أكتشفت زوجي في الاتوبيس ................. قصه حقيقيه

[ام اروى 86]

كده تعجبينى
بس ابوس ايديك كملى ولو فصل واحد
انا مش هاعرف انام من قلقى على منى
ربنا يسترها

[omrody2005]

ملحوظه :اي سطر باللون الاحمر هو تعقيب للكاتبه علي الاحداث

وعلي فكره عضوة سألتها انها كدة بتفضح صاحبتها

ردت الكاتبه بأن مني هي التي طلبت من مشاعر ان تكتب قصتها وبالتفصيل الممل

ورجتها ان تترك اسماء سامح وسماح حقيقيه وتغير الباقي انتقاما منهم





الجزء الثامن




جفونها ثقيلة لا تستطيع فتحها ورأسها يدور بشدة آخر شىء تذكرته الكوب الذى وقع من يدها ونظرات من حولها
جسمها متثاقل عن الحركه فحاولت ان تحرك أصابعها وتفتح عينيها ببطىء شديد وهنا سمعت صوته وكأنه آتى من بعيد
حمد الله على السلامة: فتحت عينيها فرأت سامح يجلس بجوارها على حرف السرير ويمسح على كفيها وينظر اليها بترقب
ثم فتحت عينيها أكتر لترى المشهد بوضوح: سماح .. محمد.. أم سماح .. واحد متعرفوش
تكلمت سماح:حمدالله على السلامه يا منى

أبتدت منى تنظر حولها وعرفت المكان بسرعه:أنها فى غرفة سامح وعلى سريرة
وهى تحرك رأسها أكتشفت انها بدون الحجاب وشعرها متناثر بجوارها على الوساده
فزعت جدا ومن شدة الفزع حاولت الجلوس ولا تستطيع من شدة الصداع وتقول ببطىء :أنا ايه اللى حصلى

سماح جريت عليها :أستريحى يا منى
منى مكرره:أيه اللى حصلى

وتكلم الرجل الغريب:حمدالله على السلامه يا آنسه منى
منى بخوف وهى تمسك برأسها :حد يقولى ايه اللى حصل

جعلتها سماح تستلقى على السرير مره أخرى وقالت :متخافيش يا منى أنتى تعبتى شويه وجبنالك الدكتور
تكلمت أم سماح :متخافيش يا بنتى

تابع الدكتور حديثه :متقلقيش يا آنسه عاوز أسألك سؤال بس أسترخى كده علشان الصداع ميزيدش
تحرك سامح ووضع وساده كبيره تحت رأس منى بمساعدة سماح لتستطيع الجلوس

الدكتور: أنتى بتشتكى من أعراض السكر من أمتى



عدى يومين بعد الموقف ده وسماح أتصلت بمنى وبلغتها
ان محمد قابل باباها وأتفقوا على كل حاجه وحددوا معاد الخطوبه بعد أسبوعين علشان يكون سامح شال رباط ذراعه وبقى كويس
منى بتحب سماح جدا وبتعتبرها زى اختها علشان كده فرحتلها جدا كأنه فرحها هى
طبعا سامح بعد منى ما جبتله نقطه كان عامل مقموص ومش بيكلمها ولا رسائل ولا اى حاجه
طبعا منى مش لاقيه حاجه مناسبه خالص للحفله وبعد مناقشات للميزانيه مع مامتها قررت تأجر فستان مناسب
مكنش فيه حل تانى

منى لفت الدنيا على كعوب رجليها لحد ما لقت الفسان المناسب شكلا وسعرا وحجزته وجابتله طرحه حلوه تليق عليه
طبعا المكالمات شبه يوميه بين منى سماح فيما يخص تجهيزات الخطوبه والفستان والشعر والميكب وخلافه ( أه يا متبرجه)
وكل مره كانت سماح تأكد على منى أنها لازم تروحلها بدرى علشان تروح معاها الكوافير
وطبعا صاحبتنا كانت واخده اذن من مامتها فرح صاحبتها بقى ومامتة منى كانت بتحبها تروح كل أفراح العالم يمكن تلاقيلها عريس مناسب ( أم طيبة) أدتلها اذن مفتوح

وفى الكوافير حصل أكبر تنازل من منى لما رضخت لأصرار سماح وقلعت الحجاب
وبعد ما طلعوا من الكوافير واتجهوا لركوب عربية العريس كانت أول مره تطلع منى قدام الناس من غير حجابها علشان كده كانت باصه فى الارض ومش قادرة تبص فى عيون الناس اللى يعرفوها أم سماح ومحمد وسامح
أم سماح ومحمد كانوا مشغولين مع العروسه مخدوش بالهم اما الاخ الاخير فضل مركز معاها شويه
أتجهوا كلهم بصف العربيات للقاعة
وكان الحفل بالنسبالهم جميل وراقى وكل حاجه

