الكل معزوم على فرح ابني(بس نبي مشاركتكم)

[زنوبيا مصطفي]

"السلام عليكم
وينكم اخوتي العزيزات اين المشاركات والتعاون
اه خذلتوني وخاصه اخواتي الليبيات ما حد رد
هيا العرس قرب ومازلت ما جهزت شي محتاجه افكاركم
لا تخذلوني ولا ابحث عن منتدى اخر اجد من يقف معي
زعلتوني بصراحه

[الام60]

لا تنقهرين وتروحين على غير منتدى
الموالح اعملي الشي الي متعارف عليه بعاداتكم واعملي شي غريب لاول مرة كتنويع ومفاجاة وعدنا الحلوان نعمل البقلاوة والكيك المزين وحلويات حسب الي تريد جاهز او تعمل بالبيت شكرلمة ومعكرونة وصودا المعكرونة تتكون من الجوز الهندي المبروش يخلط مع البيض والحليب الطوز والسكر والصودا مثل البسكت من البيض والطحين والسكر وتضاف لها بيكاربونات الصوديوم ومنها جت التسمية والشكرلمة من السمن الحر والسكر والطحين والهيل وبيض قليل ونعمل الكاسترد بقوالب مع الجلي او على شكل ترايفل بطبقات مع الفواكه والمكسرات والنستلة والكريمة والفراولة حسب مامتوفر والله يسرك ويفرحك بكل اولادك وبعرس معتز وبالذرية الصالحة  

[شـآم]

[ملكةالرومانسيه]

ا

لسلام عليكم ورحمة الله وبركاته

اسفين اخت زنوبياااا
العشاء اقترح ان يكون ارز بالخلطة افضل من الشعيريه لان البعض لا يفضلها
والمبطن احس انه ملك السفرة الليبيه ولا استغناء عنه فى المناسبات ومستحيييييل اطيح موضته من الاخير ههههههه
وممكن اديرى فى حاجه اسمها الاخطبوطه عبارة عن دجاج وخضروات مشكله بالفرن وشكلها وطعمها روووعه
او ممكن الشمعه حتلى هيا روووعه شكل وطعم وفيه هلبه حاجات بس اسعارهم تختلف اهم شى تنوعى اديرى شكله باللحم كامل زى اسكالوب او كباب او شيش طاووق
وشى بالخضرة متلا امبطن او فليفله اوكبه
وشى يكون من العجين خبيزة محشيه او اى شى عجين ومحشى انتى وذوقك
انجوا للسلطه الصراحه السلاطه المشويه انحس فيها ضروريه ليش لانها ماحد ما يحبهاش اكيد هههههه
والشىء التانى تمشى مع الرز ياسلام ولانك بديرى لحم كباب او اسكالوب او شيش طاووق او غيره اللى تشوفيه مناسب
والنوع التانى ممكن السلطه الروسيه او سلطة البادنجان او فيه انواااع ماشاء الله هلبه لو تشوفى المنتدى تلقيه مليان اهم شى لو بديرى السلطه بنفس اليوم يكون احسن لانها لو باتت ليله حتطلع مش حلوة الا السلطه المشويه والروسيه لانى بصراحه جربتهم يقعدوا يومين مافيش مشكله اما الانواع الاخرى لان كل شى يكون من الخضرة طازة احلى
وممكن تحطى بقلاوة مع العشاء او ممكن اديريهم فى باكوات او تغليفات حلوة كله يعتمد على ذوقك والاهم الماديه
ان شاء الله ماتزعليش يا سمحه عالتاخير ولو لقيت اى سؤال ومحتارة فى اى شىء ماتتردديش وتحطيه ممكن نحطوا فكرة تفيدك وربي يتمم على خير

[عاشقة خديجة]

[زنوبيا مصطفي]

ايوه هكي ريحتوني فعلا حسيت عندي اخوات وصديقات
بارك الله فيكن انا الان ارتحت وافكاركن كلها حلوه
وفي محلها وسوف اخذ بها وانا سوف احاول ان ابحث
عن وحده شاطره تعمل في الموالح وسوف اعطيها فكرة
اختي ملكةالرومانسيه واختي شذى وحزن واحا ول ان اعمل اشياء
جديده وحلوه ومتناسقه ومتنوعه مثل ما قلتن اخواتي
وفعلا عزيزتي المبطن لا غنى عنه ممكن اعمله لاكن ليس في
يوم الزفه ممكن في الصبحيه او عزومة الرجال او الرمي
وقلتي على شي اسمه الاخطبوطه مش مار على ما عرفتاش
يا ريت تحكيلي عليه اكثر اختي ملكة الرومانسيه
احسنتو عزيزاتي ولا تنسوني خلوكم معي خطوه خطوه
وكله مردود في افراحكم ان شاء الله

[ملكةالرومانسيه]

السلام عليكم
الاخت زينوبيا
بالنسبه للاخطبوطه والله ماشفتها ولا ذقتها
بس اخواتى كلمونى عليها وهم بطرابلس طبعا وانا واثقه بذوقهم
خوى دار اسبوع ولده حاجات حاره ومن ضمنها الاخطبوطه شكروهولى هلبه قالولى حاجه راقيه شكل وطعم يجنن
لو تسالى الاخت زينب محمد اكيد عندها فكره

