يومياتي مع أولادي ..موضوع متميز .... متجدد

[جواهر القعيطي]

برنامج / ذاتي حياتي ..
يومياتي مع أولادي ..
1. المخترع زياد ..

- - - - - - - - - - -

كل يوم ولدي حياتي قلبي ( زياد ) يقولي على خمسة أو أكثر من اختراعاته المستقبلية الله يبارك فيه وفي أمه طبعا إحم إحم ، وفي اخوانه كمان ..

استحالة يمر يوم بدون ما يقول أيش حيخترع مستقبلا ، طبعا عمره 11 سنة ويا رب أشوفه برفيسور وعريس وأفرح بأولاده وزوجته حبيبته نور عيونه وبأحفاده وأنا بخير وصحة وعافية ..

من قبل ما أتزوج وكنت أحلم بكومة أطفال أشكلهم زي ما أبغى ، كثير ناس تقولي ليش تخلفين ورى بعض وأرد : أنا أبغاهم أو رزق من ربي أو دولا راس مالي ، لأن الذرية هم فعلا راس المال لو في يوم من الأيام باعك إللي ما يستحقك أو هجروك أعز الصديقات أو أو أو ..

فلما تخلفي كوني قد هذي الخلفة ولا تجيبي أطفال عبث ، دولا أمانة كبيرة حتنسألي عنها يوم القيامة ، ما أقولك هم مو متعبين ، لكن كل شيء بتسويه لهم احتسبيه لله على طول ، والله من تجربة تحسي اليوم يعدي وأنت بخير وحلقك بخير وصوتك مو مبحوح وفيك نشاط إضافي ، بعكس لما تقومين من يومك بصراخ وعويل ويا ولد قوم ألبس ويا ولد قوم صلي ويا بنت ليش ما تجهزتي والجيران يستمتعون بصوتك المخملي !!

المهم نرجع لموضوعنا الأساسي عن المخترع زياد بإذن الله ، طبعا هو عادة بيقولي عن اختراعاته لما يجي وقت تدريسه ، عشان كده أخليه آخر واحد لأنه لا قوة إلا بالله بين كل آية وآية يسمعلي إياها لازم يتحدث عن ما له وما عليه ومن ضمنها طبعا اختراعاته ، وأنا عاد ما أبغى أقاطعه لأني كنت أنتظر دا اليوم إللي أكتشف فيها مواهب أطفالي الحقيقية ، والحمد لله لقيت فلازم أكرس وقتي له عشان أنمي خياله زيادة ..

يقولي : ( ماما أفرح لأنك تسمعيلي ، دائما لما أقول لأحد شيء عن اختراعاتي يحبطني ، إللي يقولي سري أو بالله فارقنا أو اختراعك قديم أو يسلكلي أو يضحك ويطنش ويغير الكلام ، لكن حتشوفين أيش أصير لما أكبر ، حأصير بزنس كبير من اختراعاتي ، ووقتها لو يجون دولا المحبطين يتمصلحون معايا لأني صرت المخترع زياد حأقولهم خلوا كلامكم وتحبيطكم ينفعكم ) عاد أنا منصتة ومن جوى مت ضحك ، والله تفكيرك عميق حبيبي زيزي ..

قلتله : الناس ما تحبط إلا الناجح ، عمرهم ما يلتفتوا للنايم الكسول ، يخلونه يكمل نومه أما الناجح يقعدوله بالمرصاد ، وما يصدقوا بس يشموا ريحة إن في حياة الناجح فيدخلوا منها ويوسعوا الرقعة ويبهروا وينقلوا وعاد دا عيدهم ، ولو فكروا صح حيلقوا نفسهم ناس فارغة تعاني من الفشل وشغلهم في الحياة التحبيط والتصيد والانتقاد السيء القبيح ، طالما إنك ناجح فحتلقى على طول الخط أشكال وألوان من دي النوعية ، أعطيهم يا ولدي قفاك وأمشي ، ولا توقف إلا عشان تعطيهم درس قوي إن كانوا فعلا ناس جدا محيطين بك ولا فرار منهم ، ودائما كون في وسط محفز ، كل ناس سيئة سويلهم حذف وحظر وصخرة بينك وبينهم ، وعيش مع الناس الطيبة المشجعة المحبة للخير ..

ولدي قلبي أخذ كلامي بعين الاعتبار ، وجلس مع أصدقاء تحب تتعلم وتشجع ، وجا مرة يقولي أبغى طلبات من المكتبة لي ولأصحابي عشان نسوي اختراع لعاصفة الحزم ، وأنا عيوني صارت كده ( فيس مفجوع ) ، كانت طلباته ورق ملون ومسدس غرا ومطاط ولصق ، وسوالي مسدس رشاش يجنننن ، وأنا دوري كأم لازم أشجعه وبنفس الوقت كانت فرصة حلوة إني أغرس فيه الوطنية وكيف إن الجنود يتعبوا عشان يحموا الحدود ، فغلط إني أستصغر أي شيء يسويه ولدي ، ليش ؟ أقولكم ليش ..

المخترع ما يجي بين يوم وليلة ، مو لما يصير كبير يخترع ، تلقينه من صغره يتخيل ويخترع ، ولأنه صغير فبديهي يطرح عليك أفكار الناس مخترعتها من زمان ، لكن هو ما يدري ويحسب نفسه هو حيخترعها مستقبلا ، فلا تقولين له دي قديمة ، بالعكس سوي نفسك منبهرة وحفزيه قد ما تقدري ، ممكن يجيبولك أشياء وأفكار في نظرك أتفه من التافهة لكن تأكدي إنها في نظره شيء كبيييييييييييييييير جدا جدا ، فانتبهي للغة عيونك وجسدك ولنبرة صوتك تجاه كل شيء يطرحه ..

إلا خيال الطفل لا تلعبين فيه ، خليه ينمو معاه ، أوقات ألقى ولدي مالك يمسك صحن دائري ويسوي نفسه يسوق سيارة سباق ويلف البيت لف وكل شوية يخبط في دا ويخلي البيت تحفة فنية من الخراب ، هو دحين في متعة عااااااالية جدا ، وأنت تشوفي إنه فوضوي وخرب بيتك وهو يشوف نفسه بطل العالم في الراليات ، وفجأة ألقاه يتوج نفسه بطل للعالم ويطلع على المنصة ويمسك أي لعبة وكأنها الكأس ، أي غلط ممكن يصدر مني وقتها ممكن يقتل فيه شيء وشويات ، وبعدين نقول ليش أولادنا وليش أولادنا ..

- - - - - - - - - -

جواهر القعيطي ..