( بالنسبالى طبعا بموت فى الافراح الاسلاميه)

كل عائله اخدت مكانها المفروض طبعا منى بما انها انتيمة سماح انها تبقى جنبها على طول
لكن اللى حصل عكس كده منى مش متعوده تبقى محط أنظار من حد فأخدت ركن وقعدت فيه لوحدها
:ايه ده مسورة بنات ضربت كل دى بنات عاوزين يتجوزوا اللى بتستعرض نفسها رايحه جايه واللى بترقص واللى بترقص برضه وكانت من ضمنهم ياسمين ( فاكرينها ) جيران بقى

وطبعا طالما شافت ياسمين يبقى لازم تشوف سامح علشان ياسمين بتبرم من اول الحفله وراه
سامح بحث عن منى بنظرة سريعه ووجدها بسهوله تراقبهم من بعيد فتعمد أغاظتها ووقف جنب ياسمين يكلمها ويضحك معاها وصاحبتنا قاعده تاكل فى نفسها

شويه وخففوا الانوار علشان العريس والعروسه يرقصوا مع بعض سلو
كلوا قام يرقص مع كلهن وبما ان سامح كان واقف جنب ياسمين ... أنتوا عارفين بقى

منى حاسة أنها وحيدة جدا وفجأة كل الافكار اللى تعكنن اى حد قررت تهاجمها أفتكرت نفسها من وهى صغيرة وهى لوحدها فى المدرسه والجامعه والبيت وهنا كمان
فكرة انها تنسحب بهدوء وتمشى بس خايفه سماح تزعل منها ... لا تزعل ايه دى اصلا مش حاسه بوجودى مشغوله مع عريسها وبصت لسامح وهو مع ياسمين .. وده كمان مش هيحس انى مش موجوده ..وأخدت شنطتها ومشيت ودموعها بتتلكك علشان تنزل
خرجت من القاعه ونزلت السلالم ووصلت لجنينة الفندق وهى بتفكر هتروح ازاى فتحت شنطتها علشان تطلع الطرحه وتشوف هتلبسها ازاى كده من غير مرايا

منى ...التفتت منى لقت سامح جاى وبينده عليها رايحه فين قطعتى نفسى
أول ما شافته دموعها اللى كانت بتتلكك نزلت

سامح : ايه ده ..دموع .ليه
منى بتمسح دموعها :مفيش بس مخنوقه شويه
سامح :طب ماشيه ليه
منى :كفايه كده هروح
سامح هو انتى لحقتى مش كفايه قاعده لوحدك كمان ابص ملقاكيش كده
منى بسخريه :معلش اصل محدش فاضيلى .. روح يلا ارجع ..تلاقى ياسمين بتدور عليك
سامح بابتسامه: اااه علشان كده مشيتى ..
منى : لاء طبعا انت حر فى تصرفاتك ..انا ماشيه علشان مش عاوزه أتأخر لسه مش عارفه هروح ازاى
سامح :ده كلام وانا رحت فين
منى: لا مش عاوزه اعطل حد معايا
سامح أولا انا مش حد ثانيا انا مفيش ورايا حاجه
منى :ليه هى العروسه دى مش أختك
سامح : تعالى شوفيها نزله رقص مع محمد ولا دريانه بحد
منى بلاش دى ..مش خايف ياسمين تسأل عليك
سامح ببرود:متسأل وانا مالى بيها ... بروده نرفزها

منى بانفعال مفاجىء :يعنى ايه مالك بيها اومال كنت بترقص معاها ليه وحاطط ايدك عليها وواخدها فى حضنك ليه وعمال تضحك وتهزر معاها من الصبح ليه
هااا ما تكلم ..طبعا مش لاقى حاجه تقولها .. طبعا هتقول ايه علشان كده مكلمتنيش ولا مره من ساعة ما كنت عندكم تلاقيك كنت عايش حياتك معاها طبعا
والهدية بتاعتك دى هروح اكسرها مليون حته ولا اقولك هرجعهالك شكلها وصلتنى غلط و بص بقى انت ملكش كلام معايا تانى ورقمك همسحه من عندى و....أنت مبتسم اوى كده ليه شايف اراجوز قدامك

سامح:بحبك......وبحب غيرتك
منى : دموع دموع دموع

سامح هو بيمسح دموعها : متعيطيش يا حبيبتى.. قلبى بيتقطع لما بشوفك كده
منى بتبعده : اوعى بقى ملكش دعوى بيا قلبك ايه يا ابو قلبين أنت ويمكن يطلعوا تلاته ولا اربعه الله أعلم
سامح :هو قلب واحد بس والله ارجوكى صدقينى ده انا مصدقت لقيتك
منى أنفعلت تانى :بأمارة الاحضان والرقص والهزار مش كده
سامح :بصراحه انا كنت قاصد...فاكره اخر مره واحنا فى عربية محمد لما قولتى اه وماله يبقوا أصحاب... أضايقت منك اوى وحسيت انى مش فارق معاكى و مش غيرانه عليا
واتوقعت انك تفهمى ده وتحاولى تكلمينى تقوليلى اى حاجه لكن انتى معبرتينيش طول الاسبوعين اللى فاتوا
منى : يعنى انت اللى عبرتنى؟
سامح : لسه بقولك انى كنت زعلان

