حاجة طاهرة والغربة
حلقة هدية للجلسة22وتذكيرية بالحلقة الماضية
الجزء الاؤل
بعد إنصراف منى وهاشم أعادت شادية ترتيب البيت مرة اخرى
حاجة طاهرة( تتثاءب): والله ياحليلها منى حمواتها ضوقنها المُرة
لكن الحمدلله الله جبر بخاطرها انشالله ربنا ما يحرم زول من الخلفة
شادية: اللهم آمين
محمد(يحمل فى يده كيس زبالة كبير ):ياحاجة ما يكون السهر بيتعبك
حاجة طاهرة(مازحة): ياولد انا مرة شباب !
وهسه ده شنو الشى الاسود اللى انت شايلو ده؟ (تقصد كيس الزبالة)
محمد: دى الزبالة ياحاجة
حاجة طاهرة: نعم ؟؟؟؟؟
(أدرك محمد أن والدته فهمت الزبالة بمفهوم آخر)
فجاوب مسرعاً:دى ياحاجة الوساخة وفضلات الاكل وكده
حاجة طاهرة: النبى (بإستغراب) والله انا قلت الناس ديل بنيانهم بالحيل سمح
مادايرليهو اى زباله والله إحنا ذاتنا ناسنا هناك إتفلهموا مافى اى زول بزبل بيته
شاديه :والله احسن زمان اصلى مابريد اشم ريحتها
حاجة طاهرة : الليله محمد ده بشوفو ساهر ما كدى؟؟
شاديه: ماعندو مشكله بكرة الخميس مافى شغل
حاجة طاهرة: بركة والله
إنضم اليهم محمد وسألهم:اها ح تساهرو ولاّ امش انوم؟
قالوا ليهو ح نساهر نتونس
جلسوا قليلا يتسامرون وعندما حسّ الجميع بالنعاس إنصرفوا
إلى غرفهم
فى الصباح إستيقظت حاجة طاهرة كعادتها لآداء صلاة الفجر
وبعد ان فرغت منها وجدت شادية أعدّت الشاى واللقيمات
حاجة طاهرة: كُر على القومك بدرى كدى شنو؟ وليداتك مشو المدرسة؟
شادية:الليلة مافى مدارس و الاولاد وابوهم الليلة لو قامو الساعه اتناشر كتر خيركم
حاجة طاهرة:نعلى قمتى مخصوص عشانى انا؟
شادية(بإستحياء): والله ياحاجة عشانك وعشانى انا ذاتى مع الحمل ده ما بيجينى نوم
حاجة طاهرة:يديك العافية يابتى
شربا الشاى واستمتعا بتناول اللقيمات الساخنة
بعدها إستأذنت حاجة طاهرة من شادية بحجة انها مرهقة وستعاود النوم مرة اخرى
والحقيقة حاجة طاهرة ادركت أن شادية مرهقة ومحتاجة للراحة
ذهبت حاجة طاهرة إلى غرفتها وسرعان مانامت هى ايضاً
إستيقظت حاجة طاهرة حوالى الساعة الحادية عشر على صوت آلة كهربائية
وسمعت صوت شادية تتحدث الانجليزية مع شخص آخر
حاجة طاهرة(منادية): شادية........... (مرة أُخرى بصوت عالى)هوى شادية
شادية :نعم ياحاجة كيف أصبحتى؟
حاجة طاهرة:الحمدلله هى الساعه كم هسه؟
شادية : الساعه حداشر وشوية
حاجة طاهرة: سجمى دى مغربت عديل كده ولييه ماصحيتينى؟
شادية(تضحك): بعد ما قلت اصحيك محمد قال لى الحاجة دى ساهرت
وهى ما متعودة على السهر خليها تنوم
حاجة طاهرة: امانة ما إتلوم فينى لوم هى نان يخلينى قدُر ده؟
سمح انتى بتنضمى معاهو؟
شادية : لا دى البت الشغالة الاندونسية ناس المكتب دقو لمحمد الساعة عشرة مشى جابها وجا
حاجة طاهرة: بركة والله خليها تساعدك انتى وحلتى شديد
جآءت الاندونسية تحمل فى يدها مكنسة كهربائية لكى تنظف بها غرفة حاجة طاهرة
شادية (موجهة كلامها للاندونسية): نورياندى (اسمها)دى ماما حق مستر محمد
نورياندى: هاى ماما انت كويس
حاجة طاهرة(تنظر اليها بإندهاش):البت البتشبه عطيات بت الحواتة دى اظنها قايلانى انا محمد بتقول انت كويس
شادية تضحك: ياحاجة هى ما بتعرف عربى وقبل ما تشتغل معانا اشتغلت مع بريطانيين ساكنين هنا فى السعودية يعنى لهجتها ح تكون ملكلكة
حاجة طاهرة: لكن يابتى عطيات ذاتها كانت شافتها ح تفتكر ابوها معرس فى حتة تانى
حضرمحمد ووجد شادية غارقة فى الضحك يبدو ان التشبيه بليغ جدا
محمد: بتضحكى كده مالك ياوليه
شادية(تضحك وتشير للشغالة وحاجة طاهرة)
حاجة طاهرة: بتضحك عشان قلت ليها البت الشغالة دى تشبه عطيات بت الحواته
محمد (وقد اطلق ضحكة اعلى من صوت شادية ): والله ياحاجة انتى خطيرة فعلا تشبها شبه ماطبيعى
إستغربت الاندونسية من ضحك الجميع ولم تلق بالاً وبدأت فى التنظيف
حاجة طاهرة: وبتنضف ب شنو هسه هى؟
شادية :بالمكنسه الكهربائية لأنها اسهل واسرع
حاجة طاهرة: والحاجة دى بدوكم معاها بنادول (كناية عن الاذعاج)
شادية(تضحك):لا والله لكن هى بتخلص هسه
حاجة طاهرة (وهى تراقب المكنسة بإعجاب):قادرالله والله شطفت الوسخ ده فى ثوانى ....شادية هسه دى بكم عندكم؟
شادية:ماغاليه لو عايزة واحدة بكلم محمد يشتريها ليك
حاجة طاهرة:بشرط واحد يشيل منى القروش انا يابتى جاية بقروشى من هناك جاهزة !!هسه عجبتنى المُقشاشه البكهربا دى خلينا ننضيف بها الديوان
شادية: قروشك وقروش ولدك واحد ياحاجة ماسمعتى قالوا انت ومالك لأبيك والحاج الله يرحمو يبقى المال مالك ياحاجة ماتتحسسى
حاجة طاهرة إمرأة راقية لاتحب تكليف الناس فوق طاقتهم حتى أقرب الناس إليها ولاتتدخل فى ما لايعنيها
ولاتحب ان تضايق ولدها وزوجته بأى شئ
البقية تأتى
الروابط المفضلة