الحموات وأخوات الزوج

[منتقبة سكندرية وافتخر]

اخواتي الأعزاء
انا مش عارفة مكان الموضوع ده صح ولا ايه بس حبيت اتكلم معاكم في موضوع أكيد بيقابلكم كلكم في حياتكم

انا حماتي متوفيه لكن أخت زوجي هيا اللي عاملالي مشكلة تعرفوا حماتي في حياتها كانت ارحم بصراحه المهم انا لما ولدت طبعا عشان هيا اوول ولاده فروحت على ماما وكمان كنت والده قيصري قعدت عند ماما اسبوعين مجوليش فيهم غير مرتين وبعدين لما روحت جولي أهل زوجي كلهم يوم العقيقة وبعد كده مجوش ولا سألوا خالص غير على آخر شهر اربعه بعد ما جوزي رجع من العمرة واخت جوزي مجتشي من يوميها وبعدين ظروف شغل جوزي كانت متلخبة فكان كل شوية يروح القاهره يقعد اسبوع وطبعا عشان هو رافض اني اقعد لوحدي فكنت بروح لماما هو سافر مرتين كل مرة اسبوع بينهم اسبوعين هنا في اسكندرية هيا تقعد نسيانا طول التفرة اللي احنا فيها هنا ومتفتكرناش غير لما ييجي جوزي يسافر وتقعد تتخانق ان ماما بتشوف ردينه بنتي اكتر منهم واني عايزة اقرب البنت من اهلي وابعدها عنهم مع انهم لا بيسألوا فيها ولا بييجوا ولا اي حاجة خالص ولا حتى تليفون ويقولوا انها وحشتهم ولما افتكرت فجاه ان ليا بنت أخ كانت أختي جت من السفر بعد غياب سنة وتلات شهور وقاعده عند ماما لحد ما جوزها ينزل فطبعا بروحلهم يوم ويوم وطبعا التانيه على آخرها وكل شوية تقول لجوزي هات مراتك وبنتك وتعالى حضرتها مش عايزة تيجي وعايزانا احنا اللي نروحلها شوفتوا الذكاء هيا اللي معاها ولد واحد وعنده 6 سنين ولا انا اللي معايا بيبي عندها 5 شهور

انا اتخنقت منها خلاص ولما بتتكلم ومتلقنيش تروح مكلمه أخوها اللي هو جوزي وتقوله مراتك مش في البيت هيا فين وليه حاسة انها بتراقبني وانا قرفت خلاص

اديني حكتلكم حكايتي مع أخت جوزي وياريت اسمع رأيكم وحكايتكم انتم كمان

[sefo2]

اهلا أميرة اية اخبارك انتى ورودى يارب بخير
بصى يا أميرة واضح ان دى المشكلة الازلية انا عندى حماتى و اخوات جوزى وجدتة يعنى لمة حلوة اوى هههههههههههههه وكنت دايما فى نفس المشكلة ان ماما بتشوف الولد اكتر منهم وانة مرتبط بأهلى اكتر منهم بس دا طبيعى لان اخت جوزك اكيد ابنها كان مرتبط بمامتها اكتر من اهل باباة بس محدش بيبص لنفسة كل واحد بيدور على غيرة
بس عايزة اقولك حاجة كمان انتى عليكى انك تعاملى ربنا يعنى زيارة كل فترة بس معاكى جوزك مش حتعمل حاجة حتى لو نص ساعة عشان متدخليش فى دايرة قطع الرحم ومتقوليش عشان ابنها اكبر من بنتك يبقى هى ممكن تيجى وانتى بنتك صغيرة متقدريش تخرجى وكدة
يعنى خلى مرة عليكى ومرة عليها وخلى جوزك معاكى فى الصورة
وربنا يهديها ويصلح لك الاحوال

[ام مسرة]

السلام عليكم ورحمة الله وبركاتة
الاخت العزيزة اميرة صحيح ان هذة المشكلة موجودة في كل العائلات
وانا كمان حماتي متوفية بس اخت زوجي هية الي تعمل المشاكل
وياريت لو كانت مثل حماتك كان ازورها كل اسبوع حتى ارضيها
وارضي رب العالمين اولا
بس مشكلتي انها بتلح على زوجي انو يزوج مرة ثانية
وصار كم سنة اعاني من هذا الوضع برغم زوجي يرفض
بس تعرفي المشاكل الي بتحصل بسببها اللة يهديها ويهدينا
بس نقول حسبي الله ونعم الوكيل

[منتقبة سكندرية وافتخر]

انا نسيت اقولك يا سيفو ان احنا على طول اللي بنروح وهيا اصلا مش بتيجي خالص وبتعتمد ان اللي هيا عايزاه يجيلها وعلى فكرة ابنها طالع مرتبط باهل جوزها لأنها قاعده مع حماتها

[نور تقية]

اميرة حبيبتى........