منى : يعنى كنت عاوزنى اقول ايه قدام محمد وسماح يعنى .. اقولك مين دى وبتكلمك ليه وعاوزه منك ايه ..اقولك متكلمهاش تانى ومتردش عليها ويبقى احسن لو تغير رقمك... أختك وخطيبها يقولوا عليا ايه
سامح : يقولوا عليكى بتحبينى
منى وهى بتحاول تمشى من قدامه: انت مستفز
سامح وهو بيمسك ايديها وبيلفها ناحيته: وانتى خوافه
.. خايفه ليه هه.. خايفه تعترفى بالحب ليه .. فاكرانى بلعب بيكى .. فاكرانى بتسلى ...مالك يا منى مرعوبه منى ليه كده
منى بدموع غززيرة :معرفش ..انا كده ..انا عمرى ما اتعاملت مع رجاله ..ومش عارفه اللى انا فيه ده صح ولا غلط

سامح وهو يقترب منها ويمسح على شعرها : سيبيلى قلبك وانت عمرك ما هتندمى ..أوعدك
بحبك والله العظيم بحبك
وأخدها فى حضنه فى غفله منها :دفعته عنها بلطف :ايه ده يا سامح انت ازاى تعمل كده
سامح تترسم على وجهه علامات التعجب: وفيها ايه هو أحنا مش بنحب بعض
منى : بس مش بالطريقة دى
سامح :اومال ايه هنحب بعض من بعيد لبعيد
منى: يعنى هو ده الحب من وجهة نظرك
سامح : لا مش هو ده الحب طبعا لكن الحب ده نبته لازم نرويها
منى : يعنى انت توافق لاختك بكده
سامح : ايه يا منى الكلام القديم ..أنتى من ايام الابيض وأسود ولا ايه

( أسود على دماغك مين شال الشبشب من جنبى)

منى : لو سمحت بلاش تريقه انا كده
سامح: وانا بحبك فى كل الاحوال بس خاليكى متفتحه شويه عشان نقدر نفهم بعض
منى : اللى انا اعرفه ان الحاجت دى بتحصل بين المتجوزين بس
سامح : حاجات ايه ..انا كنت عاوز اخدك فى حضنى بس
منى: بس انت مش جوزى علشان تحضنى
سامح بتريقه: انتى اخر مره شوفتى فيها فيلم كانت أمتى
منى: قولتلك متتريقش عليا
سامح تابع كلامه: يامنى دى مشاعر ...

( أخرس)

فى حد يعرف يقول لمشاعره اعملى ومتعمليش
أستخدم سامح كل أساليب التأثير الممكنه وأستخدم معها كل أسلحته ومفيش فايده منى ركبه دماغها ومصممه على الحب العذرى ... خلاص زهق منها

: خلاص يا منى براحتك انا مش هقرب منك تانى لحسن تفتكرى انى مش عاوز منك غير كده وبس
وأفتعل الزعل ورسم على ووجهه الضيق.......... (تصدق هعيط)
خلاص يا منى ممكن نرجع القاعه تانى
منى :لا انا هروح
سامح قولت مفيش مرواح لوحدك ..تعالى نرجع شويه الفرح لسه فى أوله ..وبعدين هستأذن من بابا اخد عربيته واوصلك وابقى ارجعلهم
منى باستسلام : طيب
دخلوا القاعه :ومشيوا لحد العروسين

سماح :كنتوا فين مش باينين يعنى..ووجهة كلامها لمنى: وانتى يا هانم انتى مش المفروض صاحبتى وتبقى واقفه جانبى رحتى فين
محمد بيغمزها :بس بقى متحرجيهمش يا سمسمه
سامح: والله انتوا الاتنين لايقين على بعض فعلا ايه الخفه دى كلها

وقفوا يضحكوا مع بعض شويه و...لحظه وراجع
راح سامح همس لفرقة البست وطلب منهم أغنيه سلو
لا تستطيع منى ان تنسى يده الممدوده لها وسماح بتدفعها للتشجيع ...كان موقف محرج جدا لولا ان أقبل العروسين للرقص ومعهم مجموعه من الشباب والبنات
أستسلمت منى لذراعه التى تطوقها وكلماته الهامسه التى لونت وجهها باللون الوردى على صوت فيروز

(طب كده فرقت ايه ماهو برضه حضنك )

[omrody2005]

وردي والحمد لله كان بعد الظهر الله يثبتني

ولكن قولي روحو ناااااااااااااااااااااامو

تعرفي انه في كلا القصتين عامل مشترك

أصدقاء السوء أو بالأحرى الصاحب ساحب .........

