**موضوع متميز**الكانــــــــــيلوني على أصوله ومن أهله....وأكيد بالصور

[كلاسي]

بسم الله الرحمن الرحيم

حبيباتي العضوات طبعا كلكم تعرفوا ان لـــيبــيـــــا كانت تحت الإحتلال الإيطالي لفترة طويلة (الله لا يردهم ولا يوفقهم ) ....
وبعد معانة وتضحيات وعدد كبير من الشهداء من أجدادنا وعلى رأسهم شيخ الشهداء عمر المختار ( اكيد تعرفوا قصته من خلال الفيلم )
وأكيد بتوفيق ونصر من الله انتصرنا عليهم وتحررنا ...
ولكنهم تركوا اثارهم فينا من خلال بعض المفردات في لهجتنا وكذلك في بعض أكلاتنا ....

(نحساب روحي في حصة تاريخ ههههه)

ومن أشهر هالأكلات الكانيـــــــــــــــــــلوني

واليوم جبت لكم طريقة عمله ونبدأها بالمقادير :

3 بيضات (حجم متوسط أو كبير ) / فانيليا / نصف أو ثلاث أرباع كوب من الحليب السائل (حسب نوع الحليب وقوامه ) / الدقيق (ما نقدرش نعطيكم مقادير مضبوطة له (حسب نوع الدقيق لكن ننصحك تضيفيه ملعقة بملعقة حتى تصلي للقوام المطلوب وه أخف من قوام الكيك ...وكل ما يكون القوام رقيق يكون الطعم أخف وألذ)

وبعد خلط المقادير السابقة جيدا في الضراب (أزيلي الرغوة إن تكونت )

وأنا نضع الخليط في كأس عشان أسهل في الإستخدام ...وكذلك نستعين بفنجان قهوة عشان اضمن المقدار متساوي في كل قطعة وتكون جميع القطع بحجم واحد (أكيد المنظر ح يكون أحلى ) (وما املى الفنجان لأخره عشان ما يتكون كانيلوني غليظ .....الرقيق أفضل )

وبعدها أحضري طاجين صغير مدهون دهن خفيف بزيت (ماتكثري من الزيت لأن الغرض مش قلي الكانيلوني ....الغرض أنه ما يلتصق بالطاجين...من أسرار الكانيلوني الناجح انه ما يكونش مقلي ...

وهكذا فنجان ورا فنجان (عايشين على حلمنا ههههه)

وأهم شئ ان النار هادئة جدا وكل دائرة تستوى على مهلها ...لانك لو استعجلتي وقويتي النار النتيجة مش ح تكون حلوة وأنا درت قطعتين واحدة بنار هادئة وواحدة على نار عالية عشان تشوفو الفرق في المنظر ( وهذا من أسرار المهنة حبيت نوضحه لكم لأني نحبكم هههه)

وبعدما تنتهي من كل المقدار ضعي دوائر الكانيلوني على جنب

ونبدأ بتحضير الحشو وهو عصاج اللحم المعتاد ( لكن عشان عرايسنا الجداد والمستجدات في المطبخ هننزل صور تحضير الحشو للإيضاح)
وهي:

نضع شوية زيت على النار ونضيف له بصل مقطع صغير ...(ما تكثريش من البصل لأنه لو كثرتيه ح يخلي المذاق حلو ومسكر )

وتقلبيه لعندما يتغير لونه ويذبل قليلا (بس ماتخليش يتحمر لأنه لو تحمر ح يعطي لون أسود أو بني غامق ...وشكله أكيد مش ح يكون ظريف عند الاكل)

وبعدها تضيفي اللحم المفروم (يفضل المفروم فرمة واحدة يعني يكون خشن شوية ....مش ناعم زي لحم الكفتة )

وتقلبيه كل شوية لعند ما يتغير لونه وينشف مائه

ثم تضيفي القليل من الطماطم المعجون (بعض البلدان يسمونه رب البندورة )+ ملح + فلفل أحمر مطحون ( شطة ) واكيد حسب الرغبة (نحن الليبيين نحبو الاكل السبايسي الحار )

وتستمري في التقليب من حين لاخر وتضيفي القليل من الماء لحد ما يستوي

(وإذا كان اللحم فيه شوية دهن قومي بتصفيته قبل الإستعمال )

بعدها حضري جميع الأشياء وهي : دوائر الكانيلوني واللحم العصاج وصحن فيه طماطم مبشور +رشة خفيفة جدا من الملح (ماتكثريش ملح لان مازال راح تستعملي جبن ) (والطماطم يفضل يكون مبشور مش مطحون في الخلاط ...عشان لو كان ناعم ما راح يثبت على وجه قطع الكانيلوني )

وبعدها تاخذي قطعة من الكانيلوني وتضعي بها قليلا من الحشو وتلفيها على نفسها وتضعيها في طاجين مدهون دهن خفيف بالزيت

وتستمري بنفس الخطوات إلى أن تنتهي من كل الدوائر

ثم تضعي الطماطم على وجه كل الأصابع (مع مراعاة تواجد الطماطم على وجوههن كلهن يعني مش بينهم )

ثم رشة خفيفة من الزعتر المطحون (وهذا ثابت في أغلب الأكلات الإيطالية )

ثم تضعي جبن مبشور (موتزاريلا أو إيدام )

وتدخليها الفرن من الأسفل مع مراعاة :

عدم إطالة فترة بقائها في الفرن لان كل ما فيها مستوي (دوائر الكانيلوني وكذلك الحشو ) يعني يادوب يتغير لون الاصابع من الاسفل

ثم تحمريها من فوق (مش واجد يعني يادوب تسيح الجبنة فقط ...ماتخليش الكانيلوني يتحمر واجد ....عشان يكون المنظر أحلى والطعم ألذ
ولما تخرجيها من الفرن استعيني برأس سكين ووسعي وفكي الجبن بين كل الأصابع عشان تضمني تواجد الطماطم والجبن على كل قطعة...وما يتحركوش عند رفع الأصابع من الطاجين (وهذا ايضا من أسرار المهنة هههه)

ملاحظة أخيرة للإفادة :

أنا لما أحضر الكانيلوني نقوم بتحضير كمية كبيرة ونضعها في حافظة بلاستيك محكمة الإغلاق في الفريزر ونحتفظ بها لمدة قد تصل لشهر تقريبا ....ونستعين بها لما يجونا ضيوف أو عندنا عزومة فجأة نضيفها للمائدة أو قبل المناسبة بأيام عشان اختصر الوقت...مع مراعاة إني نخرجها من الفريزر قبل مجيئهم بفترة كافية عشان تفك على مهلها وووقت التقديم نسخنها في الميكرريف ....والله العظيم وبكل أمانة كأنها متحضرة في نفس اليوم الطعم والشكل طازج وفريش ويشهي ويحتفظ برائحته مثل ماهيا ....

وقدميه لأحلى ضيوف وأحلى عائلة واستمتعي بطعم رائع وشكل أروع ورائحة ولا أروع...

وتحياتي لحبيباتي

نحبكم في الله

وامانة أمانة عليكم تدعوا لأمي بطول العمر ودوام الصحة

لأنها هي اللي علمتني طريقة الكانيلوني من10 سنوات تقريبا

وأصبح معروفة بأفضل من يسوي الكانيلوني في عائلتي وأقاربي ومعارفنا وأكيد الفضل لست الحبايب