ركن الاكلات المصرية...

[roona_329]

السلام عليكم ورحمة الله وبركاته

ايه ياجماعة فين الي اتفقتوا عليه

انكم تقولوا حاجات تخلي اكلنا مخلف وليه نكهة مختلفة
انا بدخل من وقت للتاني لكن مش بلاقي افتكسات ولا حاجة
عموما في حاجة انا مجربها هاقولكم عليها بعد الفاصل

[roona_329]

حد جرب قبل كدة يحط فصوص الحبهان على السمنة قبل لسان العصفور

يعني تحطي السمنة وبعدينتحطي حوالي 5 او 6 فصوص حبهان وبعدين تحطي لسان العصفور

انا شخصيا جربتها والنتيجة رووووووووووووعة

[أم بودي]

يا بنات
مين تساعدني و تقول لي طريقة حمص الشام
جوزي بيحبه جدا و انا ماعرفش اعمله

[بنبونة]

أهلا بك يا أم بودى
من عينى يا جميل إنت تأمرى

حمص الشام

أو ( الحلابسه ) كما نسميها نحن لكن لا تسألينى ما معناها

ملحوظــــــــــة :
طبعا يفضل نقع الحمص قبل السلق لمدة لا تقل عن ساعة أو حتى تجدى حبات الحمص قد إنتفخت
و أصبحت طريه

المقادير :كوب حمص شام يغسل و ينقع / ملح / فلفل / كمون / بصلة متوسطة / واحدة طماطم / عصير ليمون / شطة لليحب
ماء للسلق

الطريقة :
* بعد نقع الحمص ينشل من الماء و يشطف
* يوضع فى قدر و يغطى بالماء و يرفع فوق النار مع البصل و الطماطم بعد تقطيعهم أربع تربع ( أكيد مفهومه )
* يترك ليغلى الماء ثم تهدأ الحرارة و يوضع الفلفل و الكمون و قرب النضج يضاف الملح
* يترك حتى ينضج الحمص يرفع من فوق النار و يغرف فى أطباق الشوربه أو أكواب و يضاف إليه الشطة و الليمون حسب الرغبه
و بالهنا و الشفا

البعض يعمل تقلية ثوم و يضبفها إليه أنا شخصيا أفضلها بدون التقلية كل حسب رغبته
عموما طريقة التقليه هى :
ملعقة ثوم مفر و تحمر فى الزيت و توضع فوق الحمص و تقدم
أتمنى أن أكون قد أفدتك و أن تعجبك جربيها و أخبرينى

[بنبونة]

السلام عليكم ورحمة الله وبركاته

سؤال يابنـــــــــــــات
لا مش سؤال واحد بصراحة هى عدة أسئلة
أولا : أين أنتم ؟؟؟
ثانيا : مشمشة صاحبة أجمل فكرة ( ركن الأكلات المصريه ) أين أنت و يا ترى هل فيه حد منكم يعرف عنها حاجة
هى إختفت عن الركن ليه ؟؟؟؟
ثالثا : هل إكتفيتم بالوصفات السابقة ؟؟؟
رابعا : يا ترى لو فيه وصفات أخرى أنزلها هنا أم منفردة ولا بلاش منها خالص ؟؟؟
عموما أنا كنت معجبة باللمة حول المائدة المصرية و أتمنى أن تعود مرة أخرى و تدوم إن شاء الله

[عبير صباح الدين]

طبعا يابنبونه ياحبيبتى وانا كمان
كنت فرحانه

ننزل كل الاكلات واكيد البنات هايجوا تانى

[roona_329]

بنبونة
انا بأيد رأي عبير الصباح
واكيد لما يكون في جديد هتلاقي الحركة رجعت في الركن تاني

[أم بودي]

بنبونة
حبيبتي
أنا اسفة جدا علي التأخير في الرد بس اكيد مقدرة المسؤليات اللي علي كل ست بيت خصوصا اللي عندها بيبي
اولا مرسيه جداااااااااااااااااااااا علي حمص الشام عملته النهارده و هو اكتر من رائع
تسلم الايد اللي كتبت الطريقة

ثانيا انا شايفة ان الركن بقي مهجور بسبب ان مافيش فيه اي جديد
يعني لو فيه حد بيضيف وصفات جديدة اكيد ها تلاقي الاقبال عليه كتير زي الاول

بالنسبة لي انا لسه يادوب باتعمل الطبيخ في جوزي و الحمد لله استفدت منكم كتيييييييييييييييير جدا و مستوايا تقدم جدا و جوزي بقي مبسوط مني

ياريت بقي ترجعوا للركن تاني
ارجوكم

[أم ميدو]

عزيزاتى
زهرة مصر الرقيق ، جريحة الحب ، مروحه ، مشمش ، بنبونه

السلام عليكم ورحمة الله وبركاته

دايما الاقى وصفات او بالاحرى وصفة الكشرى ، والعملية ماهيش سلق ولا خلط خل على ملح على زيت على على

انا متأكده ان الفن والتفنن فى الصوص (الخلطة اللى بتنحط على الوش فى الاخر) هى صحيح مجموعة مقادير تخلط لكن اصولها ازاى ياريت واحده منكم تتكرم على بالطريقة المظبوطه فقط للخلطه (اللى فى المحلات تلاقيهم حطينها فى زجاجه).


مشكورين مقدما

[بنبونة]

أهلا بك أم بودى
لا شكر على واجب ولا داعى للأسف حبيبتى وأنا طبعا مقدرة المشغوليات لإن أنا كمان مشغولة جدا اليومين دول
ودخولى كمان يمكن بيكون على فترات و باحاول ما أتأخرش كتير على قد ما أقدر
و ألف هنا وشفا و الحمد لله إن الحمص عجبك
و أى طلب أنا تحت أمرك و أتمنى إن وصفاتى تكون بتعجبك
و إن شاء الله سوف أكتب لكم بعض طرق طهى بعض أصناف الخضار
و أتمنى من باقى البنات الدخول و تقديم كل جديد لديهن
لك و لبودى تحياتى