الله يثبتك وايانا غاليتي ام القادة ان شاء الله

دايما بكتب لك ان شاء الله لكي يكون لابنائك حظا طيبا من معرفك الاسم جميييييل ما شاء الله

وفعلا ملاحظتك صحيحه اكتر مشاكل صغارنا ان لم تكن منا (اهمال ابوين )بتكون الصاحب اللهم ارزق ابنائنا وبناتنا صحبه الخير والرضا منك يا الله


وصدق رسول الله صلي الله عليه وسلم

عن أبي موسى الأشعري رضي الله عنه قال: قال رسول الله صلى الله عليه وسلم: ( مثل الجليس الصالح والجليس السوء كحامل المسك ونافخ الكير، فحامل المسك إما أن يحذيك، وإما أن تبتاع منه، وإما أن تجد منه رائحة طيبة، ونافخ الكير إما أن يحرق ثيابك، وإما أن تجد منه رائحة خبيثة ). متفق عليه.

[omrody2005]

]

طيب الحمد لله على كده النهارده

اقوم اصلى ركعتين لله واللهم تقبلهم

نسلمى يا ام رودى وشكرا على الشاى والجاتو الموس

واضح ان حد فتن على وقالك انى بحبه جدا

ويا ريت الحلقه الى جيه تجبلنا لب ههههههههه

تقبل الله غاليتي وحبيبتي شرويت


وبالف هنا عليك يا حبي

بس ايه الزباين الطماعه دي هو انا هكي واجيب التسالي كمان

وانتم بتعملوا ايييييييه ههههههههههه

يالا علشانم خاطركم بس احلي صحبه

[omrody2005]

كده تعجبينى
بس ابوس ايديك كملى ولو فصل واحد
انا مش هاعرف انام من قلقى على منى
ربنا يسترها

سامحيني سامحيني ام أروي والله ما شفت ردك الا الان

انا بجد كنت المفروض اقوم لقراءة وردي من القراءن وكمان كنت خلاص فصلت

سامحيني مش هعملها تاااااااااااااااني هههه

[omrody2005]

الجزء التاسع



_____________________
مفيش خروج بعد كده أنتى فاهمه ولا لاء علشان تبقى بعد كده ترجعى بيتك نص الليل كويس يا هانم
:أنا كنت فى فرح وماما سمحتلى أتأخر
:سمحتلك تتأخرى مش تيجى نص الليل ...لاء وأيه حطالى هباب فى وشك ولا كأنك أنتى العروسه
:ده فرح هحط ايه يعنى
:شوفىى أنا صابر عليكى كتير أوى لكن توصل لحد انك ترجى البيت نص الليل لاااااا أحمدى ربنا ان امك واقفه بينا
الام : خلاص يا ابنى مش هتعمل كده تانى معلش حقك عليا أنا
أسمعى يا ماما من هنا ورايح البت دى مالهاش خروج تانى الا لما الدراسة تبدأ وانتى المسؤله قدامى
:يعنى أيه هتحبسنى فى البيت شهرين حرام عليك
:البنات المحترمه متقولش على بيت أبوها حبسه
أسمعى يا بت أنتى مفيش خروج تانى الا مع أمك وكبيرك أوى تروحى عند جارتنا
_____(أنا )
وبس سامعانى ولا لاء

منى دخلت أوضتها وهى مموته نفسها من العياط معقوله الليله الرومانسيه دى تنتهى النهايه البشعه دى
انا عارفه محدش هيقدر على أخويا ده ابدا لو مكنتش ماما موجوده وخاف بابا يصحى كان مد ايده عليا كان ايه بس اللى جابه عندنا النهارده كان يوم منيل

لما تجد منى متنفس بعد هذا اليوم الا زيارتى والجلوس على النت لفترات طويله
وأخبرت سامح بالموبايل بما حدث فأعطاها ايميله وأصبح كلامهم كله من خلال الشات فقط فلقد أصبح من الخطر الكلام على الموبايل خايفه حد يسمعها
فى هذه الفتره توطدت علاقتى بها جدا ووثقت بى أكثر وحكتلى على تفاصيل علاقتها بسامح من البدايه وحتى ذلك اليوم
ولكنها حكتلى ايضا شىء حدث من سامح أثناء حوارهم على الشات وسألتنى بسذاجه :هو كده حرام ؟
سامح :وحشاتينى يا منى قلبى
منى : وأنت كمان
سامح :أنا قولت نتكلم دلوقتى أكيد الناس عندك نايمه
منى : اه فعلا كده احسن
سامح : أقولك على خبر حلو
منى :قول
سامح :أعملى قبول للطلب ده وغمضى عينك
منى : ايه ده انت جبت كاميرا
سامح : عمرى ما فكرت أستعملها قبل كده.. بس واضح اننا معاكى هستعمل حاجات كتير أوى
منى : اول مره أشوفك من تلت أسابيع..تصدق حاسه ان شكلك أتغير
سامح :يعنى أوحشيت ولا أحلويت
منى : طول عمرك وسيم يا سامح
سامح : الله أكبر ما أنتى بتعرفى تقولى كلام حلو أهو.. أومال قافله الباب فى وشى ليه على طول
منى :بطل بقى ... وبعدين أيه ده انت كنت نايم ولا ايه
سامح : اه يا حياتى نمت شويه أول الليل علشان اعرف أسهر معاكى براحتى

