فطير بالموز**فطير بالتفاح **فطير بالقرفة
السلام عليكم اخواتى فى الله يارب تكونوا كلكم بخير و بصحة جيدة
ان شاء الله النهاردة هنعمل مع بعض
فطير خفيف حلو و سريع و بسيط
و هيكون محشى موز و تفاح و قرفة او زى ما انتى بتحبى من الفواكه
و فى ناس بتسميه المطبق لانه فعلا طريقته زى ما تكونى بطبقى تيشرت مثلا ههههههه
المقادير
3 كوب دقيق (بيعمل 6 فطاير صغيرة )
رشة ملح
2 معلقة كبيرة سكر
ماء دافء للعجن حوالى (كوب بس ممكن يزيد او يقل على حسب نوع الدقيق
زيت مع زبدة سايحة لدهن طبقات العجين
الحشو
*قرفة مع سكر
*موز مقطع ترنشات مع رشة قرفة (القرفة هنا اختيارى)
*تفاحة كبيرة مقشرة و متقطعة و هنحطها على النار مع معلقتين سكر
و معلقة قرفة و نقلب لحد المية او الصوص اللى فيها يروح و تكون
زى المربى تقريبا
*و ممكن مكسرات سودانى و زبيب و جوزهند
الطريقة
**هنحط الدقيق مع الملح مع السكر مع الميه و نعجن كويس حوالى 10دقايق لحد مع تكون العجينة مطاطية ملساء و مش بتلزق فى ايدك.
*و هنسبها ترتح 10 دقايق ( ممكن تستغنى عن الخطوة دى)
*هنكور العجين على حسب الحجم اللى انتى عايزاه و نجيب طبق او صنية
مدهونة زيت و نرص كور العجين فيها ويكون كور العجين كمان متغلفة
بالزيت و تتغطى و تسبيها ترتاح نص ساعة
· بعد ما رتاحت هتجيبى السطح اللى هتفردى فيها العجين و تدهنيه زيت عشان تتفرد معاكى بسهوله
· الاول هنفرد كور العجين بسيط بايدينا و بعدين نكمل فردها بالنشابة خفيفة و شفافة
(( انا هنا فردتهاو دهنتها بالزيت و الزبدة و بعدين اخدت الجنب اليمين و تنيته او طبقته و اخدت الجنب الشمال و تنيته و بعدين حطيت الموز مع رشة القرفة
و بعدين تنيت او طبقت جمب و دهنته و بعدين جبت الجمب التانى و طبقته عليه بالشكل ده و دهنت وشه كمان
اما بالنسبة لحشو التفاح و القرفة فاختلاف بسيط فى انه انا هنا فردتها
خالص و بعدين حطيت التفاح فى النص عشان اقفل كل جوانب العجينه
** و بعدين اكمل تطبيقه او تنيه و مننساش ندهن بين كل طبقة والتانية عادى لحد ما يبقى بالشكل ده
** هنجيب صنيه و هندهنا زيت بس و هنحطها تسخن على البوتجاز
على نار متوسطة حوالى 3 دقايق و بعدين اهدى النار خالص و احط
الفطير بتاعى و لما يحمر من تحت اقلبه على الناحية التانية لحد
ما يحمر
** و بعدين تغطيه شويه عشان مينشفشى منك
و ممكن لو تحبى تحطى عليه شيرة او شربات يكون بارد طبعا
و الفطير سخن و تغطى علاطول و ممكن ترشى عليه سكر بودة
عند اكله مباشرة او لو مش هتكليه فى وقتهايبقى تحطى عليه سكر بودرة لما يبرد و ممكن متحطيش عليه لا شربات
و كلتها و هى سخنة من غير شربات و لا سكر
و ابو يحيى عجبته حشوة القرفة بالسكر
و يحيى مازن اعجبو جداااابحشوة التفاح و انا رشيت عليه
سكر بودرة
و ياااارب يعجبكوا انتو كمان وان شاء الله قريب هنزل الفطير الحلوبالكاسترد
احبكم فى الله
الروابط المفضلة