حملة الاستعداد لرمضان بالذكر و القرآن
مشغولة؟
رزقت بطفل جديد و مشغولة بيه جدا و مش لاقية وقت؟
عندك شغل فترات طويلة في اليوم؟
عندك أولاد و شغل البيت مش بيخلص ؟
مشغولة علي طول و مش لاقية وقت؟
حاسة بزهق و كسل و ضيق في الصدر؟
حاسة انك عمالة تجري و مش عارفة تقفي؟
تعالي الموضوع ده علشانك
بصي يا أختي المشغولة انا كمان مشغولة زيك بالظبط عندي بيبي جديد و بيبي قديمو طبعا شغل البيت زي ما انتم كلكم عارفين
عشان كده فكرت أعمل الموضوع ده لكل اللي زيي و مشغولين ربنا معانا و يعيننا
انا مش هأكتب كلام مكرر و لا هأكتب آيات في فضل الذكر و القران لأن و الحمد لله كلنا عارفين الكلام ده
انا هنا همي التنفيذ
يعني هأتكلم من قلبي لقلوبكم هأقول مشاعري انا
انا طبعا مشغولة جدا سهر بالليل شغل بيت بالنهار و حاسة بالارهاق
يعني من الاخر ماعنديش وقت أصلي زيادة لأن اصلا مع الدوامة دي لو صليت الفروض في أوقاتها يبقي الحمد لله اوي
عشان كده فكرت ايه ممكن يعوض الانشغال الدائم ده خاصة و رمضان علي الأبواب و مفيش حد يقدر يفوت رمضان عشان طبعا مفيش حد ضامن انه يشوفه تاني
اللهم بلغنا رمضان
فكرت اني ابدأ بالتدريب و الاستعداد و طبعا مفيش حاجة تحلا من غير أخوات معايا نعين بعض و نشجع بعض
أدخل في الموضوع بقي
المطلوب في الحملة:
1- الاستغفار يوميا علي الأقل 200 مرة او 10 دقائق ممكن نزود بس دي البداية طبعا
2- الصلاة علي النبي علي الأقل 100 مرة يوميا او 5 دقائق
3- قول " لا اله الا انت سبحانك اني كنت من الظالمين " علي الأقل 100 مرة يوميا او 5 دقائق .
4- قول " لا اله الا الله" علي الأقل 100 مرة يوميا او 5 دقائق
5- قراءة صفحة من المصحف
ايه مفيش وقت ؟
طيب ماشي اقري السور القصيرة اللي انتي حافظاها يعني مثلا ( المعوذتين و الاخلاص 3 مرات) و الفاتحة و اية الكرسي
راجعي لأولادك القرآن بتاعهم
او سمعي لهم
المهم لا يخلو يومك من القرآآآآآآآآآآآآآآن
6- و طبعا نحاول قدر الأمكان تكون الصلاة في مواعيدها
طبعا كل ده قابل للزيادة بس دي اول خطوة عشان نبدأ
طيب هنعمل كل ده امتي؟
و انتي بتطبخي
و انتي بترضعي ابنك او بنتك
و انتي في المواصلات رايحة شغلك
و انتي بتنضفي البيت
قبل ما تنامي
و انتي بتغسلي الاطباق
و انتي بتطوي الملابس
عشان كده انا حددت عدد او وقت لأن طبعا مش هأعرف أعد و انا بأطبخ او بأعمل اي حاجة تانيةلكن ممكن ابص في الساعة ومع التعود طبعا مش هنبطل ذكر بأذن الله
و الله يا بنات لما بأعمل بكده بأحس براحة نفسية و عدم رغبة في الكلام اللي مالوش لازمة يعني لا نميمة بقي و لا حتي كلام تافه لأن الحاجة للكلام اشبعتها بذكر الله لا و ايه أخدت أجر كمان
ها مين هتشترك معايا؟
هندخل كل يوم نقول يومياتنا عشان نشجع بعض و ممنوع الغياااااااااااااب
اللي موافقة و هتيجي معايا تقول ياللا و تستعد و هنبدأ من بكرة ان شاء الله في كتابة اليوميات
و ياللا اللي هتشترك تحط ده في التوقيع و يا ريت تحط عليه الرابط للموضوع عان أكبر عدد يشترك
و ماتنسوش الدال علي الخير كفاعله
ياللا مين هتيجي؟
رد مع الاستدلال
الروابط المفضلة