...اه يا ما نفسى السهره دى كانت تبقى فى بيتنا
منى : هو حد مانعك ..فى ايدك تخلى علاقتنا رسمى
سامح :والله يا حبيبتى ده يوم منايا لكن أنتى عارفه لسه فاضلى شهرين وأخلص الجيش ويدوب هدور على شغل اجى اقولهم ايه بس
منى .. حاول تستعجل شويه يا سامح انا خلاص مش قادره على الحبسه دى
سامح بغمزة: قولى الحقيقه مش قادره على الحبسه ولا مش قادره على بعدى
منى : الاتنين
سامح :وحشتك يا منى
منى : اه
سامح :مش قادر انسى اخر مره وانا واخدك فى حضنى مش قادر انسى الحضن ده ابدا
سامح ::ايه سكتى يعنى ..مكسوفه ولا أيه
بذمتك مش نفسك تيجى فى حضنى تانى
منى :سامح قولتلك مبحبش الكلام ده
سامح : ليه هو انتى بتكسفى من الكتابه كمان هو انا شايفك يعنى ولا حتى سامع صوتك ..هتكسفى تكتبى اه حضنك وحشنى
منى : لا مش هقول كده
سامح: كده يا منى بقى انا حريص انك تشوفينى وانتى مستخسره حتى تقوليلى كلمه حلوه

منى : يا سامح مش هو ده الكلام الحلو
سامح:يا منى اى اتنين بيحبو بعض بيقولوا الكلام اللى مش عاجبك ده .. انتى كده مبتحبنيش

أظهر سامح علامات الحزن الممزوج بالغضب على وجهه وتابع : انا عمال اثبتلك حبى وانتى مش عاوزه حتى تدينى ريق حلو ..انا بجد مبقتش متأكد من مشاعرك..بصى يا منى لو حاسه انك اتسرعتى فى العلاقه دى قولى متكسفيش واوعدك اننا هنبقى اخوات
حتى لو كان قلبى هيموت عليكى حتى اتعذبت فى بعدك لكن مقدرش اكمل بالشكل ده وانا شايفك حاطه حاجز بينا دايما

منى بلهفه كتبت بسرعه: متقولش كده والله بحبك ومقدرش استغنى عنك
سامح وقد ظهر على وجهه المرارة والحزن:اللى بيحب حد بياخده كله على بعضه مش بياخد حاجه ويسيب التانيه علشان ككده انا عاوزك كلك على بعضك علشان بحب كل حاجه فيكى لكن انتى لاء يا منى انتى عاوزه صوت سامح قلب سامح من بعيد لبعيد وده مش حب يا منى دى انانيه
منى حزنت لرؤيته حزين ولكلماته الاكثر حزنا : لا يا سامح متزعلش منى كده انا والله بحبك ومش عارفه اعمل ايه علشان ارضيك
سامح : قولتلك قبل كده سيبيلى قلبك اسمعى كلامى هتحسى بالحب الحقيقى
منى :حاضر هحاول
سامح :مش بالكلام
منى :طب اعمل ايه
سامح :متحطيش بينا حواجز انتى ملكى وانا ملكك
منى : حاضر
سامح :تعرفى يا منى قلبى انا كل يوم بحلم بيكى وانتى معايا وانتى فى حضنى مش قادر انسى اللحظه اللى كنتى معايا فيها مش قادر انسى تفاصيلك ريحة شعرك ..جسمك
منى :بس يا سامح بس انا لازم اقفل
سامح:منى تعرفى تجيبى كاميرا ..وحشينى ونفسى أشوفك

مشاعر:أنتى عبيطه ولا بتستعبطى لسه بتسألى هو كده حرام ولا لاء
طبعا حرام حرام حرام جدا والموضوع كله من اوله للاخره حرام
أوعى تعملى كده اوعى تجاريه اوعى تجيبى الكاميرا دى

