للبحث في شبكة لكِ النسائية:
|
ازيكم يا أمهات....
الموضوع روعة يا كوكى و اسفه على التأخير بس فعلا كنت - و مازلت - مشغولة لشوشتى
أنا عندى لستة دكاترة طويلة انما الأول هاحكيلكم عن د. أحمد البليدى....
لما ابنى كان عمره سنه و نص حبيت أغيرله الدكتور فسألت واحده صاحبتى قالتلى على البليدى انه ممتاز
المهم...رحت و أخدت الولد كشف check-up عادى ....يعنى الولد كان صاغ سليم و مش بيشتكى من أى حاجه,بس قلت أجرب الدكتور عشان لو الولد تعب,أوديهوله.....جميل؟؟؟ جميل...
خير اللهم اجعله خير...أدخل أوضة الكشف و الدكتور يكشف بطن ابنى و ألاقيه بيقولى : "انتى ازاى سايبه الولد كده؟؟؟؟حرام عليكى...هو مافيش أى دكاتره عمرهم شافوه؟؟؟؟؟؟؟؟؟"
طبعاً أنا ضربت لخمة و اتخضيت و سألته ليه بس؟؟؟؟قاللى :انتى مش شايفه رجليه؟؟؟ و ضلوعه؟؟؟ و عضمه؟؟؟ الولد عنده لين عظام شديد و لازم تلحقى تديله كالسيوم مكثف 3 مرات فى اليوم لمدة 3 شهور و بعدين نبقى نشوف ايه الوضع..........طبعاً أنا قلبى وقع فى رجليه و اترعبت و قلتله حاضر
المهم بأحكى لأخويا,دكتور باطنه, قاللى كان لازم يعمله أشعه و تحاليل قبل ما يقول لين عظام.
سألت واحد قريبنا دكتور عظام شاطر أوى ما شاء الله قاللى أعمله اشعه على الساق و تحليل دم....عملتهم طبعاً و وريتله النتيجه,قاللى الولد سليم و زى الفل و اللى عنده ده اسمه physiological rickets يعنى لين عظام فسيولوجى أو طبيعى و بييجى للأطفال أول ما يمشوا(أنا ابنى مشى متأخر) و بيروح بالوقت و مش محتاج أى أدوية!!!!!!!!!!!!!!
و فعلا وقفتله الكالسيوم اللى كان عمال يبلبعه ع الفاضى و الولد دلوقتى ما شاء الله عمره 5 سنين و كويس الحمدلله
هو ده الموقف..........ايه رأيكم بقى؟؟؟؟ فيه دكتور محترم يعمل كده؟؟؟؟
ربنا يسامحه....أنا كل ما أفتكر الخضه اللى خضهالى,أقول الله يسامحه
ازيكم يا جماعة عاملين ايه
كنت عايزة اتناقش معاكم فى موضوع التطعيم اللى خارج وزارة الصحة
انا متابعة مع دكتور اسمه جمال البطران فى اخر فيصل
وطعمت معاه تطعيمات خاصة يعنى زى
الروتا ودا كان ب 500 جنيه تقريبا
والجديرى ب 250
والانفلونزا البكترية(غير الفيروسية) اسمها الهيموفلس 3 جرعات كل جرعة ب 100
دلؤتى سمعت عن تطعيم جديد لفيروس اسمه النيمو كوكس
دا الفيروس اللى بيسبب الحمة الشوكية وتجرثم الدم وعدوى اغشية الدماغ
دا جرعتين كل جرعة ب 380 جنيه
يارييت يا جماعة حد يئولى ايه التطعمات الخاصة اللى اخدها
والاخيير دا بالذات حد من الدكاترة اللى بتابعو معاه ائلوكو عليه ولا محدش ذكره
مستنياكو
هاي يا جماعة أنا ان شاء الله هولد في شهر 6 بس كنت عايزة أسأل لو في حد بيتابع مع دكتور أطفال في 6 أكتوبر و ياريت الأسعار.
انا ما سمعتش عن التطعيمات دى ومش عارفة ياترى مهمة ولا ايه؟
ربنا يخليكي بنت مصر....اسعدني حضورك جداااااا
ربنا يسامح الدكاترة ...ساعات بيوقعوا قلب الواحد وفي الاخر يطلع مفيش حاجة ...حاجة تحرق الدم بصراحة
ياعيني عليكي ....تلاقي قلبك وجع في رجليكي اول ما سمعتي الدكتور قال كدة
يعني كان هيخسر ايه لو طلب تحاليل في الاول قبل ما يخضك بالشكل ده
المهم تكوني اتوفقتي في دكتور تاني كويس وفي انتظار خبرتك اللي انا شخصيا بستفيد منها كتير
ازيك يا عبير
بالنسبة للتطعيمات انا طعمت زيك الجديري والهيموفلس بس ماطعمتش الروتا لانه بيتاخد في الاول خالص وانا مكنتش اعرف عنه وقتها
وكمان مهم جدااا تطعيم الحمي الشوكية والكبدي الوبائي A
وتقريبا الاسعار زي ما انتي قلتي كدة
اعتقد دول اهم التطعيمات لانهم منتشرين في مصر
وربنا يكفينا ويكفي اولادنا شر الامراض
آخر مرة عدل بواسطة kouky5 : 28-04-2009 في 12:43 AM
الروابط المفضلة