يوميات ربيعة. *** وسام التميز ***

[حمرة الورد]

بعد ماطلت لي قرون ..وشعري وقف . .جا السيد (طلال)..وطلعت تاني

أشوف إيش سار في الآدمية ..لحسن الممرضات أعوذ بالله..إلا تجيني ممرضة

:_إنتا أخت (حنان)؟

:_ إيوة أي شي أختها والا أمها..

:_ (حنان) دوبو ولدت ..وتبغى إنتا بسرعة..

قلبي أنقبض ..ياربي ..ياربي ..إيش تبغى بي ..

:_ جوزها جا أناديه؟

:_ لا هي قول نادو مرافق حق هي.

:_ طيب أنا جاية..

دخلت الغرفة لقيت (حنان) شايلة نونو لابس بمبي..ولما شافتني تبغى تطير..

:_ تعالي (ياربيعة) الله يسعدك..شوفي (بنتي)..

بنتها !!! إيش تقول دي..آخرتها بنت..كل ديك المشاكل وتطلع بنت..بعد

بلامة دامت شويتين. .رديت عليها..

:_ ماشاء الله تبارك الله ..الله يبارك لكم فيها ..ماشاء الله زي القمر.

:_ (ربيعة) والله العظيم ماني عارفة كيف أشكرك ..بصراحة موقفك اليوم

خجلني مرة . .وسامحيني بالله على قلة الزوق إليي سويتها..

طيب

[حمرة الورد]

ام سهيل ..الله يسهل عليك ويبلغك ساعة السلامة..

صدى ....

ام 3 بنات..الله يسعدك فتحتي نفسي .. ..سبينا من هوازن دحين..

متفائلة .. اهلا بيك..

سراب الليل...شرفنتنا الزيارة..

[ترتيل]

رووعة لكن طوليها لاني حاسة إن القصة اوشكت على الانتهاء
جزاك الله خيرا

[حمرة الورد]

المهم جابت بنت ولد أبغى أرجع بيتي دحين ..حيلي مهدود ..وبزورتي مبهدلين ..

لكن هيهات ..أتصلت (خالتي) وقال لي :_ (ربيعة) خليك في المستشفى أنا جاية دحين..

طيب تجي والا تروحي أنا إيش لي..ومن متى ماشاء الله الزيارات ..كلنا

ولدنا ولا زارتنا ..يعني دي على راسها ريشة..

والله كم مرة فكرت أسوي قواية وأرجع البيت لكنها أتصلت على (حسن)

كمان وحسبت حسابها ..أضطريت إني أستناها.

المفاجأة لما جات خالتي..معاها (أحلام) و(رجاء) و(رتيبة) و(منال)..لمت

كل إليي قدرت تلمهم .

إيش معنى طيب (حنان) ..والا عشانها مرت الصغير..

تدرو ..من جد (إن بعض الظن إثم)..لما دخلنا الغرفة ..وكشفو وجيههم

لقيت الوجيه ملطشة تلطيش..كأنهم أكلو محاضرة في البيت ..طبعا أقصد (أحلام) ..

جاتني (رتيبة) وقالت لي أتفرجي ..مافهمت إيش تقصد إلين أفتتحت

(خالتي) جلسة المحكمة وجابت محل الخصام..(البنت).

أول شي كلمتني.:_ (ربيعة) ..الله يبيض وجهك ويسعدك يابنتي ..وقفتك

مع (حنان) ماتتقدر بتمن..والله إنك بنت أصول.. وبنت ناس متربية

..ماخيبتيني من يوم ماأخترتك لـ(حسن)..

نفخت صدري وفتحت إدني ..

:_ أما إنتو ..ماتستحو على وجيهكم ..شفتو آخرتها ..طلعت بنت..

لا(علي) ولا (إسماعيل)..بس قليتي الأدب ياست (أحلام) على وحدة في

مقام أمك..وطولتي لسانك.. جاتك من ربنا ..تاني مرة ما أسمح لقلة حيا

زي كدا تصير في بيتي ..سامعين ..قومي يابت (أحلام) سلمي على مرت

أخوك وأستسمحي منها ..بسرعة ..أنا بأهرّجِك..

