رايى مش مهم؟اعمل اية

[mhme]

السلام عليكم انا فى مشكلة ومحتاجة مساعدتكوا هى فى الحقيقة مع خطيبى احنا حاليا بنجهز الشقة ولكن المشكلة ظهرت اولا لما راح بمزاجة واشترى السرامك بدون اخد مشورتى فى اللون ولا فى النوع وقلت مش مشكلة ولما اشترينا حجرات النوم الكبيرة والصغيرة كنا معاه انا وبابا وماما ومع كدة مشى راية واشترى اللى على مزاجة وقلتلة انا سكت بس علشان لو ظروفة كدة ومفيش معاة فلوس كفاية بس قلتلة انا هختار السفرة وفعلا اخترتها وهو وافق وقال لما اكون فاضى هشتريها ومن قريب فالى مش هقدر اجيبها وفعلا جابلى 3 صور لسفرات تانية على قدة وجيت على نفسى واخترت واحدة بس اللى حصل انة كلمنى وقالى جبت السفرة وكانت المفجاة انها حاجة تانية خالص ومشفتهاش المشكلة دلوقتى مش فى السفرة انا خايفة انة بعد كدة ميحترمش رايى او يتجاهل راى وانا شخصيتى قوية طول عمرى مش عارفة اعمل اية اجى على نفسى واعدى زى كل مرة ولا اسيبة رغم ان اهلى متضايقين بس مش عوزينى اسيبة اعمل اية بيقول لماما هى تقول رايها وانا الراجل الللى كلمتى تمشى بالنهاية بجد محتارة

[تردد]

ماتسيبهوش ولا حاجه بس ضرورى تتكلمى معاه بكل صراحه فى النقطه دى وتفهميه ان دى حاجه مش عاجباكى ولازم تنقى معاه لان دى شقه العمر ولو مساله فلوس وانك بتبقى محرج قبل مننزل وضحلى ظروفك ايه وانا امشى على ادها غير كده انا مش هقل منك التصرف ده تانى وعرفيه ان بعد ا لجواز مش هيقبل انك تشترى حاجه من غير متاخدى رايه حتى لو من مصروفك يبقى ليه بيعمل كده
انا جوزى كان بيعمل الحركات دى وانا من هبلى كنت بعديها بس صدقينى ندمت لان لو محرج من انه يوضح ظروفه من دلوقتى هنتكلم بصراحه بعد كده ازاى صدقينى دى فرصتك انك تحطى النقط عالحروف

[mhme]

شكرا لاهتمامك ياخت تردد بس بجد الموضوع قلقنى لانى مش قادرة اسامحة لانى عديت اكتر من مرة زى موضحت وعلى فكرة هو مركزة مرموق يعنى المفروض يكون اكتر فهم من كدة وخصوصا انة بيحبنى جدا بس احساسى انى اقل من كل صحباتى وقريباتى اللى اختاروا كل حاجة بمزاجهم هيقتلنى وكمان لو فضل يتحكم كدة فى وان دة امر واقع وانة الراجل وانا مش بحب كدة انا من يومها مبكلمهوش وهو بيحاول بس بجد مش قادرة

[om uomna]

خلاص لازم توضحيلة ولازم تاخدى موقف لان لو اخد على كدة اللهم ان شخصيتك هتتلغى ف حاجات تانية كتير والجواز مشاركة بين اتنين بيكملو بعض مش واحد بيجمع ف الحاجات اللى ناقصاة والزوجة من الشكليات المطلوبة...............................!

[noran5]

و عليكم السلام ورحمة الله وبركاته

أختي العزيزة .. mhme
حياك الله بيننا

غاليتي .. لا تجعلي اول تفكير لك عند وقوع أي خلاف بينك و بين خطيبك
و شريك حياتك في المستقبل .. هو الانفصال

لابد ان تحاولي أولا و بكل الطرق الممكنة ايجاد حل لهذا الخلاف

للأسف غاليتي فخطيبك مثل كثيرمن الرجال الشرقيين
الذين يفهمون الرجولة بشكل خاطيء .و يعتقدون ان التفرد بالراي هو نوع من السيطرة على المراة و على الحياة الزوجية
لذلك أنصحك ان تهدي خطيبك كتاب يتحدث عن سيرة الرسول الحبيب صلى الله عليه وسلم
و آل بيته ... ليتعلم معنى الرجولة الحقيقية
التي لا ينتقصها اخذ مشورة الزوجة