:ليه ده عاوز يشوفنى بس

:والله هو انتى فاكره انه عاوزك تجيبى كاميرا علشان يشوفك..انتى ايه معندكيش عقل

الواد ده مش بيحبك يا منى الواد ده عاوز منك حاجه معينه مش اكتر من كده
منى:يا سلام ياعنى هو هيتعب نفسه كل ده علشان عاوز منى انا الحاجات دى طب ليه ما الحاجات دى كتيره فى الشوارع وهو الف واحده تحب تصاحبه
:لا يا ماما الصنف ده بيحب يصطاد اكتر ما بيحب يشترى جاهز
لما يروح يشترى جاهز مش هيحس بأى مكسب اهى واحده بايعه نفسها للكل لكن لما يصطاد واحده كانت بتخاف ولد يقولها ازيك يحس بانتصار ويرضى غروره ومش بعيد يكون عامل عليكى رهان
منى : رهان يعنى ايه
:معرفش الله اعلم صحصحى كده للناس وراقبى ربنا قبل ما تراقبى اى حد تانى

[ام اروى 86]

ولا يهمك يا جميل
بس فى حاجه مش فهماها
هى فعلا اغمى عليها علشان السكر؟
اومال ايه النظرات المعينه الى شافتها بين سامح وسماح دى قبل ما يغمى عليها؟
معلش انا دقيقة جدا فى كل كلمه

[omrody2005]

الفصل العاشر

كلما زادت هى صلابه كلما زاد عناده وظل يبحث بشتى الطرق وسيلة تذيب صلابتها وتبعد خوفها منه عن مسار رغباته
وظلاا هكذا حتى أنتهت الاجازة وعادت الدراسة الحمد لله بنجاح منى بتقدير مقبول وسماح كذلك
وأنهى هو فترة خدمته العسكريه وعمل مع أبيه فى نفس المكتب الهندسى
وكان يوم السبت هو اليوم المثالى للمقابلات وكانت دائما المقابلات تكون جماعيه تجمع الاربعه فى البدايه ثم يتفرقوا فى اتجاهات مختلفه ومن كثرة ما كان سامح لا يركز الا فى طريقة تذيب بها صلابة منى نسى ان له أخت يراها بعينه تتأبط ذراع خطيبها وتميل عليه بميوعه وهى واثقه ان اخيها فى عالم اخر
وكانت ضمن هذه المقابلات ..مقابله فى السينما
دخلا السينما معا ولكن عندما انطفأت أنوارها كل شاب أنشغل بفتاته
كان فيلم رومانسى بمقاييس منى بنسبة مائه فى المائه حتى انها انفعلت جدا ووكانت ترى نفسها مكان البطله
وسامح هو البطل وهما يتبادلان الغرام ..حبيبى يا عاشق يا حر زى الطير.. شاور هقول حاضر للحب قلبى أسير
اذن هذا هو الحب فعلا البطله والبطله يتعانقان بشكل حميمى
:يعنى سامح معاه حق ولا ايه هو ده الحب فعلا
ايوه هو قالى كده الحب فيه كل حاجه ..أهو البطل والبطله لسه متجوزوش ورغم كده بيحصل بينهم كل حاجه وفى اخر الفيلم اتجوزها ومقالش عليها حاجه وحشه
يعنى انا فعلا متعصبه اوى معاه وممكن يكون معاه حق
(وهل نأخذ شرعنا من الافلام يا منى )
وكأن سامح قد قرأ أفكارها فمد يده يعبث بيدها فلم يجد ما كان يجده فى السابق من صد
فعلم ان الطريق بات مفتوحا امامه وان الفيلم فى وقت قصير جدا جاب نتيجه معاها اكتر من كل محاولاته فيما مضى ...فحاول ان يتطاول اكثر فانتفضت منى من مكانها وكانها كانت تحلم
وابعدت يده عنها ..فكان العقاب منه سريعا قام هو الاخر منتفضا وعكنن على محمد وبدل مكانه مع سماح
لم تتوقف دموع منى فى الوقت القصير المتبقى من الفيلم
حتى انتهى الفيلم وكان الاربعه اتفقوا انهم بعد الفيلم سيذهبون الى مكان ما
ولكن سامح اكمل عقابه وأستأذن وأنصرف بدون تبادل كلمه واحده مع منى
أخدت سماح منى على جنب بعيد عن محمد وسألتها :
فى ايه يا منى ماله سامح
منى بدموعها :انا خلاص يا سماح مش عارفه ارضيه
سماح عرفت من منى كل التفاصيل ما حدث فى داخل القاعه السينمائيه وحاولت ان تقنعها بالبقاء معهم ولكنها رفضت وانصرفت
محمد :فى ايه يا سماح حصل ايه
سماح :تعالى واحكيلك واحنا ماشيين
محمد :سمع من سماح ما دار بين سامح ومنى وقد كان تعليقه غريبا ومن الواضح انه تسرع به : معاها حق هى كده بنت محترمه
سماح بصوت عالى ونظرات حاده:نعمممم يا سى محمد يعنى انا بقى اللى مش محترمة
أحتوى محمد الموضوع وعالجه سريعا:لا يا حبيبتى مش قصدى احنا حاجه تانيه احنا مخطوبين وهنتجوز قريب
سماح :اه افتكرت
محمد: طب بقولك ايه طالما بقى مشيوا ما تيجى
سماح بدلال : لا يا سيدى المره اللى فاتت ربنا ستر
محمد :متقلقيش انا خلاص بقيت حريف
ألتزمت منى بدراستها أكثر فى هذه السنه نظرا لابتعاد سامح عنها ولكن كانت فى حاله صعبه جدا فهى لا تستطيع فراقه فهو أمتلك قلبها فعلا
حاولت كثيرا ان تتصل به فلم يرد عليها وعندما كان يرد كان يتكلم بقتضاب شديد :أنتى اللى خالتينى ابعد عنك
حاولت ان تلين قلبه بكلمات الحب عن طريق الرسائل لكن مهما كتبت له كان كل مره اجابته واحده (مش بالكلام )
كانت منى دائما فى وحده وهى وسط الناس قلبها منشق نصفين بين حبيبها وبعده عنها وبين حيائها ودينها
والذى زاد من وحدة منى اكثر غياب سماح المتكرر عن الكليه والمحاضرات فقد كانت سماح تأتى نادرا جدا وعلاقتهما اصابها الفتور وحتى عندما التزمت سماح بالحضور قبل أمتحانات نصف العام كانت غير طبيعيه بالمره ليست هذه سماح التى تعرفها منى ابدا
دائما فى شرود وتفكير حاولت منى كثيرا ان تعرف ما بها ولكنها لم تستطع
منى قلبها طيب كانت دائما تحاول ان تدخل البهجه على قلب سماح : كل سنه وانتى طيبه يا سمسمه
سماح بحزن: وانتى طيبه يا منى
منى : قوليلى بقى العربيه الحلوه دى هدية بابا ولا محمد
سماح : محمد
منى : وزعلانه ليه كده المفروض تفرحى
سماح بشرود :أفرح
منى بقلق :مالك يا سماح احكيلى ده انا صاحبتك الانتيم
..مالك يا حبيبتى فضفضى معايا
سماح بدأت دموعها تنزل غصب عنها :أسكتى يا منى سيبنى فى حالى
منى مسكت ايديها ومسحت عليها بحنان ..لو مقولتليش انا طب هتقولى لمين اتكلمى يا سماح فرجى عن نفسك
سماح ببكاء وصوت مخنوق :سامح مش هيعرف ؟
منى وقد غاص صوتها فى حزن شديد :سامح ..هو سامح بقى بيكلمنى اصلا من يوم خروجة السينما
سماح :أوعدينى الكلام ده يبقى سر بينى وبينك
منى :أوعدك

