افيدوني باطباق سهلة وسريعة ولذيذة للمراة بعد الولادة

[سوسو1983]

السلام عليكم يابنات ومشرفات الركن الجميل

حابة اسالكو

اتمنى تحكولي من خبرتكو خاصة الامهات الي الهم باع في عالم الامومة

شو طبخات كويسة ولزيزة وشهية وسريعة التحضير في فترة النفاس

استثني ::: الشوربات بانواعها والدجاج المسلوق والسبانخ والكبدة والسلطات والاشياء المعروفة هاي

لاني عارفاها وايام ولادتي السابقة عملتها كم يوم ومليت من هادا الاكل استغفر الله

وكون اني بغربة يعني ولانو طبعي اني مابحب حد غيري يدخل مطبخي حتى جوزي

اتعب نفسيا ههههههههه

المهم فانا الي بعمل شورباتي واموري هاي عالسريع

فحابة منكو طبخات منوعة ومفيدة وخفيفة وسريعة

جزاكن الله خير...

[ام مرمر و ليلو]

اهلا اختي سوسو
وربي يخليلك ابنك ويتمم حملك على خير
شوفي في رابط للمراة العاملة راح يفيدك
لانه للاكل السريع
وهذا الرابط له شوفي ويارب يفيدك

http://www.lakii.com/vb/showthread.php?t=614682

[●•°BaSmA°•●]

أم مريم ما قصرت
اتصفحي الرابط واختاري شي مناسب الك

بصراحة ما بلاقي في أكل سريع ويكون مفيد للجسم وخاصة للولدانة جديد
أنا بقترح عليكي تجهيز مسبق وتفريز ما يمكن تفريزه بتلاقي خلال أول شهر من الولادة
ممكن أختي تفرزي أكلات تعمليها قبل الولادة وبتلاقيها جاهزة بس عالتسخين
مثلاً أنا دائما لما اعمل شيخ المحشي بفرز كمية بلاقيها وقت بكون تعبانة
واللبن أنا بستعمل اللبن الغنم كمان بشويه وبفرز كمية منو
ولما يجي عبالي شيخ المحشي
بس بكون عندي تحضير الرز وهاد سهل
الباقي بيطلع من الفريزة وبفك من الثلج وعالتسخين فقط
كمان عنا أكلة الشاكرية ورز ممكن تتفرز الشاكرية مطبوخة وبضل عندك التسخين وعمل الرز
ممكن تعملي معجنات كمان لذيذة بهيك ظروف
ممكن تجهزي دجاج متبل و تطالعيه وتشويه بالفرن بما أن القلي صعب ولازم شغل ورا يوم كامل
ممكن تجهزي كبة إذا بتحبوها وتجهزي شوربة العدس وكمان عالتفريز
كلو هاد مناسب لوضعك ومغذي الك وللبيبي بأول فترة
لا تهملي حالك وجهزي أكل مغذي يفيدك ويمدك بكل الفيتامينات والبروتينات يلي بيحتاجها الجسم بعد الولادة
وإن شاء الله بتقومي بالسلامة أنت والبيبي
وإن شاء الله يفيدوكي الأخوات بأكلات تانية

[amani1]

ان شاء الله تقومي بالسلامه يارب
ماشاء الله ام مريم وبسمه ما قصروا وما خلوا لي شئ احكيه

[سوسو1983]

اخت ام مريم العراق شكرا الك حشوفو واشوف المناسب الي

اختي بسمة شكرا الك حبيبتي
بس الكبة وهاي الاشياء بدها شغل وانا مافية حيل
اضافة المشكلة الاكبر فريزري صغييييييير لهيك التفريز عندي صعب ومقرف
بس ممكن ان شاءالله اطبق فكرة الجاج المتبل

شوربة العدس كمان حلو بس انا بحب الخضار والحجات هاي تكون طازة افيد
ان شاءالله الله بقدم الي فيه الخير
تسلمي كتير


اختي اماني شكرا الك جزيلا وجزاك الله خير

[●•°BaSmA°•●]

فعلا مشكلة لما تكون الفريزة صغيرة
ان شاء الله تلاقي بالرابط أكلات سريعة ومفيدة بنفس الوقت
بالنسبة لشوربة العدس يمكن طريقتنا بتختلف شوي
ما فيها خضار
عبارة عن بصل مفروم ناعم مكعبات وعدس وقطع عضام مخلية من اللحم أو لحمة مفرومة
بعملها بطنجرة البخار وبتطلع شي رووعة وما بتحتاجي خلاط حتى تخلطيها لأنها ناعمة جدااا

هي مفيدة كتير وخاصة لو كانت مطبوخة مع اللحمة بعضمها
بتناسب وضعك تمام بعد الولادة
الله يسرلك أمورك ويهونها عليكي

[سوسو1983]