و اطلبي منه أن يقرأه .. بعد ذلك اجلسي معه و في وجود أحد حكيم من أهله و ناقشي الأمر
تحدثي بكل صراحة
و عبري عن نفسك و عن أن شخصيتك لا تسمح لك بالرضوخ للأمور هكذا
دون أدنى مناقشة

و انك ستقدرين وضع زوجك و لن تحملي عليه أكثر من طاقته
و لكن على ان يطلعك على كل شيء بكل صراحة و أن يهتم لرأيك

انت الآن أخذت موقف .. فاستمري الى ان تتم مناقشة الأمر ووضع النقاط على الحروف

و الله يوفقك و يسخر لك الخير حيث كان

::

[mano_YHIEA]

ده لو رضيتي بالحكايه دي من دلوقتي بعد كده هتعملي ايه اووووووووووعي تستمري علي كده بعد كده عمرك ماتقدري تفتحي بقك لازم تكلمي معاه وتحاولوا توصلوا لراي مشترك مش علي حساب الطرف التاني ولازم تعرفي ان الرجاله بتستضعف الستات اوووووي لازم تقولي رايك وتحاولي تفرضيه بس مش بالقوه لا بالاتفاق

[جيهان--]

صديقتي كل الرجال يحبو كلامهم هو الي يمشي بس انتي خلي عندك شخصية في الاشياء الخاصه فيك هذي لاتتنازلي عنها بس الاشياء التانيه معليش اتناقشو فيها مع بعض بس مو لدرجة تخربي حياتك عشانها

[رووونة]

طبعا الله يكون بعونك
بس لازم تعرفي انه بعد الجواز مفيش حاجة اسمها انا شخصيتي قوية ، دى تخليه يعاند معاكي اكتر
و هو ممكن يكون حاسس بكده من دلوقتي و علشان كده بيتصرف من دماغه و مش بيحب يسمع لكلامك انتي ممكن بالحوار و النقاش الهادئ تطلبي اللي انتي عاوزاه

و اعرفي اولا و اخيرا انه رجل شرقي يعني يحب دايما انه كلامه هو اللي يمشي على العموم انتي ممكن تفتحي معاه نقاش في الامر ده لكن بهدوؤ و ماتقوليش له انا شخصيتي قوية دي خالص

[نهي سمير]

هقولك نصيحة بما يرضي الله اعرفي انك لو كملتي معاه ده هيبقي نظام حياتك والقصة مش جوازة والسلام واللي بيحترم خطيبته مش هقول بيحبها بياخد رايها في كل حاجة حتي لو معهوش امكانيات خالص الموضوع مش موضوع فلوس ده نظام بيعودك عليه ولو اتكلمتي بعد كده هيقولك بتتكلمي بامارة ايه ما انا من الاول كده

[mhme]

شكرا لاهتمامكم بس والله انا عديت كتير جدا من البداية وكانت ماما تيجى معاه ديما عليا وعلى فكرة هو اللى كان بيدخل ماما بينا وانا مبقلهاش رغم انى طلبت منة ميدخلش حد حتى لو ماما بس المرة دى ماما حست بجد انة كدة كتير قوى اما بالنسبة لموضوع الشخصية فانا عارفة عادات الرجل الشرقى وعمرى مفرضت علية راى ولا طلبت منة حاجة لدرجة انة نسى عيد ميلادى رغم انة اول عيد ميلاد لنا مع بعض وقلت معلش ممكن مش فاكر .احنا الحمد للة ميسورين الحال بس مش لدرجة ان اهلى يجهزولى المطبخ بجميع محتوياتة ومعاة الصالون وكمان الستاير كاملة وكمان اختة دلوقتى بتطلب النجف والسجاد وبتقول انتوا تقدروا تجيبوة طيب هو كدة هيجبلى اية يعنى اظلم اهلى حتى لو يقدروا