لكل خبيرات الكعك جزاكم الله خير
السلام عليكم ورحمة الله وبركاته
لكل بنات هالمنتدى المميز أقدم جزيل الشكر والإمتنان على هذه الوصفات الرائعة بصراحة.. انا صحيح عضوة جديد ولكن أنا مراقبة لكم عن بعد.. واستفدت كثير من وصفاتكم وأخيرا حبيت أسجل معاكم وأشارككم عشان أفيدكم مثل ما فدتوني جزاكم الله كل خير .. وبنفس الوقت أستفيد من خبراتكم <<< تراها توها صغيرة عالطباخ
المهم يا عزيزاتي.. أنا معجبة بإبداعاتكم في كافة المجالات وخصوصا الطبخ << تحب الطبخ.. وكنت مترددة أكتب هالموضوع وقلت يمكن اتعبكم معاي لكن انتوا ما شاء الله عليكم واضح انكم تحبون تساعدون وتعلمون المبتدئات مثلي ههه.. طبعا جزاكم الله خير الجزاء
الحين نجي للمهم <<< متوهقة
انا بصراحة عندي عزيمة قريب وفي بالي أشياء ودي أسويها ولكني محتارة في بعض الأمور وودي اسأل صاحبات الخبرة في صنع الكيك وياريت تجاوبوني لأني بجد محتاجة لمساعدتكم يا خواتي والله يجزاها كل خير اللي بترد علي وراح أدعي لكم من قلبي حبيباتي
نجي للأسئلة اللي حابة اسألها وأدري طولت عليكم الموضوع ههه بس في قلبي شحنة من الكلام ودي أكتبه لكم من زمان
أول شي ودي أسأل عن الحشوات والتغليفات للكيك.. أنا من خلال بحثي في الانترنت عرفت ان فيه حشوات وتغليفات كثيرة منها عجينة الفوندان وعجينة المارزيبان والكريم شانيته والكريم باتيسيير والكاسترد والغناش وتغليفات مختلفة بالزبدة..
ولكن اللي محيرني هل مثلا انا اقدر استخدم اكثر من شي في تزيين كيكة واحدة؟ يعني اقدر احشي الكيكة بالكريم شانيته مثلا وبعدين اغلفها بالكريم شانيته وبنفس الوقت اغلفها بالمارزيبان؟؟
وشنو هي احسن حشوة واحسن تغليفة تستخدمونها طبعا أقصد الألذ والأخف بنفس الوقت.. ودي بحشوة وتغليفة خفيفة ولذيذة لاني بصراحة اوقات اشتري جاهز ويطلع ثقييييل واحسه كله زبد.. يعني يمكن كريمة الزبدة تكون ثقيلة شوي..؟ شنو رايكم؟؟ لأني ما أعرف لهالأمور.. وودي بشي خفيف وحلو يبيض وجهي قدام زوجي وضيوفي
لكن مرات تجي كيكة جدا لذيذة وكريمتها خفيفة تذوووب في الفم.. ياريت تقولون لي شنو السر؟ أوقات أنا أشوف مثلا مواضيع بعجينة المارزيبان أو الفوندان لكن بدون حشو الكعكة بالكريمة؟ فهل تخترب الكيكة يعني لما احشيها والا شنو السالفة؟<<< ما تفهم هههه
برايكم شنو ألذ تغليفة هل المارزيبان أو الفوندان؟؟ وشنو الوصفات اللي انتوا معتمدينها بالمناسبات وضامنين نجاحها ولذتها؟
أنا بصراحة ما عندي خبرة بهالسوالف ابدا.. ولما اسوي كيك.. يكون مجرد كيك يعني بدون هالحشوات والتغليفات والتزيينات الحلوة اللي اشوفها واقراها بمواضيعكم ما شاء الله عليكم.. رغم اني احب الكيك لكني مبتدئة ياريت تعلموني وراح ينحسب لكم الأجر والثواب إن شاء الله..
رد مع الاستدلال
الروابط المفضلة