$$$ ملف كامل عن شغل الجاكار $$$ "تريكو وبس"

[mistry]

حبيباتى الغاليات
وحشتونى كتيييييييييييييييير خالص
كل سنة وانتم طيبين بمناسبة عيد الفطر المبارك
وإن شاء الله ربنا يتقبل منا الطاعات ويبارك لنا فى أعمالنا فى شهر رمضان
أعاده الله علينا أعواماً عدبدةً بالخير واليمن والبركات

لو تفتكروا أنا فى رمضان نزلت موضوع فيه موديلات تريكو جاكار عشان تاتا العسولة كانت عايزة تعمل حاجة جاكار لابنها
والموضوع فى الرابط ده
http://www.lakii.com/vb/showthread.php?t=680038

وفيه مجموعة من الأخوات كان لهم أسئلة عن شغل الجاكار وأنا وعدتهم انى هانزل ملف كامل عن شغل الجاكار
وانا أهو بأوفى بالوعد
وإن شاء الله ربنا يوفقنى وأقدر اوصل لكم الموضوع
نبدأ على بركة الله

[mistry]

بداية شغل الجاكار من الحاجات الجميلة المبهرة اللى اعتقد ان التريكو بيتميز بيها.
والجاكار هو الشغل بالالوان
وعادة هو بيستخدم أكتر فى هدوم البيبهات والاطفال الصغيرين
وبرضه الكبار لهم نصيب مش قليل

أنا شخصياً بأعشق شغل الجاكار. ولفترة طويلة جداً كان كل شغلى فى التريكو حاجات جاكار ونادر لما كنت بأشتغل حاجة فيها غرز

ان شاء الله فى مرة أبقى أنزل لكم صور لبعض الحاجات اللى أنا عملتها جاكار.
طيب يبقى احنا عرفنا هنا اننا بنشتغل بأكتر من لون واحد ممكن يكونوا لونين او أكتر حسب الرسمة نفسها

الغرزة المستخدمة فى الشغل هى غرزة الجيرسيه
اللى هى عبارة عن سطر بالكامل عدل (وجه / أمام الشغل)
والسطر التانى كله مقلوب (ظهر/ خلف الشغل)
وهكذا
نادر جدا لما نلاقى جاكار مع غرز

الجاكار بيكون عبارة عن رسمة إما بتغطى المساحة كلها بتاعة الشغل زى دى

أو بتكون فى النص مثلاً أو على جنب
زى دى

وممكن كمان تكون وحدات متوزعة بشكل معين فى المساحة كلها زى كدة

[mistry]

حبيباتى أرجو الانتظار وعدم كتابة تعليقات حتى أنتهى من عرض الموضوع بالكامل
لاكتمال الفائدة بإذن الله

مشكورين

[mistry]

عموماً أهم حاجة عندنا هى الرسمة. وازاى هنوزعها على الشغل لو هى مش مغطية الشغل كله.

الرسمة اللى هى أحيانا بيسموها "الموتيف" فى كتب التريكو أو حتى المجلات.
بتكون عبارة عن مربعات زى الشبكة والرسمة متوزعة عليها
كل مربع من المربعات دى بيمثل غرزة فى السطر الواحد.
وطبعاً كل صف من المربعات عبارة عن سطر واحد فى الشغل
طيب خلينا بأة كدة نوضح بصورة أحسن
عشان يكون الكلام عملى

يعنى مثلا الموتيف ده عبارة عن 13 غرزة (عرض الرسمة) والطول 18 سطر.

طيب ازاى بأة هنشتغل
تابعوا معايا

[mistry]

على بركة الله
نسمى الله ونبدأ نشوف هنقرأ الموتيف ازاى

قراءة بترون (موتيف) الجاكار:

أول حاجة مهمة لازم ناخد بالنا منها
ان الأسطر الفردية بنقراها من اليمين إلى الشمال.
أما الأسطر الزوجية بنقراها من الشمال إلى اليمين.

ولما نرجع للموتيف بتاعنا هنلاقى الرسمة بتبدأ من السطر الرابع
وبما ان السطر الرابع ده زوجى
(يعنى نقراه من الشمال إلى اليمين)

فهيكون السطر كالتالى:
6 غرز باللون الأساسى – 6 غرز باللون الثانى – 1 غرزة باللون الأساسى.

السطر الخامس:
(هنبدأ عادى من لليمين للشمال) فيكون السطر:
3 غرز باللون الأساسى – 1 غرزة باللون الثانى – 1 غرزة باللون الأساسى – 1 غرزة باللون الثانى – 7 غرزة باللون الأساسى

وهكذا

[mistry]

ادخال الألوان:

نيجى بأة للحاجة المهمة فى شغل الجاكار وهى ازاى ندخل اللون بشكل جميل وبحرفية

عادة اللى بيشتغل جاكار (وخصوصاً فى البدايات) لما ييجى يدخل لون تانى ييجى عند الغرزة اللى فيها تغيير اللون ويمسك الفتلتين (اللونين) مع بعض ويشتغل الغرزة
بس الطريقة دى فيها عيبين بيشوهوا الشغل وبيخلوا شكله مش حلو أبدا
أول حاجة ان بتبقى الغرزة فيها اللونين وده بيشوه الرسمة نفسها
تانى حاجة وهى الأخطر ان الشغل من الظهر بيكون كله خيوط متسابة بالعرض كدة
وده بيعمل مشاكل فى الغسيل وكمان بيضايق فى اللبس وخصوصا اذا كان الواحد لابس خواتم مثلا
ولو طفل ممكن الخيوط دى وخصوصاً لو كانت مساحتها كبيرة تضايقه جامد
الأفضل انى أسيبكم مع مجموعة صور تبين الطريقة دى
عشان يكون الكلام أوضح

(على فكرة الصور بترتيب الخطوات)

ملاحظين تعدية الخيط بالعرض ازاى

شايفين الشغل فاصل ازاى بين اللونين

وأخيراً شوفوا المنظر بايخ إزاى

بصراحة ما قدرتش أكمل
حاجة بشعة للغاية
وواضح جدا ان الرسمة معالمها مش واضحة
وكمان شكل ظهر الشغل وحش أوى وكل الخيوط دى بالعرض
تخيلوا بأة لو مساحة كبيرة (عدد كبير من الغرز) والشغل بأكثر من لونين
كان هيبقى الوضع شكله إزاى

[حبيبه أمها]

موضوع مهم اووووووووووووى ميسترى

وحيفيد بنات كتير ان شاء الله

وخصوصا ان شرحك جميل وواضح

بصراحه بيعجبنى اسلوبك البسيط

فى انتظار تكمله الموضوع

[shoshw]

طبعا موضوع مفيد جدا مدام من ميسترى ربنا يخليها

[mistry]

طبعا موضوع مفيد جدا مدام من ميسترى ربنا يخليها

مرسى يا شوشو
وان شاء الله تستفيدى منه

[mistry]

موضوع مهم اووووووووووووى ميسترى

وحيفيد بنات كتير ان شاء الله

وخصوصا ان شرحك جميل وواضح

بصراحه بيعجبنى اسلوبك البسيط

فى انتظار تكمله الموضوع

أتمنى يا حبيبة ان الموضوع يكون فعلا مفيد لأكبر عدد من البنات
لأن شغل الجاكار مهم جداً
ومطلوب ان أى حد بيعرف تريكو
لازم يكون بيعرف جاكار
وطبعا لما يعمله بشكل جميل ومتقن بيدى نتيجة حلوة أوى
مرسى على تشجيعك