*مقبلات متميزه*فطور أو عشاء مشهي.. فلافل بيتية وملحقاتها .. اتفضلوا معانا

[SMILE4LIFE]

مرحبا بنوتات..

حبيت اشارككم بطريقتي في الفلافل..
الصراحة هي طريقة الوالد الله يرحمه.. كان عنده محل فلافل وكنا متعودين نساعده في تحضير خلطة الفلافل واتعلمنا الصنعة منه
طبعا كنا نطحن المكونات على ماكنة مخصوص كبيرة عالكهرباء.. والماكنة أكلت اصبعي مرتين بالمناسبة ومع هيك ما تعقدت من الفلافل ولسه بأموت فيه.. طبعا مش حيوصل لطعمة فلافل الوالد الله يوسع له قبره يارب ولكن برضه طيبة كثير وأزكى من فلافل بره..

المقادير:
كيلو حمص منقوع من قبل بيوم وكل ما تقل الماء عليه نصفيه ونغسله ونغير له الماء..
بصلتين كبار مقشرات
ضمتين بقدونس أو حتى ثلاثة.. أنا بأحب الفلافل يكون من جوه لونه أخضر كتير
فلفل أخضر حار حسب الرغبة. طبعا مغسول ومشيول منه القمع.
كزبرة جافة إن وجد.
بعض الناس يضيفوا ثوم بس احنا بنحبه بدون ثوم
كلفة الفلافل..
وهذه الكلفة صراحة عندي من ايدين الوالدة الله يرحمها بعثتها لي أول ما تزوجت.. هي خلطة معينة من التوابل والبهارات صراحة ما بأعرف مكوناتها تمام لكن بتعطي طعم رووووعة للفلافل..شفت في بعض المطاحن أكياس مكتوب عليها بهارات فلافل يمكن تسد الغرض ما جربتها.. إذا ما وجد خلص حطوا بس ملح وكمون وكزبرة ناعمة..
هذا شكل كلفة الفلافل

طحنت الخلطة على ماكنة فرم اللحمة باناسونيك واستخدمت أصغر سن لطحن الفلافل.. إذا طلع خشن ممكن تعيدوا عليه مرة ثانية بس إذا كان الحمص منقوع كويس ما حتحتاجوا.
طبعا أنا فورا بأقسمها في أكياس صغيرة وبأفرزنها وكل ما تيجي على بالنا بنطلع كيس من الفريزر وبنتركه يسيح ساعة زمان وبيكون كأنه هلأ مطحون..
بصراحة هذه الفلافل أنا عاملاها من شهرين تقريبا وكل أسبوع أو أسبوعين بأطلع أكلة منها. هاي الخلطة بعد ما ساحت من التفريز..

زي ماقلتلكم زودوا بقدونس شوية أطيب بس أنا كانت هذه الكمية اللي عندي فطلع للأسف هيك لونه..

هون بعد ما ضفت له معلقتين كبار كلفة فلافل وربع معلقة صغيرة كربونات الصودا
ونخلطهم سوا كويس وإذا احتجنا نزيد رشة ماء.

وهون بنشكل الفلافل بقالب الفلافل..

نكون حمينا زيت القلي كويس ونوطيه بعدها ونسقط أقراص الفلافل بهدوء ونقلب بهدوء وبعد ما نسقط الأقراص في الزيت نرجع نعلي النار شوية ونقلب بهدوء حتى يستوي كويس من الداخل والخارج ويصير لونه أشقر

نخرجه من الزيت ونضعه على ورق نشاف قليلا حتى يمتص الزيت ثم نصفه في طبق التقديم

صورة أقرب

وهذا قرص فلافل مقسوم من النص

متعودة في غزة أيام الجمع كنا نعمل جنبه مقالي..بطاطا مقلية أصابع وباذنجان مقلي مرشوش عليه دقة الفلفل والليمون مع صحن الخضرة والزيتون أو السلطة والجبنة المالحة ولبن الشمينت يا سلااااااااااااااام طبعا هذا مافي منه هون والمخللات بس للأسف برضه ما كان عندي مخللات.. وهذه بقية الأصناف.

الباذنجان مع دقة الفلفل الأخضر الحار والليمون

البطاطا المقلية

اللبنة أو الجبنة (هون حطيت دومتي دوبل كريم)

صحن الخضرة والزيتون

وهذه السفرة كاملة بس ما صورت الشاي بالنعناع الأخضر للأسف

صحة وعافية على قلبكم