السلام عليكم يا أحلي اخوات في احلي منتدي
قررت النهاردا اكتبلكم قصتي مع تأخير الحمل والاجهاض المتكرر واخيرا كرم ربنا وولادتي لحبيبة قلبي رهف
يمكن تعطي امل لاخت ليا هنا في المنتدي
وهبدأ الاول بتأخير الحمل
الحكايه بدأت من قبل الزواج ان الدوره كانت مش منتظمه وروحت لدكتوره تنظمهالي كانت تتظبط مع الادويه ولما ابطل الدوا ترجع تلخبط تاني
الدكتوره قالتلي عندك تكيس مبايض وعلاجها هيكون بعد الزواج
وتم الزواج ورجعتلها عشان اتعالج من التكيس وبدأت العلاج واستمريت معاها حوالي سنه من غير فايده ومن هنا بدأت رحله اللف علي الدكاتره وكل واحد يديكي تشخيص وعلاج مختلف
لحد ما ربنا هدانا لدكتور شاطر شخص حالتي صح
وقالي علاجك هياخد من 6 ل9 شهور وبدأت العلاج ومن اول شهر بعد العلاج الدوره بدأت تنتظم جدا وبعد 5 شهور من عليا ربنا بالحمل وساعتها مكنتش مصدقه نفسي لما عملت التحليل ان انا فعلا حامل وقتها كنا بره مصر فقررت ان انا ارجع عشان انابع الحمل في مصر واكون جنب ماما
ورجعنا مصر ومع اول سونار اتصدمت لان الجنيين كان مفيهوش نبض واضطريت اعمل عمليه تنظيف
وكان الم نفسي وجسدي رهيب ربنا ما يكتبه علي حد ابدا
بعدها استريحت حوالي 5 شهور وربنا كرمني بالحمل لتاني مره وساعتها الدكتور قالي هنعمل ربط لعنق الرحم لانه ضعيف وفعلا عملت العمليه وكنت باخد مثبتات وكان الحمل ماشي كويس جداا
ووصلت للشهر الخامس وفي الاسبوع 20 تقريبا حسيت بألم في ظهري واسفل بطني وكان الم خفيف دخلت الحمام اعزكم الله ومره واحده الاقي كميه دم رهيبه ونزيف جامد جدا ساعتها قلبي كان هيقف ومعرفتش اعمل ايه روحنا للدكتور عمل سونار لقي انفصال في المشيمه حاولنا نوقف النزيف مفيش فايده وفي الاخر نبض الجنين وقف واخدت طلق صناعي ونزل الجنين وكانت حالتي النفسيه في الارض لكن بفضل الله ووقوف زوجي معايا تخطيت المرحله دي واستعوضت جنينني عند ربنا ودعيته انه يكرمني بالحمل تاني
وربنا كريم أوي يا بنات والله وأرحم بينا من امهاتنا
بعدها بحوالي 6 شهور ربنا رزقني بالحمل لثالث مره ووقتها غيرت الدكتور وروحت لدكتوره قالتلي مش محتاجه ربط وعنق الرحم كويس ومشيت في الحمل كويس للشهر السادس وفي الاسبوع 24
صحيت من النوم علي الم فظيع في ظهري وقطرات دم خفيفه روحنا للدكتور قال الرحم مفتوح ولازم ولاده حالا وولدت ابني وكان حي ولكن توفاه الله بعد ساعتين من الولاده
ومن تاني بدأ الالم النفسي الي كان المره دي لا يحتمل لدرجه اني كرهت الحمل وكنت خايفه جدا
وروحت لدكتور اقنعني اني مأجلش الحمل ولا شهر
وان احنا نحاول من تاني
بعد الولاده بشهرين ربنا اكرمني بالحمل والمره دي عملت ربط لعنق الرحم اخدت جميع انواع المثبتات
حبوب وتحاميل وحقن والله يا بنات لحد ليله الولاده وانا باخد في المثبتات غير ادويه تانيه كتير جدا مع الراحه التامه يعني نوووووم مكنتش بخرج من البيت غير عشان الدكتور ومكنتش بعمل اي حاجه في شغل البيت ماما وزوجي كانوا متحملين كل حاجه ربنا يخليهم لياوطبعا كنت قلقانه جدا طول فتره الحمل ومترقبه ايه الي هيحصل وفي الشهر الثامن اخدت حقن كوتيزون عشان رئه البيبي تكتمل لو حصلت ولاده مبكره لكن بفضل الله وصلت للشهر التاسع وبعد حوالي 10 ايام من التاسع الدكتور حددلي معاد الولاده بعد 4 ايام وكانت قيصريه لضعف عضله عنق الرحم
مكنتش مصدقه نفسي والله يا بنات وفضلت قلقانه ومش جايلي نوم لحد يوم العمليه وروحنا علي المستشفي ودخلت العمليات وانا بدعي ربنا ان اشوف بنتي في حضني علي خير واول مطلعت من العمليات زوجي جابلي البنوته بس انا مكنتش فايقه اوي مكنتش شايفه تقريبا لاني عملت ببنج كلي ودا بيحتاج فتره عشان افوق بس انا حسيت بيها كانت بتبكي واول محطها علي صدري سكتت وانا قعدت احسس عليها بأيدي لاني مكنتش قادره افتح عيوني بعدها اخدوا رهف وجالي دكتور الاطفال قالي انها بخير بس كان في شويه بلغم علي صدرها هما شفطوه بس محتاجين يحطوها تحت الملاحظه شويه وفعلا قضيت اول ليله من غير بنتي وتاني يوم الصبح جابوهالي كنت هتجنن عشان اشوفها واول مشوفتها كنت هطير من الفرحه ومش مصدقه ان حلم عمري اتحقق وربنا جبر بخاطري واكرمني وبقيت اخيراااااااا أم
معلش يا بنات انا عارفه اني طولت عليكم جدا بس كل هدفي ان مفيش واحده تيأس وتفقد الامل وخليكي واثقه في ربنا وادعيه كتيييييير واستغفريه
وربنا هيكرمك
واخيرا بطلب منكم انكم تدعوا لرهف ربنا يخليهالنا ويحفظهالنا من كل سوء
الروابط المفضلة