السلام عليكم حبيباتى

فجأة إكتشفت إننا فى آخر أبريل خلاص وكلها بإذن الله تقريبا شهر وحبة نونو وييجى ميعاد نزولى وسفرى لمصر

طيب وإيه المشكلة؟؟؟؟
المشكلة إنى لازم ألم البيت قبل ما أسافر لأنى هأسافر وأسيب زوجى بإذن الله شهرين وبعدين هو هيحصلنا على مصر
وإحتمال كبير ما نرجعش على نفس البيت زى ما إنتو عارفين حكاية البيت اللى أنا فيه من هنـــــا

وأنا طوووووووول عمرى أكره يوم التنضيف العالمى اللى ماما كانت بتعمله فى البيت واللا تنضيف رمضان والأعياد ... ليه بقى لأنها بتتعب جدا جدا جدا مع إن بيكون معاها واحدة بتساعدها لكن كل مرة لازم ماما تتفشفش وتقعد بالليل فى السرير تعبانة يا حبيبتى لدرجة إنى لما إتجوزت بقيت يوم التنضيف أخرج وأسيب البيت للست تنضف براحتها
إنما هنا الوضع مختلف مفيش أم عباس وأم محمدين تيجى تساعدك فى البيت الموضوع هنا صعب وغالى جدا

علشان كده تعالى معايا .... هننضف واحدة واحدة من غير ما نتعب ويتكسر ضهرنا

لو إنتى مسافرة زيي واللا هتعزلى زيي برضه أو لا ده ولا ده بس عايزة تنضفى البيت قبل ما الصيف يدخل فى الغويط ... تعالى معايا وشاركينى حملتى للتنضيف قبل الصيف

كل يوم هأقول لكم على حاجة ننضفها أو نعملها ونشجع بعض حاجة واحدة ونحاول إنها ما تآخدش مننا أكتر من نصف ساعة
إيه رأيكم؟
اللى تحب تشترك معايا تسيب لى رد


دلوقتى صورى ومتابعتى للحملة الصيفية للنظافة من اللينك ده