[omrody2005]

[omrody2005]

الجزء الحادي عشر


منى خبطت على صدرها من شدة الانفعال والالم:ينهار أسود بتقولى ايه يا سماح
سماح ببكاء:ارجوكى يا منى كفايه انا فيا اللى مكفينى

منى :معقوله ...طب وهتعملى ايه دلوقتى
سماح مسحت دموعها وتكلمت بأصرار:لازم يوافق يتجوزنى مفيش حل تانى
منى صعقت من الكلمه:يوافق يعنى ايه هو مش عاوز ولا ايه

سماح:بقاله فتره بيتهرب منى وكل ما أفتح معاه موضوع الجواز يقولى مش فاضى ويأجل الكلام لبعدين
لكن انا المرا دى مش هسكت انا هروحله بكره ولازم يحدد موقفه معايا ..مش هو كان بيقولى (حبنا نبته لازم نرويها )أهى النبته كبرت وبقت شجرة وفروعها لفت حوالينا ومينفعش حد يسيب التانى

جلست منى شارده تردد داخلها (حبنا نبته لازم نرويها ) يااه ..كان سامح دايما بيقولى الجملة دى معقوله ..معقوله هو كان يقصد كده معقوله سامح يطلع هو كمان كده معقولة

زارتنى منى فى ذلك اليوم ودعتنى على ندوة عندها فى الكلية كانت ندوة دينية ثقافية والحضور مفتوح ووعدتها بالحضور
بصراحه انا مكنتش بتحمس لندوات الجامعه دى كانت كلها أخوانيه وانا كنت بميل للمنهج السلفى بس قولت اروح علشان منى تتحمس وتحضر يمكن تسمع كلمه ربنا يصلح حالها ويمكن تتعرف على بنات ملتزمه
_________________________

