السلام عليكم ورحمه الله وبركاته
الاخوات العزيزات
النهارده غرزه جديده هي غرزه الشطرنج
وهي بتكون زي لوحه الشطرنج
نشوف مع بعض ومع صور ننوش
من أسمها نعرف أن
1)شكلها هيكون زي مربعات الشطرنج مربع أسود ومربع أبيض وفي السطر التاني تحت المربع الأسود مربع أبيض وتحت الأبيض أسود لكن في الشغل عندنا هنا هيكون المربع الأسود مشغول والمربع الأبيض فاضي مفيهوش شغل
2)مساحة المربعات لازم تكون زي بعضها علشان تكون الغرزة منتظمة وشكل الشغل حلو
*نمد خط موازي لشريط اللاسيه وهنعمل فستونات عليه متشبكة بشريط اللاسيه اللي تحت زي بداية غرزة النسيج وهنستعمل خط الفستونات ده أساس نشبك فيه غرزة الشطرنج علشان تكون ثابته
* عند نقطة نهاية خط الفستونات بنرتفع عنها حوالي نصف سم ودي متحددة في النماذج اللي بنشتغل عليها ومن النقطة دي بنمد خط تاني موازي لخط الفستونات اللي عملناه في الأول زي الصورة اللي جايه
* علشان نحكم الغرزة ونضبطها نبدأ أول مربع فاضي ودة بشغل عدد من الفستونات في مساحة نصف سم على الخط التاني
وبعدين نبتدى فى مد اربعه خطوط جنب بعض وعمودية علي الخط التاني وخط الفستونات اللي عملناه يعني بنرفع الخيط والأبرة لأعلى وبنمرر الأبرة من خلف الخيط التاني ونمر بها من الخلف داخل الفستونه اللي في أول السطر
ونطلع نمرر الأبرة من خلف الخط التاني ونمررها من الخلف في داخل الفستونه التانيه ونلف من خلف الخط التاني ونرجع نمررها في الفستونه التالته من الخلف ونخرج منها من فوق الخط التاني وأخيرا" نمررها في الفستونه الرابعه ونخرج منها من فوق الخط التاني وبكدة يكون عندنا وثلاثة خطوط من خلف المفرش وأربع خطوط من وجهه وناخد الرابع نلضم فيه أول فستونه في المربع الفاضي اللي بعد كدة
و بشتغلنا عدد من الفستونات على مساحة نصف سم علشان تكون في المربع الفاضي وبعدين نعمل مربع مشغول وهكذا لنهاية السطر
*****ملحوظة مهمة ****
لازم نرخي الخيط وأحنا بنشتغل الأربع خطوط العمودية علشان تدينا الشكل العمودي المطلوب
* نمرر الخيط فى شريط اللاسيه علشان نمد الخط التالت
*****ملحوظة مهمة ****
1)اذا كان المربع الاول فى السطر الاول مشغول بالخيط فلازم يكون المربع الذى فوقه فاضي وهكذا يكون المربع الثانى فى السطر الاول فاضي فيكون المربع اللي فوقه مشغول وهكذا
2) لما نشتغل مربع مليان فوق مربع فاضي في السطر التالت والأسطر كلها اللي جاية لغاية نهاية الشغل هنلف الأربع خطوط حول الخط الجديد من غيرما نمرر الأبرة داخل الفستونات اللي في السطر اللي تحت يعني الشغل في الفستونات هيكون في السطر التاني فقط
ودة الشكل النهائي للغرزة
اتمني انكم تكونو متابعين
كتبت بواسطة bosy_md
الروابط المفضلة