أم البنين تعالي شوفي أعمال أولادي الفنية...و الكل مدعو***موضوع متميز***
السلام عليكم و رحمة الله و بركاته
أخواتي الغاليات
هاي أول مشاركة فعلية بهالقسم
و كنت وعدت أم البنابين الأمورة أن أقدم لكن أعمال أولادي الفنية
أولا":
أعرفكم ببطليي العمل و هما
وليد(12 سنة)
وسيم(6 سنين)
وليد ينفذ كل أعماله بنفسه..وسيم قدمت له بعض المساعدة
خلينا بالمفيد
أول شي ..أعمال وليد:
و اعتذر عن عدم وجود صور الخطوات ، لأني لما قررت صور كانوا عملوا الأشياء و خلصوووووا
1- كتكوت من كرتون البيض:
هون لازم تعملوا تمرين للرقبة و تتطلعوا على جنب لأنو الصورة طلعت معووجة
* جسم الكتكوت..
عملنا كرتين من خيطان الصوف الأبيض واحدة صفيرة و التانية أكبر شوي
لصقناها فوق بعضو صنعنا الأنف و العيون من الورق الملون
بيت الكتكوت و القبعة من كرتون البيض.
2-عنكبوت من كرتون البيض
الصورة واضحة على ما اعتقد
3-نملة من كرتون البيض
بنفس طريقة العنكبوت
4-دودة كمان من كرتون البيض
5-صورة للأعمال كلها مع فراشة أيضا" من كرتون البيض و الكرتون العادي الملون و وليد مزينها بالألون اللماعة
6-سلة من البالون و الورق
نحضر بالون كبير و ننفخه.
نغطيه بورق الجرايد و اللصق يكون بالغراء.
آخر طبقة من التغطية بالورق الأبيض.
نلون بالألوان المائية حسب رغبتنا..وليد لون بالأسود و الأخضر.
القاعدة : 3 رولات من محارم التواليت( بعد ما تفضى).
بس ينشف الورق اليوم التاني ..نغرز دبوس بالبالون حتى يطق و نحصل على السلة فاضية.
و من الورق الملون نصنع يد السلة
ان شاءالله يكون شرحي واضح.
7-قلعة
المواد المستخدمة:
رولات محارم التواليت و المطبخ
محارم بيضا
نشاء للتلصيق
ألوان مائية
كرتون أبيض
الطريقة:
أرجو أن يتوضح الشرح من الشكل
نلصق الرولات مع بعضها ثم نغطيها بمحارم التواليت البيضا.
من الكرتون نصنع أبراج القلعة.
نلون..
نضعها على قاعدة من الخشب و نكمل المنظر بالألوان و المعجون.
8-بيتزا
هاي انقلوها لقسم المعجنات هههههه
نصنع القاعدة من كرتون سميك تبع العلب.
البيتزا مصنوعة من ورق الجرايد و مغطى بالمحارم و بعدين لونها كما هو موضح
خخخخخخخ
و الوجه كمان من الكرتون السميك
عندي خزانة بالمطبخ مليانة كراتين و علب و أشياء فاضية مشان لما الأولاد يجي عبالهن يعملوا شي بيلاقوا المواد الأولية اللازمة.
و بعد ما شفنا وليد شو عمل تعالوا نشوف وسيم أفندي شو عمل:
نخلة
لفينا مستطيل من الكرتون و لوناه بالبني لصنع الجذع و عملنا الأوراق من ورق الكورنيش الأخضر.
وسيم عمل عصفور صغير و حطو فوق ..شفتوووه
و رسم سمكة ما بعرف شو علاقتها بالموضوع
و في ولد من الورق قاعد بظل النخلة
منظر حيوانات من المعجون
وسيم بحب يلعب بالمعجون كتيير
هون عامل:
بقرة ..دجاجة..دودة ..قطة..شجرة..بحيرة صغيرة
الباقي احزروه لحالكن
هاي لقطة تانية أقرب ان شاء الله تكون أوضح
هون في قصة
شوفوا الصورة لحتى احكي الموضوع
كان في دجاجة و عندها صحن فيه بيض جاء الوحش يريد أن يأخذ البيض و هي خائفة.
فصنع وسيم الفزاعة التي في الوسط لحماية الدجاجة.
و عامل نهر و شجرة و زهور جميلة.
العمل كله من تأليف و اخراج و تنفيذ وسيم.
هاي لقطة تانية
أول مرة بشوف دجاجة لونها زهري
و يلي جنبها الفزاعة و الوحش وراها و عم يرفع أثقال كمان لاظهار قوته.
كتاكيت من البيض و كرتون البيض
خوفا" على أعصابكم من الفيلم المرعب يلي شفتوه قبل شوي
شوفوا هالكتاكيت الحلوة
اعتقد الصورة واضحة:
البيت من كرتون البيض
الكتاكيت من البيض بعد ما فرغناهن و قلينا يلي بقلبهن و أكلناه.
من الصوف البرتقالي عملنا الشعر.
من الورق الملون الأنف .
العيون و الفم رسم
و العشب حولهم من ورق الكورنيش الأخضر
شو رأيكن بأولادي
المرة القادمة سأقدم لكم أعمالهم و تجاربهم العلمية
على فكرة وليد أمنيته يصير عالم فلك و دائما" يبحث في هذه الأمور
وسيم بيحب الكيمياء و دايما" بيعمل تجارب و بيخلط مواد مع بعضها للحصول على مواد جديدة
و حاليا" مهتم بالحصول على العنصر الكيمائي xلصنع فتيات القوة
حدا بيعرف وين بيلاقوا هاد العنصر؟؟؟؟
قولولي قبل ما أجن و هو يخترع و يجرب.
تقبلوا تحياتي...
رد مع الاستدلال
الروابط المفضلة