سماح غاضبه ومنفعله :يعنى ايه الكلام ده
محمد:يعنى مش هينفع كل ما تشوفينى تكلمينى فى موضوع الجواز ده ..أنا زهقت
سماح :دلوقتى زهقان منى يا محمد..فاكر ملا كنت تتمنى بس نظرة رضا منى ولا نسيت
محمد:شوفى يا بنت الناس لو فضلتى كل ما تشوفينى تعملى الفيلم ده يبقى انتى كده بتنهى علاقتنا ..
سماح أقتربت منه ووضعت يدها على يده وتكلمت بتوسل:انت مش وعدتنى اننا هنتجوز قبل الامتحانات
محمد شال ايده وابتعد عنها :مش هينفع يا سماح
سماح بتوسل أكبر :ليه
محمد بتأفف:بصى يا سماح انا لحد دلوقتى مخلفتش اى وعد معاكى .خطوبه وخطبتك شبكة وجبتلك شكبه مفيش بنت فى مصر تحلم بيها ...طلبتى عربية هدية عيد ميلادك جبتلك ..عاوزه ايه تانى
سماح :عاوزه نتجوز ..نكتب كتابنا طيب

محمد :انتى بقيتى زنانه اوى على فكره..جواز ايه وبتاع ايه..هنعمل ايه بالجواز يا حبيبتى ما احنا كده حلوين
سماح ضربت وجهها :يعنى ايه مش هتجوزنى ...

محمد أخدها فى حضنه :أهدى بس يا حبيبتى ..انتى طلبتى حاجه وانا معملتهاش لو عاوزه اجيبلك نجمه من السما اجيبلك ..
سماح بتدفعه عنها :انا مش عاوزه نجمه انا عاوزاك تسترنى
محمد بسخريه:استرك ايه بس ايه الكلام القديم ده
سماح تنتحب وتبكى بشده :ده جزاتى يا محمد ده جزاتى انى حبيتك تضحك عليا وتخدعنى طب راعى انى اخت صاحبك
..ياريته مكان صاحبك ياريته ما كان دخلك بيتنا
محمد بسخريه وانفعال:وانتى كنتى متخيله واحد زى اخوكى ده هيصاحب مين يعنى غير واحد شبهه

سماح بصراخ:اخرس متكلمش على اخويا كلمه واحده
محمد :اخوكى مين ده اللى اتكلم عليه يا ماما اخوكى اللى كان عاملنى بنك التسليف بتاعه أخوكى اللى كان بيقعد طول الليل يحكيلى حواديت أزاى أوقع البنات
وأدينى أهو طلعت تلميذ شاطر

سماح تفطر قلبها وكادت تختنق :بقى بتعمل فيا كده علشان حبيتك
محمد وهو يلوح بيديه كأنه على مسرح:لالالا متصدقيش نفسك أوى كده ..أنتى اللى كنتى معندكيش مانع من الاول ولا نسيتى
صرخت سماح انا كنت فاكره انك بتحبنى مكنتش اعرف انك ندل

يا سلام طب ماهى صاحبتك بتحب أخوكى لاء وأيه أخوكى ده الاستاذ كمان ..رغم كده مش عارف يطول منها حاجه
يبقى يا أموره انا اللى ندل ولا أنتى اللىىىىىىىىى...
وضعت يدها على رأسها واخذت تبكى بشده :يعنى ايه يعنى طلعت فى الاخر انا اللى مجرمه

محمد اقترب منها وأمسك يدها وتكلم بنعومه:سمسمه يا حبيبتى ليه بس كده ليه دخلتينا فى المتاهات دى ما أحنا كنا حلوين وعايشين حياتنا كويس ..

سماح نظرتله نظرة حقد:انت ازاى بتحط عينك فى عين اخويا وانت بتعمل كده مع أخته
محمد بتعجب:زى ما انتى بتحطى عينك فى عينه بالظبط وانتى بتبقى لسه فى حضن صاحبه

خرجت سماح من عند محمد وهى تصرخ فيه أنا هوريك يا محمد انا هعرفك انا ممكن اعمل ايه مش أنا اللى تضحك عليا وترمينى ....

خرجت والكره والحقد يملىء قلبها
وقفت امام السياره وقبل ان تفتح بابها تذكرت انها كانت ثمن علاقتهما الملوثه
وقفت متردده :لاء مش هسيبهاله يعنى ايه هياخد كل حاجه ببلاش وانا هطلع من المولد بلاحمص

وقادتها بسرعه جنونيه لا تكاد تفرق بين خطوط الطريق ودموعها وهى يتردد فى عقلها جملة محمد
(طب ماهى صاحبتك بتحب أخوكى لاء وأيه أخوكى ده الاستاذ كمان رغم كده مش عارف يطول منها حاجه
يبقى يا أموره انا اللى ندل ولا أنتى اللىىىىىىىىى)

وأخذ شيطانها يردد لها جملة واحدة (منى مش أحسن منك مش لازم تبقى أحسن منك )



لحد هنا وانا راجعه لكم الساعه 9 ان شاء الله لاني لازم اعمل الغداء للبنات

ومنها لله علي اللي هتعمله سماح في مني