بسمة تسلمي عالتفاعل
يعني تجيبي البصل والعدس و اللحمة وعالضعط وملح وبهارات طبعا صح
طيب اديش تقعد؟؟؟
لو عندك لينك الها بكون شاكرة الك كتير

[●•°BaSmA°•●]

للأسف لسى ما نزلتها بالمنتدى لكن نسختلك الطريقة من منتدى تاني أنا مشتركة فيه

شوربة العدس

المكونات

لحمة مفرومة ناعمة
بصل مقطع ناعم أو جوانج
عدس مجروش (تقريبا لونه برتقالي)
كاس شاي رز (حسب الرغبة )
كمية ماء كافية للطبخ
ملح
بنلفح البصلة واللحمة
ويُضاف العدس المغسول والرز مع كمية ماء مناسبة
بيحتاج العدس لكمية ماء تقريبا متل البرغل
ممكن كاس عدس ياخد من 3 الى 4 كاس ماء
نطبخها على النار حتى تنضج تماما
أما الطبخ بالبخار فتحتاج حوالي تلت ساعة ومن ثم نتركها على النار حتى تتعقد الشوربة بشكل جيد
ملاحظة
إذا توفرت اللحمة بعضم يُفضل طبخ الشوربة فيها ,فهي أطيب وأشهى وإن لم تتوفر نستخدم اللحمة الناعمة
وصحة وهنا

هيك صارت الوصفة واضحة
طبخيها قبل الولادة وفرزيها بأكياس الفريزة حسب طلبك
وبتذكر شفت مرة طريقة فلسطينية وهي وضع قطع الخبز بشوربة العدس وبغطوها حتى يتشرب الخبز بالشوربة وبقدموها
جربتا بهي الشوربة عن جد طيبة كتير
ان شالله كون أفدتك فعلا
وصحتيييين

[سوسو1983]

شكرا اختي بسمة ان شاءالله اقوم بتفريزها بس افرغ الفريزر من الاكوام المجهولة الي فيه
طيب معلش سؤال الك وللجميع
نفسي افرز خضار مقطعة مجموعات لشوربة الخضار بس خايفة تروح فايدتهم عادي ولا ؟
اقطعهم واسلقهم ولا وهما لسة مش مطبوخين احطهم في الفريزر
فكرت كمان بالشعربة و لسان العصفور احمرهم عشان الشوربات
بس وين اخزنهم وقتها
وقبل باديش من موعد الولادة

بنفع احط مع الجاج في الفريزر بصل مقطع للمرقة يعني جاج وبصل مو مستويين بس بحيث اطلع الجاج واحطو دغوري بس يسيح في الحلة مع البهارات وهيك حتى فكرت احط اكياس بهارات صغيرة فيها ماتحتاجه كل سلقة جاج واحطهم مع كيس الجاج يعني يكون كيس جاج وبصلة مقطعة جوانح و كيس بهار منيح ولا البهار مابنفع بالفريزر

معلش تقلت عليكو


انا كلللل قلقي من الفريزر انو الحجات تروح فايدتها خاصة الخضار

[سوسو1983]

معلش مافهمت كيف طبخ الشوربة عالبخار قصدك حلة الضغط؟
اسفففففة تقلت عليكي تسلمي حبيبتي

[●•°BaSmA°•●]

بصراحة أنا ما جربت تفريز الخضار
أنا ممكن أفرز سبانخ إذا بتحبيها هي مفيدة جداً وبيبقى عليكي الطبخ ..طبخها سهل جداً
ممكن تغسلي الكزبرة وتنشفيها وتقطعيها بتلاقيها لوقت الاستخدام
انا حاسة فيكي والله وعم حاول ساعدك
بس يمكن بتختلف الأكلات من بلد لبلد فمش عارفة أختار ايه ولا ايه

بالنسبة للبخار اي نعم طنجرة الضغط
هي مريحة جداً كونك حامل وما بتحتاجي لجهد او وقت كبير
بتطبخ الشوربة وبتطلع ناعمة جدا لا تحتاج لخلاط
واي سؤال ولا يهمك
أنا جاوبت باللي بعرفه
وإن شاء الله الأخوات يفيدوكي ايضا

[لالي لافندر]

ماشاء الله الاخوات ما قصروا بالرد جزاهم الله خير

عزيزتي تفضلي هذه الروابط يمكن تشوفي فيها وصفة تفيدك

مهم: الكفتة سهلة الصنع سريعة التحضير ...كل وصفة لها مذاقها

وصفات خفيفة وشهية وسهلة التحضير .....لا تترددوا في طرق بابنا للمشاركة

[سوسو1983]

شكرا كتير بسمة ان شاءالله اعملها وافرزها بس ادخل في التاسع

لالي شكلي حبيبتي عالروابط الحلوة زيك