ازيكوا يا بنات اخباركوا ايه؟؟
انا بقى لى زمان مشاركتش فى المنتدى بس دى بسبب ظروف بلدنا اللى بتخلينا نتابع الاخبار كل لحطة مش كل ساعه
المهم كنت عايزه اخد رايكوا فى موضوع
ادهم ابنى دلوقتى عنده سنتين وشهرين ولقيت ان دى سن مناسب ابدا اعلمه الحمام وخصوصا الجو بدا يدفى شويه والحمد لله لقيت عنده استجابه كويسه بس كان لى كذا استفسار عايزه اعرف اجابتهم منكوا
اولا هو لسه مش بيطلب هو بيقول بعد ما يعمل بس البراز - اكرمكم الله - بيعمله مره واحده اول النهار وتقريبا اول ما بيصحى من النوم بقى عارف انه المفروض يدخل الحمام ويعمل فيه وبقى لنا 4 ايام على الوضع دى الحمد لله
بعدها بسيبه بدون حفاض ولما بيعمل بيقول لى بعدها ومرات قليلة جداااااااا يقول لى ولما يدخل يلعب كتييييير فى الحمام وبعدين يعمل وساعتها بعمل له فرح وهو بيبقى مبسوط
المشكلة انى ببقى مضطره بعد العصر على معاد رجوع والده من الشغل البسه الخفاض لانه معندوش ادنى استعداد انه يعملها عليه وطبعا ادهم بمجرد ما بيلبس الحفاض مش بيقول لى اى حاجه حتى بعد ما يعملها لانه طبعا مش بيحس بالبلل فمش عارفه هل دى هياثر على عمليته تعليمه؟؟ يعنى مثلا اروح عند والدتى اسبوع واقلعه طول اليوم علشان يتعلم ولا الفتره دى مش هتبقى كافيه؟؟ ولا هو ممكن يتعلم من خلال نص اليو م حفاضه والنص التانى لا؟؟
وياترى هو هيبدا يطلب قبل ما يعمل من امتى؟؟ هو بقى له اسبوع بس بيقول بعد ما يعمل ودى مكنش بيحصل قبل كده
والسؤال كمان هو بعد ما يتعلم بالنهار تماما اسيبه يلبس الحفاضه بالليلة لمده قد ايه قبل ما اشيلها بالليل كمان؟؟
وهل لازم ساعتها اصحيه بالليل يعمل حمام ولا هو ممكن من نفسه مش يعمل اصلا؟؟
ومعلش تقلت عليكوا بس سؤال اخير كنت عايزه ارجع ادهم الحضانه تانى اول الشهر الجاى بس مش عارفه هل التوقيت دى هيبقى مناسب فى وسط عمليه تعليم الحمام وهل ممكن تعمل له انتكاسه فى التعليم؟؟
يعنى اوديه الحضانه ولا استنى شويه ولو وديته البسه حفاضه ولا لا مع العلم ان الخضانه دى مش فيها نظام لتعليم الاطفال الحمام
ولكم منى جزيل الشكر
رد مع الاستدلال
الروابط المفضلة