[ملكةالرومانسيه]

زى ماقتلك عبارة عن شريحة دجاج وجزر مقطع طولى وايضا فلفل اخضر بالوان مختلفه وكلهم مشويات بالفرن ومشدودات بعود خشب

[عود قرفه]

اولا مبارك ماتعولي وان شاء الله بهناه وطول عمره

زغرتوله يا ناسه معتز خش العراسه

هده الاغنيه شديها طول العرس ههههههههههه

اما الحار ماشاء الله في هلبه حاجات عرس اختي كان في شهر 4
والعشى جي اجنن بشهاده الكل لو في طرابلس كنت عطيتك عنوان اللبنانيه اللي دارتنا الحار

بس نعطيك فكره عن العشى ارز بالكبده والالواز

3 سلايط المشويه وسلطه الجزر وسلطه الدجاج جديده واكتر المعازيم عجبتهم وسئلو عليها

امبطن شكل جديد الطرف اللي تحت بدنجال تم طبقه عاليه مفروم تم بطاطا تم مغطستهم في دحي وخبزه مرحيه والجوانب جبنه سايله ومعدنوس شكاها وطعمها ايهبل

صدر دجاج محشي علي كبره عجينه الباف محشيه دجاح وكاجو
جزيره اللحم مش دجاج
وطبعا كل شي حجمه كبير يستر ويشبع


ان شاء الله اتفوتي مناسبتك علي خير

[زنوبيا مصطفي]

بارك الله قيك اختي عود قرفه على المشاركه
والافكار الحلوه ايش الاسعار عندكم في طرابلس
بالنسبه للموالح الباين الحاجات اللي قلتي عنها
جديده وحلوه عطيني فكره ممكن نعمل حاجاتي في طرابلس
ديما حاجاتها احلى وعندي ابني يشتغل غادي
وكذلك اهل العروس في طرابلس
نحن في بنغازي حسب الشغل بالنسبه للموالح الاسعار
75 قرش وما فوق الطرف

[زنوبيا مصطفي]

بارك الله فيك اختي ملكة الرومانسيه على اهتمامك
وان شاء الله نسال عن الاخطبوطه وانتي كان عرفتيها بالتفصيل قوليلي
واسفه تعبتك معي

[omsuma65]

السلام عليكم ورحمة الله
اولا الف مليون مبروك عليك وعلى اوليدك يااختي زينوبيا
وان شاء الله ايتم على خير ويتنزل فيه البركه ياربيا
اختي الغاليه انا ماجربتش الى الان
بس ربي ايعينك المعازيم واجد
هههههههههههههههههه
طبعا عادي في شرقنا الغالي مافي مشكله
انت بس حاولي تستخدمي الورق والقلم ونظمي امورك تلقي روحك مرتاحه
وجهزي اللي تقدري عليه بدري بيش يوم الزفه تبقي مرتاحه واعطي لنفسك
وقت واهتمام
وطبعا اكيد يد المساعده ماشاء الله
عني انا هذي شوية افكار حار وحلو اذا عجبوك من بكر ه انحطهم في المنتدي بالتفصيل وبالصور




طبعا هذه البكلاوه الليبيه درتها في العيد
وهذا المعمول عندي له طريقه سهله جداااا









وهذه شوية حلويات خفيفه


وهذه نوع جديد اسمه الوره
طبعا هذه نيه

وهذه لما اتعسلت بعد الطياب وطعمها قريب من البكلاوه





الحار حاليا عندي لفائف الكباب




وفطيرة الكاروهات الزليز هههههههههه
وهي افضل تكون من العجينه المنتفخه




وهذه طريقتها قبل ماطيب


واخيرا اذا حابه الطريقه حاااااضر من عيوني ياام العريس
ارهو بنغنولك
اطير الحنه وانوريك
هههههههههههههههه
الف مليون مبروك ياغاليه
الله ياريتي امعاك عندي نيه في رز وعصبان هههههههههههه

[omsuma65]

تي وينك يازينوبيا ههههههههههههه
شكلك لاهيه
معذوره والله
اانتخيل فيك ماشيه للسوق هههههههههههههه
سلامات
لنا لقاء ان شاء الله
ام سوما

[المطمئنه]

ام سوما ماشاء الله عليك
حلوياتك اتجنن والموالح اجمل انا اعجبني فطبرة الكروهات روعه وجديدة
اختي زينب اتمن ان يتمم الله لك علي خير
طبعا نحن من اول المشاركين في فرح معتز لاني خالتوه
والعقبال عند الجميع

[gudona]

ام سومه ماشاء الله حاجاتك فعلا نازكه وانا عجبني الكروهات كيف ادريها ياريت تقولينا
الاخت زينب ان شاء الله ايجيك فرح اهبل ويعجب الناس كله بتجهزاته وناسه وبالهني والرفاء والبنين لوليدك