اخواتى الاعزاء اشكركم جميعا على وقوفكم معى فى محنتى مع الفأر لكم منى كل التقدير والاحترام
احبكم فى الله اخواتى
الحمد لله الفار الثانى خلصت منه هحكلكم الحكايه وايه الى حصل
انا خرجت امس مع اختى علشان كنا عند الدكتور وطول ما انا ماشيه عماله اسأل عن الحبوب السامه الى اختى ام ماهر وصفتهالى
المهم مش لقتها وقالوا لى لازم نجبها من مكان معين حاولت ادور على مصيده لانها كانت املى الاخير مع الفار ولكنى لم اجد
انا بقه كنت خلاص كنت حاسه ان الفار موجود فى كل مكان فى المنزل كنت حاسه انى لو فتحت اى حاجه هيطلعلى منها تقريبا كان فضلى شويه واكون مجنونه بالفار كل شويه اقول لزوجى انا متخايله بالفار
كنت بحلم بالفار وطول ما انا ماشيه ولا جالسه مفيش فى بالى غير الفار وازاى اخلص منه لما خلاص كنت قربت اتجنن
المهم امبارح لقيت بنتى مريم بتقول لى يا ماما انا شفت الفار جنب البتوجاز ومش عاوز يتحرك كنت فاكراه مقلب من بنتى اختى كانت عندى واولادها وماما
رحت علشان اشوف الفار بالفعل لقيت الفار بجانب البتوجاز وعمال يعمل اصوات ومش عارف يتحرك لانه لصق فى الاصق
فضلت انط من مكانى وجسمى كله اشعر ومش عارفه اعمل ايه ماما واختى خافوا وانا اصلا مرعوبه وزوجى فى العمل وعايزه اخلص من الفار قبل ما يفك نفسه من الاصق مثل المره السابقه
طيب اعمل ايه كنت حاسه ان جسمى كله منمل لمجرد ان افكر اشيله فى كيس واحس بيه تحت يدى يا الله موقف لم اجد اصعب منه فى حياتى
فضلت انط مكانى وحاسه زى ما يكون الفار ماشى على جسمى كله احساس مش قادره اوصفه ليكم كان موقف رهيب وخصوصا انى مجرباه مع الفار الثانى
فمش عايزه اعيد التجربه
مكنش امامى غير ان ازيله علشان اخلص بعد حوالى نصف ساعه من التردد قلت مفيهاش فايده لازم اتصرف واخلص
لبست حوالى 6 اكياس فى يدى وحاولت ازالته بس كان عمال يعمل اصوات والمشكله لا دى المصيبه وانا بشيله لقيت زيله لاصق اوى ومش عايز يتشال من على الصراميك
بقيت عماله اصرخ وانا بشده من على الارض يا لهوى مش قادره اوصف لكم انا كنت عامله ازاى جسمى كله كان بيترعش وقلبى عمال يدق
المهم شلت الفار فى النهايه وجريت على البلكونه ورميته فى الشارع
الى يضحك فى الموضوع اى وانا برميه نزل على عربيه تحت العماره والفار عمال يعمل اصوات فى الكيس الراجل صاحب العربيه لما شاف الى فى الكيس جرى وساب العربيه هههههههههههههههههه
والاولاد كانوا واقفين فى البلكونه وعمالين يقولوا للراجل مش احنا الى رمناه هههههههههههههههه
صعب عليا الراجل بس اغرب حاجه انوا جرى وساب العربيه اما لو كان حصل له الموقف الى حصل معايا كان هيعمل ايه هههههههههههه
بس انا غلطانه اى رميتوا فى الشارع بس البواب مكنش تحت والفار عمال يتحرك فى يدى ومكنتش عارفه اعمل ايه فرميته فى الشارع ربنا يسامحنى غصب عنى والله
بس يا حبيبى دى كل الحكايه والحمد لله خلص من الفار الثانى وعملت للاولاد 3 صوانى كيك امبارح حفله بقه المهم ال 3 كلهم طلعوا هابطين فقلت للاولاد احمدوا ربنا انى قدرت اعملكم حاجه اصصلا بعد الى شفتوا واكلوا الكيك وانا ارتحت بس لغاية دلوقتى مش قادره انسى شكله ولا صوته ولا احساسى وهو فى يدى ياربى صعب اوصفه
ربنا ميوقعش حد فيكم فى مثل هذه التجربه
الروابط المفضلة