اطغال فى المدارس بيفرض علينا سلوك تانى لحاتنا ربنا يقوينا