بصراحة ترددت قبل ما شارك
لأنو هاد أول موضوع إلي بنزل فيه صور
والصور من موبايلي ..إن شاء الله يكونو واضحين
أولادي عدنان وعبدالرحمن,, توأم ,, صف ثاني ابتدائي
الصبح بكير ما بيقبلو يفطرو أول ما يصحو ..
بس الشي الأساسي واليومي المتبع هو معلقة العسل قبل ما يروحو عالمدرسة
وبياخدو معهن كم تمرة أو سندويشة صغيرة أو كعكة أو موزة بياكلوها وهنن عميستنو الباص
المهم ما يروحو على معدة فاضية
أحيانا بشربهم كاسة حليب ,,بس بصراحة بخاف من موضوع الحمام أعزكم الله,, لأنو ما بيصدف إلا على موعد الباص !!
هههههههههه
بالمناسبة.. أنا عندي ولله الحمد 4 أولاد بنتين (16 و13)سنة ..وتوأم ذكور الله يسلمهم (7.5)
من أول ما فاتت بنتي الكبيرة عالمدرسة لليوم نظامي ما تراجعت عنه وعودتهم عليه ولله الحمد
بمدارسنا ما منبعت وجبات مع الأطفال,, ممنوع
بس سندويشات ,, ومو كل الأنواع مسموحة (مشان الطفل ما يوسخ حاله)
أنواع السندويشات اللي بعملها :
الزيت والزعتر بالدرجة الأولى لما للزيت والسمسم وجوز الهند المضاف للزعتر من فوائد عظيمة ..
جبنة سائلة
جبنة ومربى (بس ما بكتر مربى يا دوب دهن خفيف مشان ما يوسخو)
وأحيانا قليلة شوكولا دهن
بالإضافة إلى الخضار ضروري خيار أو جزر
وتفاحة
وما بسمحلهن يشترو من سندويش المدرسة
وما بعطي مصروف كبير عالمدرسة ... يعني بس شغلة وحدة من بسكوت أو شوكولا
وطبعا مو قرار تعسفي ولازم يطبق ..لأ,, بنتناقش وبفهمهن وبشرحلهن
ودائما بيجو بقولولي فلان آخد معه مصروف كذا عالمدرسة ..وفلان أمه بتعطيه مبلغ وقدره ..
وبصير بحاورهم ..شو بدكن تشترو بالمصروف ؟؟ أكتر من قطعة أو اتنين فيها ضرر على أسنانكم وبوجعكم بطنكم ومن هالحكي وبقلهن أنا بعطيكن مصروف بس مو لتشترو فيه بالمدرسة ..لأ,, بتشترو شغلات تانية بدكن ياها
وبفهمهن أدي أنا بحبهن وبخاف عليهن من الأمراض
و أهم شي عندي إنو الشيبسات والملونات ممنوعة
حتى كل رفقاتي لما يجو عندي وبدهن يجيبو أكلات لأولادي بخافو مني وبيعرفو شو الممنوع وشو المسموح عندي
وكل يوم بس يجو من المدرسة بسألهم بطريق غير مباشر شو اشترو بالمصروف..وبتناقش معهن عالصح والخطأ لحتى يصيرو يتعودوا
و بنتي الكبيرة لما كانت بالروضة أوقات تجي عالبيت حزينة ولما أسألها تقلي ما باعو اليوم بالمدرسة غير شيبس فما اشتريت ..
وهون أنا أحزن عليها بس ما فرجيها بالعكس كافئها وشجعها وجبلها شغلات هي بتحبها
و هيك الأمور كانت تمام مع البنات
أما بالنسبة للتوأم لما فاتو عالمدرسة وشافو الأولاد شو بيشترو (وهنن مع بعض بشجعو بعض عالخطأ )
كنت عاني من هالموضوع ولما حاول أعرف شو اشترو كان واحد يزلق ويخبرني .. وكنت أتبع أسلوب النقاش والشرح وأحيانا أتبع أسلوب العقاب ويوعدوني ..أحيانا ينفذو .. وأحيانا لأ
وقبل.. لما كانو بالروضة ..مدرستهن صغيرة وعدد طلابها قليل
كنت دائما حاكي المديرة وتابع أولادي من خلالها ..
حتى صارو لما بدهن يشترو شيبس تقلهم المسؤولة عن البيع (لأ.. إنتو أمكم ما بتسمحلكم تشترو شيبس )
وكتير أوقات أعطيهن عالمدرسة مجموعة من المكسرات الغير محمصة ولا مملحة (لوز + جوز ) + زبيب + وأحيانا ملبس (اللوز المغطس بطبقة سكر )
وهاد الشي لفت نظر الإدارة وشكروني عليه
وكنت أشتريلهن البسكوتات وأعطيهن منهن عالمدرسة ..بس بطلت هالشي مشان الريجيم لأني كنت آكل أكتر من أولادي خخخخخخخخ
بس المشكلة بالمدرسة الحالية ..كبيرة وعدد طلابها كبير وما في مجال تابع هالأمور مع الإدارة .. وببيعو بالمدرسة سندويشات مشهية للأطفال (بطاطا مقلية مع مايونيز + فلافل و....)
وأنا أبدا ما برضى يشترو وبفهمهن عن ضرر استعمال زيت القلي مرات كتيرة وبحاول أوقات ساويلهن بالبيت وفهمهن إنو هيك أنظف)
وما زلت ولله الحمد مستمرة
الله يهدي أولادي وأولاد المسلمين أجمعين لما فيه صلاحهم ورشدهم
وسامحوني الصور مو كتير صافية لأنها من موبايلي
وبصراحة ...لاتقولو لحدا
قضيت مبارح يمكن شي 3ساعات
واليوم كمان شي ساعتين وأنا عمحاول بالصور وأعمل بحث
لحتى لقيت موضوع أم مرمر الله يجزيها الخير
ومحاولات وتجارب لحتى بالآخير زبط
بتمنى تكون مشاركتي عجبتكن
الروابط المفضلة