السلام عليكم
أخواتي عزيزاتي
من جربت دواء milk thistle لزيادة إدرار الحليب؟؟
وما رأيك بنتائجه؟؟
وكم المدة اللازمة ﻷخذه لتظهر النتائج؟؟

أنا بشرب 3 حبات باليوم من مدة 4 أيام وما حسيت بفرق. للأسف..

أنا والدة من شهر وعم برضع ابني بس رضاعته صعبة جدا طول اليوم عليه عوارض جوع وبيبكي كتير. مشكلته يرضع دقيقتين بس وبينام وقدما أحاول أصحيه ما بيصحى إلا بعدما أحطه بسريره وبيرجع يطلب رضاعة وبرضعه وهيك بضلني على طول 5 ساعات أحيانا.. والمشكلة إنه ما بيلحق جسمي يجمع رضعة كاملة..

وعشان هيك حاولت أجرب كل مدرات الحليب.. حلبة حليب بقر حلاوة كراوية سمسم يانسون حبة البركة... حتى جبت شفاط الحليب حتى أشفط بعدما يخلص الطفل رضاعة وهاد لتحفيز الإدرار..
وحمدلله تحسن الحليب عندي ولو إنه بيختلف من يوم ليوم لكن ابني ما تحسنت رضاعته... وقررت أستمر بإرضاعه كلما يطلب حتى يزيد أكتر.. وشربت هاد الدواء كمان.
كتير ناس بيقولوا إنه كل طفل إله مزاجه وطريقته بالرضاعة وهاد اللي صبرني وخلاني أحاول معه ﻷني أبدا ما بحبذ أعطيه صناعي وهاد الإشي خلاه كمان يتعلق بحضني كتير ويتعود عالحمل.. طبعا شيء مرررهق جدا وعم بقصر بكل واجباتي التانية خاصة إني عندي بنتين كمان الله يحفظهم، أنا مستعدة أقعد شهور على هالحالة في سبيل أرضعه طبيعي فقط ... بس بالله عليكم وحدة تطمني إزا مر عليها هيك حالة وهل طبيعي هالأمر؟ وهل صحته رح تكون منيحة وهو بيرضع بالتقسيط؟ مع العلم إنه على عمر الأسبوعين كان زيادته بالوزن منيحة حمدلله بس بعدها مابعرف ومو معقول أضل أوزنه كل يومين..

بالله عليكم يا أخواتي وصديقاتي أنا طمعانة بردودكم وطمأنتكم إلي...

رجاء رجاء اللي بتعرف عن الدواء اللي ذكرته تفيدني واللي عندها كلمة تفيدني ما تبخل علي ولو مشغولة ومستعجلة ترد علي وتعتبرها كلمة طيبة تؤجر عليها إن شاء الله.
مع الشكر الجزيل مسبقا لكن جميعا.