كيفكم ياقمرات.. يازميلاتي الرائعات.. ويا أستاذتي الحبيبة..؟؟
انشغلت عنكم بسبب خطوبة أخي ولله الحمد والفضل تمت وفرحنا له..
وعقبال ما نفرح بحفلة تخرجنا..
****************
أحاول أرجع لكم بردود بإذن الله..
وأتمنى منكم تساعدوني في حاجتين عند مهند (سنتين وشهرين):
الأولى: الحمام - تكرموا - الآن لنا شهرين تقريبا من لما بدأت معاه.. لكن للأسف في منتصف المدة ولما بدأ يتكلم من نفسه ويقول سافرت عند اهل زوجي وكنا معاهم في نفس البيت وزحمة وضيوف والغرفة والحمام ما كانت خاصة لنا.. فاضطريت اني ارجع البسه الحفاض بكل أسف طوال اليوم خاصة انه بيخرج كثير مع ابوه.. المهم لما رجعنا ما كأني علمته شيء.. الآن ما يتكلم أبدا إلا بعد ما يعمل وأحيانا مايتكلم نهائيا.. حاولت بالهدايا والنجوم والوجه المبتسم والزعلان.. وكله.. ومدحته كثير عند ابوه واهلي لما بيعمل لما انا آخذه على الحمام.. لكن برضه ما بيقول..
أخاف اني استعجلت عليه وعمره لسه صغير.. ياريت تفيدوني وهل لازم أستخدم عقاب مثلا؟؟ انا جربت احرمه من بعض أشياء بسيطة يحبها.. لكن خفت أعاقبه أظلمه وتصير مشكلة بدل ما أعلمه..
الشيء التاني: العناد.. بدأ معاه من لما رجعنا برضه من السفر.. لأن في اطفال كثير هناك وتعلم منهم بعض الحركات المرفوضة بالنسبة لي..
وصار يعاند كثير وما يسمع كلمتي على طول..
فما افضل طريقة لعلاج العناد من البداية قبل ما يتطور..
طولت عليكم سامحوني..
انا توقعت اننا حندرس هذه المشكلتين في الدورة لكن للاسف ماكان لها نصيب..
الروابط المفضلة