السلام عليكم ورحمة الله ...
موضوع جميل ورائع زيك تمام خالتو .. انا هاتكلم .. بالعامى عشان اعبر احسن ومش عايزة ضرب هههههه
انا هاتكلم من وجهة النظر التانية .. لانى كنت مازلت من هواة الحاجات التكنولوجية دى وبحبها ومقدرش استغنى عنها ..
طبعا بدأت الكلام ده وانا بنت فى بيت اهلى واول مانتشرت كنت فى مرحلة المراهقة وانتو عارفين بقى .. المراهقين بيكونو متمردين وبعيدين عن البيت خلقة .. كمان متمسكين برأيهم جدا .. وانا للاسف كنت كده .. جدا
الاهل خاصة بابا كان بيشوف الموبايل والانترنت بالخصوص على انه شيطان كبير .. يمكن من كتر البلاوى اللى كان بسمعها عن سوء استخدامه .. كمان المشكلة انه فى الوقت ده .. واعتقد مازال قليلا .. الاولاد "الكبار " بيفهمو فى التقنيات دى اكتر بكتير من اهاليهم !!! فالاهل "الكلام ده كان بدايات القرن" مكنش عندهم ثقة فى نفسهم انهم يقدرو يتحكمو فى الموضوع .. كمان مكنش عندهم ثقة فى اولادهم انهم هيستخدمو التكنولوجيا دى دايما صح ! ومن هنا المشاكل ....
فى النهاية التكنولوجيا هى اللى انتصرت .. طبعا
.. هما الاهل هيتحدوها ازاى ؟؟!! وبعد فترة بقى كل واحد مننا "الابناء" زى الوضع اللى بتحكى عنه كده تمام .. الفرق هو ان بابا اما يغضب ويقول : كل واحد يقفل "الزفت" اللى فى ايده ده اما اكون قاعد معاكم .. كلنا طبعا كنا بنقفل كل حاجة ..احتراما ليه ..
طبعا ماما .. ههههههههه .. اللى كان فارق معاها جدا هو احنا بنعمل ايه ؟؟ بنستخدم الكومبيوتر ولا الموبايل ده فى ايه ؟؟ اقصد الموبايلات المتصلة بالانترنت ..
المشكلة من وجهة نظرى - بعد المقدمة الطويلة دى - احنا محتاجين حاجات كتير تواكب العصر اللى احنا فيه .. الحاجات دى للاسف اغلبها مادى ..محتاجين معلومات ..بسهولة .. محتاجين نعرف ناس غير اللى مجبرين نتعامل معاهم .. ناس نستفيد منهم ونفيدهم وانا مش باتكلم على التشات والهيافة دى .. انا باتكلم على الحاجات المفيدة تقنيا وعلميا .. يعنى كل العالم جوه اوضتى ..
فى المقابل "بالنسبة للمراهقين " الاهل شغالين اوامر ونواهى واعتراضات !!!!!!
افتكر دلوقتى الوضع اتغير الى حد ما .. لان الاهل بقو يعرفو يتعاملو مع الاجهزة دى من غير مشاكل .. يبقى مشكلة التنظيم .. تنظيم الوقت ..
زى انا وزوجى كده "لان ابننا لسه صغير" كل واحد عنده تابلة ولاب توب وموبايل او اكثر من موبايل وطبعا بيتابع حاجات فيهم كلهم .. لكن متفقين على وقت محدد نقفل كل حاجة عشان نقعد مع بعض وبس .. وابنى ان شاء الله اما يكبر هيدخل فى النظام ده هو كمان .. وبث
موضوع انه بيقرب البعيد ويبعد القريب .. هو طبعا بيقرب البعيد ولولاه مكنش التواصل معاكم ومع اهلى هيكون كده وانا باخر بلاد الدنيا .. اما يبعد القريب .. المفروض ننظم ونصر على النظام منعا للاضرار دى .. وبث
الروابط المفضلة