الشخصيات من وحي الخيال وهي :
أم فتحي هي أم العريس المغترب..
بهيه أخت العريس ..
المكان : بيت من االبيوت المستورة..
الزمان : في كل وقت ...
وفي احدى الأمسيات الساحره ... وعلى الشرفه الهادئة ... دار هذا الحديث بين أم فتحي وابنتها بهيه ...
بهييه : شو يما لسه ما شفت عروس لفتحي ؟
أم فتحي : لسه محتارة يما يا حبيبتي ... محتارة كثير ...
بهيه : طيب يما شو بدك مواصفاتها وأنا بساعدك من صحباتي بالمدرسه المعلمات ؟؟
أم فتحي : معلمه ؟؟؟ والله ما انا عارفه يما !! أهم شي يكون لسانها قصير مثلنا يما .. ما بدنا وحده كثيرة لعي وحكي ...أقولك اسمعيني :
أسمعي يما بدي وحده نشيطه أه على رأي المثل : اللي تنام ليلها وضحاها العيشه ارحم بلاها..
بهيه : يعني معلمه ... المعلمات نشيطات يما !!
ام فتحي : أسمعيني .. بكره المعلمه معها مصاري تصير تقوله هذا الي ومن مالي .. لا يما .. أتزوج غبية وخائبة ولا أتزوج ذكية وجايبه..
بهيه : طيب بلاش معلمه ... يعني بدك وحده ما بتشتغل وما معها مصاري وأهلها فقره؟؟
أم فتحي: له له له شو هالحكي يما ... جاور السعيد تسعد .. كيف لو ناسبته ..
بهيه : حيرتيني يما !!!
أم فتحي : المصاري مش خلاف ... هيك هيك اذا خلص العرس وانطفت لمباته العروسة تتلبس والعريس يراجع حساباته..وياما ناس معها مصاري بس .. بابهم كبير وعقوده حمر ومن جوته شيء يقصف العمر..
بهيه : طيب شو رأيك ببنت خالي مليحه اسم ع مسمى حلوه وطويله وقريبتنا ...
أم فتحي : شو شو مليحه والله لو ثقلها خالك بالذهب .. قرايب ما بدي .. القرايب عقارب يما ..
بهيه : طيب شو رايك؟ خلص لقيتها ... فهميه بنت جيرنا ... ملكة جمال يما حلوه كثير ...ومأدبه وبنت ناس..
أم فتحي : بعد صفنه وتفكير عميق .... لا لا يوما هظي حلوه كثير بتلحس عقل أخوكي وبتنسي أهله ...ولي يسمع كلام مرته يا كبر نكبته !!!
بهيه : طيب بلاش يما ... أمينه بنت صاحبتك خاتي أم شهاب ؟؟ ما عليها كلام .. وأمها صاحبتك ..
أم فتحي : لا يما أمها كثير منيحه بس البنت قويه قويه ... اللي تعصي جوزها وما تسمع كلمته ما تستاهل تأكل لقمته..
بهيه : طيب بنت أبو حسني صاحب الدكان يما؟
أم فتحي : أه جبتيها يا بهيه ... خلص هظي هي ...
بهيه : الحمدلله ..
وفجأه تقوم أم فتحي وتوقف وتقول لا لا في العجله الندامه ...ما شفتي أختها بعد ما تزوجت وحبلت كيف نصحت .. لا يما هظي أذا إذا حبلت ذبلت...وبكره بتصير تقوله : جن يا مجنون حبلى ما اقدر اقوم..
أم فتحي : والله احترت بشقفة هالولد .... شو أعمل .. شوري عليّ يما يا بهيه ..
بهيه : أنا شايفه قريباتنا كثار يوما ... شوف بنت عمتي خلود؟
أم فتحي : لا لا الا خلود ... هاظي زي البرغشة تسمع الهرج والوشوشة..وانا ياما ذايقه منهم قرايب أبوكي أخ أخ ما فيهم غير صوير وعوير واللي ما فيه خير..
بهيه : طيب روحي عند جارتنا أم فؤاد كل كناينها كويسات أسأليها بلكي بتساعدك ؟
أم فتحي : يا شماتة الناس فيكي يا أم فتحي أيش يقول هبايل وما بنعرف الناس ويصيروا يقولي مش لا قييني لابنهم عروس وماحدش راضي يعطيهم لا هو أصيل جد ولا هو أحمر خد..لا يما ما بدي أسأل ..
بهيه : خلص زهقتيني يما .. ما ظل حده ...
وبخفه ورشاقه تناول أم فتحي كاسة الشاي بالنعناع ... وتنقز وتقول يما لقيتها .. لقيتها .. فيها كل مواصفاتك .. سعديه بنت أم سعدي !!!!!
أم فتحي : سعديه مثل الشمعه ماشالله عنها أدب وجمال ودين ولسانها قصير وما بتعرف الكيد والبلا ... بس ما بتعرف تطبخ ...
بهيه : خاص يوما ... الا بتطبخه العمشى جوزها منه بتعشى...
أم فتحي : لا في أهم من هيك ..شوي سمره ؟
بهيه: القمحية فرايحية والسمرة قمرة والبيضة صيده ..وأحسن من بيضة زي اللفت ولما شفتها قرفت...
أم فتحي .... لا أمها قويه وكاسرة ...وبكره بتتعلم منها وعلى رأي المثل اقلب القدرة على فمها .. تطلع البنت لأمها .. والعرق دساس ... وأخوكي عصبي ..
وعلى رأي المثل ...اللي يجنن مرته بالغيظ يا عمته بالسحر أو قتلته بالحيض...
بهيه : خلص يما والله تعبت مافي وحده غير وبتطلعي فيها مية عيب !!
أم فتحي : لا والله يما هذا نصيب .. والحمدلله انه فتحي عنده أم مثلي حريصه عليه مو بكره يصيروا يقولوا عن كنتي ... أم شعر جعدي تقول يا سعدي وأم شعر خيلي تقول يا ويلي...
خليها على التساهيل وأخوكي بعده صغير يومه ..
بهيه : صغير .. صار 39 سنه وبتقولي صغير ...
أم فتحي : يوما بدي أشوفله بنت حلال .. اللي في بيتك تخدمك قادره تسعدك أو تعدمك .. وانشالله بنلاقي البنات دابات الدنيا ...
وبعد عدت أيام ... سمعت الزغاريد في بيت أم فتحي
واجو الجارات و الحبايب ...
يا ريته ألف مبروك يا أم فتحي ... شو في انشالله دايما عامر بالافراح ...
أم فتحي : هظا حبيبي فتحي راح أخوه يجيبه من المطار 10 دقايق وبوصل .. خليكن يا حبايب .. إلي بيحضر السوق بتسوق ...
ووصلت السيارة ... وركضت أم فتحي على الباب وكلها أشواق محترقه للقاء الحبيب الغائب... وفجأه نزلت من السيارة سيده شقراء ... طويله ... ويبدو أنها أجنبيه .... ووقفت أم فتحي مصعوقه .. لا من ثمها ولا من كمها ..
فتحي : كيفك يما اشتقتلك ... هي أحلى مفاجأه ... مرتي جاكي يما !! جاكي : Say hi to mama
أم فتحي : والحره تعصر قلبها ...والله صحيح مش كل تأخيره فيها خيره ...
رد مع الاستدلال
... وأعالج فيها مشاكل المجتمع ..
بفضل هذا النتدى الرائع..
الروابط المفضلة