السلام عليكم قمراتى
كل سنة وانتم طيبين مقدما برمضان وان شاء الله قرب رمضان حنتكلم عن رمضان شوية لان ده اهم شهر فى السنة
نهاردة حنتكلم عن الروتين اليومى للبشرة زى ما كانت ميويا بتسال
الروتين اليومى من اسمه بيتعمل كل يوم يعنى مش زى ماسكات مرة او مرتين فى الاسبوع
طيب هو الروتين اليومى بيتكون من ايه ؟؟؟
1 - غسول للبشرة
2 - تونر
3- كريم نهار
4 - كريم ليل
5 - كريم عين
تعالوا نتكلم على كل حاجة بالتفصيل ...
الغسول :::
ده بدل الصابون بيتغسل بيه البشرة كل يوم عشان ينظف المسام والبشرة من التراب واى حاجة تسد المسام
بيستخدم مرة الصبح ومرة بليل او مرة واحدة لما بترجعى من برا وانا بعمل كدا بدل ما كل شوية اغسل بيه بيخليه مرة واحدة لما برجع من الشغل لانى باقى اليوم بتبقى فى البيت
الفرق بينه وبين الصابون ان الصابون فى مادة قلوية تنشف البشرة وتخليها جافة وطبعا تضرها
اما الغسول مش بيكون فى المادة ديه عشان كدا بيحافظ على توزان البشرة ومش تنشف
الغسول من اى ماركة بيبقى منه للبشرة العادية والدهنية والجافة والمختلطة انتى حتجيبى اللى بيناسب بشرتك مينفعش تكون بشرتك دهنية وتستخدمى للبشرة الجافة
لان مثلا بتاع البشرة الدهنية مش حيبقى فى زيوت وبتاع جافة حيبقى فى حليب او زيوت تتطرى البشرة
عامة احسن الانواع اللى بيبقى من مواد طبيعية زى الحليب والنعناع والبرتقال واعنب طبعا ده بتبقى منتجات من ماركات تعمل غسول من حاجات طبيعية
طريقة استخدام الغسول :: بيبقى اما حاجة سائلة تتحط على الوش زى الصابون وتغسلى وشك بيه .. او بيتحط على قطنة وتتمسح بيه الوجه
عامة بيبقى مكتوب الطريقة على العلبة
التوتر ::
ده الخطوة الى بعد الغسول انك خلاص غسلتى وشك بالغسول ونظفتى المسام يبقى خطوة اللى بعدها التونر
وظيفة التونر انه يقفل المسام عشان متكونش فيها دهون وتعمل بقى رؤؤس السوداء وحبوب
التونر نفس نظام الغسول بتختارى اللى مناسب لبشرتك يعنى لازم تعرفى الاول نوع بشرتك عشان تختارى الروتين الصح
طبعا ماء الورد من حاجات اللى تعتبرتونر وحلوة جدا ومفيدة.. بحب اوى استخدام ماء ورد زى التونر لوشى بعد الغسول
طريقة التونر واحدة فى كل منتجات انك تحطيها على قطنه وتمسحى بيه الوجه والرقبه
كريم النهار :::
الخطوة الثالثة انك غسليتى بالغسول وحطتى تونر حتحطى بقى كريم النهار
الاول هو كريم نهار بيعمل ايه ؟؟
طبعا هو بيرطب البشرة يعنى يعتبر ده كريم مرطب بس بيحمى كمان من التراب والشمس وعوامل خارجية وبيبقى فى نسبة صن بلوك بتبقى 15
بيتحط على الوجه والرقبة سواء حتقعدى فى البيت او حتخرجى
يعنى لو انتى قاعدة فى البييت بتحطيه عادى كانه مرطب
لو انتى حتطلعى بردو بيتحط عادى وتسبيه شوية ولو عايزة تحطى ميكب بتحطى وبيبقى مفيد انه بيرطب البشرة ويعمل زى حاجز بين ميكب وبشرتك مش بيخلى ميكب يتشرب فى بشرتك بيبقى زى عازل وده فايدة حلوة من كريم نهار ..
بس لو انتى حتتعرضى لشمس جامدة يبقى محتاجة طبعا صن بلوك اما لو تتعرضى لشمس بسيطة ومدة قليلة اوى يبقى مش حتحتاجى صن بلوك لانه هو فيه صن بلوك بنسبة خفيفة
كريم الليل ::
من اسمه بيتحط بليل قبل النوم بيعمل انه تغذية عالية للبشرة كانه بيعوضها عن تعب اليوم كله كمان بيتحط بليل قبل النوم عشان البشرة وانتى نايمة بتبقى مسام تتشرب الكريم وتستفيدى منه اكتر وتصحى الصبح تلاقى البشرة شكلها حلو ..
كريم الليل دايما بيبقى شوية تقيل عن النهار لان النهار زى ما قولنا هو ترطيب اما الليل تغذية للبشرة ...
كريم العين :::
ده بيتحط طبعا تحت العين مرة او مرتين فى اليوم ممكن مرة الصبح ومرة بليل
فايدته انه بيغذى تحت العين وبيقلل الخطوط الرفيعة وكمان بيقلل الهالات ويرطب منطقة العين
يعنى الروتين بيبقى
غسول بعدها تونر بعدها كريم نهار مع كريم عين
وبليل تحطى كريم الليل
فى ناس بتعمل الروتين ده مرتين فى اليوم يعنى غسول وتونر وكريم نهار وعين الصبح ويتعاد تانى بليل بس بدل كريم نهار بيبقى كريم ليل
بس انا بحس انه كتير انى اعيد نفس الكلام مرتين وكمان احنا بنكسل يكفينا مرة واحدة وبليل نكتفى بكريم الليل الا اذا كنتى خرجتى ورجعتى كدا استخدمى الغسول والتونر اما لو انتى قاعدة فى البيت ملهاش لازمة كتر الغسول والتونر
عشان البشرة متتعبش من كتر الكريمات ...
طبعا ميزة الروتين كله انك تحافظى على كل البشرة من تنظيف وترطيب وتغذية ونعومة ومسام نظيفة وصحية
طبعا الروتين بيتطبق على الوجه والرقبة
نيجى للماركات........
ماركات كتيرة اوى منزلة الروتين اليومى
لوريال
كلينيك
اولاى
نيفيا
اوريفليم
نتروجينا
جونسون
كل واحدة حسب بشرتها ترتاح مع ايه لان ممكن منتجات شركة معينة مش تبقى مناسبة معاكى ....
كمان لما تختارى غسول وكريمات لازم تختارى اللى مناسب لبشرتك يعنى دهنية ولا جافة ولا عادية ولا مختلطة ...
لو انتى محتارة فى اختيار الماركة اعرفى نوع بشرتك واعملى سيرش على النت على منتجات او ماركات اللى مناسبة لبشرتك وشوفى اراء البنات واكتر حاجة اجمعوا عليها
فى بنات حتسال اجيب الروتين اليومى كله من ماركة واحدة ولا ممكن ماركتين ...
بحس انك تجيبى كله من ماركة واحدة بيبقى افضل لان مواد المنتج بتبقى واحدة فبشرتك تبقى مرتاحة اكتر
اما لو انتى مثلا مرتاحة مع غسول من نيفيا وكريم من لوريال خلاص مفيش مشكلة هاتى الماركتين المهم تختارى حاجة تريح بشرتك
يارب الموضوع يبقى عجبكم ويبقى فى كل الاسئلة اللى سالتيها يا ميويا ولو عندك اسئلة تانية اسالى ياقمراية
الروابط المفضلة