السلام عليكم ورحمة الله وبركاته ...

انا متزوجة من 6 شهور تقريبا والحمدلله مرتاحة لكن مشكلتي بأهل زوجي .... هم صج يحبوني ويقدروني ويحترموني وانا احبهم اكثر وشايلتهم فوق راسي لكن مشكلتي ان اهل زوجي أولا ..... معتمدين عليه وايد .... لا تفهموني غلط انا مابي اقطع زوجي عن اهله ومو قصدي اني مابيه يقوم بشغل اهله بالعكس انا اللي قاعدة اساعده على هالشي وانا اللي اعرض عليه انه مثلا يودي امه السوق اذا كان ودها تروح السوق حتى بدون ما اهيه اتقوللي ... المشكلة ان اعتمادهم عليه زايد فوق الحد ... يعني مثال .... زوجي يداوم كل يوم 12 ساعة يعني يرجع البيت هلكان وانا عندي جامعة فإجازتنا تكون الخميس والجمعة وهاليومين اللي نفضى فيهم حق بعض بس يوم الخميس من صباح الله ....... يافلان ود اخوك عن ربعه ... يافلان جيب اختك من العرس ... يا فلان روح الجمعية جيب لنا كذا .. يافلان روح جيب لنا عشا ... هذا مع ان ابوه الحمدلله شاب وبصحته والمواصلات متوفرة وعندهم سايق وعنده اخوه ماشالله ريال ينشد فيه الظهر .. بس مادري ليش اعتمادهم عليه لهالدرجة مع انه قبل ما يتزوج كان يقوم بشغلهم بس عاد مو لهالدرجة !!! تخيلوا الساعة 12 بالليل يتصلون يقولون له نبي عشا !! يعني ماعليه الواحد يحتاج خصوصية شوي ....... تصدقون ان نكون متفقين نطلع بهاليوم وما نصدق اول ما نركب السيارة بدت التلفونات والمشاوير الين ما نرجع البيت بخفي حنين ...... لا احنا اللي قعدنا مع بعض ولا هم يحزنون ...

المشكلة الثانية اخته امجننتني ...... كلما طلعنا مع بعض زعلت وقالت ليش ما خذيتوني .... كل هذا من طيبتي الزايدة يحليلي اذا بغينا نطلع اقول لها يافلانة ليش ما اتيين معانا توسعين صدرج .. الحين صارت الزامي اذا فيني خير اطلع بدونها ..... والله مادري شسوي فيها .. انحاش عنها نحشة .......

ادري طولت عليكم بس عفية محتاجة الرد منكم باسرع وقت لأني بنفجججججججججججججر