بصى يا جمييل انت زعلانة ان اخت زوجك مش بتزورك و انها عاوزاكى انت اللى تزوريها

حطى نفسك مكانها هى ممكن تحس انها غريبة و ضيفة لما تجيلك عند والدتك ساعة الولادة

عموما ممكن لما جوزك يكون مش مسافر تروحى معاه زيارة خفيفة لطيفة ظريفة و تروحى معاه

و قوليلها انك مش بتقدرى تجيلها لوحدك لانك بتتلخمى بالبنت و تخافى تركبى بيها لوحدك

و بالنسبة لزوجك فهمييه انك بتحرجى من الزيارات لانها قاعدة مع حماتها زى ما قلتى....مش فى بيت لوحدها

و لعلمك طبيعى اوى انها تحس ان البنت مرتبطة باهلك اكتر لان اغلب قعدتك هناك...الموضوع غيرة بحتة هههه

على اخوها و على بنته و كل اللى يخصه فهمتى حبيبتى

و الحل زى ما بقولك زيارات سريعة

انا اتخنقت منها خلاص ولما بتتكلم ومتلقنيش تروح مكلمه أخوها اللي هو جوزي وتقوله مراتك مش في البيت هيا فين وليه حاسة انها بتراقبني وانا قرفت خلاص

بصى طالما جوزك عارف انت فيين خلاص و لا تحطى فى بالك سيبيها .....

و ربنا يهدي لك احوالك يا رب

[*YSmsma*]

والله انا رائيى مختصر مفيد

انك تصلى رحمك بيها فى اضيق الحدود وبشرع الله وغير كده تسيبك منها تماما مدام بتأذيكى نفسيا

وربنا يلهمك الصواب

[noran5]

السلام عليكم ورحمة الله و بركاته


أختي العزيزة ... أميرة مصرية
حياك الله

حبيبتي .. من الطبيعي ان تشعر أخت زوجك بالغيرة من اهلك
طالما انك تقضين اغلب الوقت معهم

حتى لو كانت مقصرة معك و مع ابنة أخيها
هذا لن يمنعها من أن تفكر في حقها و حق أهلها
ان تكون ابنتهم بينهم تراهم و تتقرب منهم
و اي مفهوم خاطيء يصل الى تفكيرها
كان تتهمك بأنك تبعدينها عنهم
و تقربيها من اهلك

هذا سببه قلة زيارتك لهم و كثرة تواجدك في بيت أهلك في نفس الوقت

أنا لن أقول لك لا تذهبي الى بيت اهلك
و لكن اكثري من زيارة بيت اهل زوجك
و الاتصال التليفوني بهم و خاصة أخته

توددي لها بالكمات الطيبة و حاولي كسب صداقتها

اشكي لها من امر ما ..يكون بسيط و غير جوهري في حياتك
حتى تشعر بأنك تحبيها و ترتاحي لها

حاولي كسب ودها باي طريقة بحيث تتركك في حالك
و تغض نظرها عنك فلا تعد تهتم اين تذهبين أو ما اذا كنت في بيتك ام لا

فمهما كانت لا يؤثر على حياتك و علاقتك بزوجك
الا أنها تؤثر على نفسيتك بتصرفاتها كما هو واضح

لذلك ليس امامك سوى التقرب منها
حتى تتقي شرها

و الله يوفقك و ييسر لك امرك
و يحبب فيك اهل زوجك و كافة خلقه

[اميرة صلاح]

بس يا مرمورة يا ام الامورة رودى المفروض تكبري دماغك شوية وتفهمى جوزك انك بتتحرجى ولما يكون رايح لاختة تروحى معاة ولما يسافر ممكن تتصلى بيها انت بالتلفون ومش لازم كل شوية تشتكى لية من اختة لانها فى النهاية اختة ومن الواضح انة مش بيلوم عليكى ودة المهم والود مش بين اللى لازم يروح لمين وعلى فكرة عدم حضورها ليك افضل علشان ما تدخلش فى حياتك وخصوصا وجوزك مسافر فقضاء اخف من قضاء ولو فتحت موضوع الزيارة امام زوجك خليكى الازكى وقوليلها اى وقت تحبي تيجى اصل بيا عند ماما او على الموبايل وانا اروح استناك فى البيت ههههه

[مدآآآد]

أختي أميرة
أهم شي بالموضوع علاقتك مع زوجك .. لاتتلخبط ولاتتوتر لأي سبب..
خليكي عاقلة وطنشي..اذا كان زوجك معاك وفصفك هذا اهم شي..لانك مش رايح تغيري شخصية اخت زوجك..
طبعا اكيد حنصحك تكسبيها بالاول قد ماتقدري.. بس لو مانفع معاها ماعليك غير انك تطنشي وتمشي حياتك بدون مشاكل.. والدنيا كذا مستحيل تعدي بدون مشاكل ان كان بسبب اخت الزوج او بسبب غيرها ..
ربي يحفظك ويحميك ..

[OOدانة الدنياOO]

الله يعينك ويصبرك وعليك بالدعاء