طبعا المنتظر مني إني أقول لا أبداً والله ..سامحتها..لا.. قعدت زي الصنم

وخليتها تجي تبوس راسي وتعتزر زي العالم والناس..

يحيا العدل..J

[a&a]

يحيا العدل
يحيا العدل

والله حتى هي ماهي سهله...كانت كانها قاعده على قلبها وهي في المستشفى......وبعد موقفها من احلام يبين انها ماهي هينه

اتحفينا بباقي القصه الله يجزاك خير

[أم3بنات]

روعة روعة
الله يسعدك ياشيخة على هذه القصة اللي تفتح نفس الواحد يقوم يشتغل في البيت على رواقة
كملي وطولي الاجزاء شوية لو سمحت

[- asma -]

ما قلت لكم ربيعة بنت ناس



سبحان الله أحلى حاجة لما تجي وحدة كبيرة في السن تعترف بقدرك >>> اندمجت

[ام سهيل]

والله شيء

تستاهل ربيعة كل خير عمره الطيب مايروح هدر .

حمرة فشيتي غلك في احلام ولا لسة ؟؟

[حمرة الورد]

طبعاً إليي سار أعطاني دفعة طاقة قوية إني أقعد باقي اليوم ..طبعاً ماطولت

كتير..قعدت شويتين مع (حنان) إليي كانت آخر كآبة ..والله في نفسي

حزنت عليها ولادة زي الهم وبعدها خصمة زي الناس من (أم جوزها)..

بس كل دقة بتعليمة..

المهم جا (جوزها) وأنا بأغير للبنت قمت صكيت علي الستارة ودخل فتح

موضوع مشوق مرة معاها..

:_ الحمد لله على سلامتك يا (حنان) .

:_ الله يسلمك ..فين كنت.؟

هو وقته يا(حنان)..إيش بها دي الحرمة شكلها راح تنفجر..

:_ في العمل ..مو عارفة إنو اليوم عندي دوام..

:_ هدا كله في العمل ..أنا خرقت التلفون عليك وماترد ..ولا الجوال يشبك..

:_ طيب معليش سامحيني دي المرة..

:_ دي المرة؟ إنت تحسبها بالسهودلة دي؟ بالله عليك لو أخوك (حسن)

راح العمل هو كمان كان ولدت أنا في البيت؟

:_ إنت إيشبك حمقانة كدا ..الحمد لله ربي سهلها وولدتي وخلصتي.

:_ إنت ماسمعت (أمك) إيش سوت..جات خبطت دمي وراحت..وولدت

وخلصت بدي السهولة كدا ..طبعا مو إنت ماتدري عن شي.

:_ يادي (أمي) وشكاويك منها..

إيوة وحدة بوحدة زي ما إنت خبطتي دمي..ربك خبط دمك..وي أنا إيش بي..

مسكين الرجال قعد يهدي في الآدمية إلين طفش حياته ..بعدين رما لها

القنبلة اليي كان مؤقتها.

:_ إيش رأيك يا(حنان) نسمي البنت (عباسية) ..على اسم (أمي)..

:_ إيــــــــش؟ إنت أتجننك والا قاعد تسوق الجنان على راسي..؟ تبغى تموتني..تميسها (عباسية)؟

:_ إيوة على اسم (أمي).

:_ سيبنا من (أمك) دحين ..إنت مستوعب الاسم ؟ حتى ما أدري إيش

معناه؟ لاااااااااااااااااااا أكيد صابك شي..

:_ شوفي يا(حنان) ترى من الصبح وإنتي فاقعة مرارتي مافي غير عباسية

..عجبك أهلا وسهلا ماعجبك عسا عمره ماعجبك ..سامعة ..

وقام رقع الباب وراه ..وقعدت (حنان) تبكي..

والله ما الومها ..إيش (عباسية) دا كمان..أصلا هي (أمه) مو

عاجبها..الحمد لله على كل حال.

[حمرة الورد]

ترتيل فينك من زمان انا فكرت اسويها فصول وكل فصل قصة لوحده ..وبهده الطريقو راح تطول القصة ..

a&a تعرفي القصة تصلح لتعليم التعمل مع الناس بطيبة وبدون كسر الجناح .. مافيها شي لو كنت طيبة واعامل الناس زي مااحب يعاملوني وفي نفس الوقت ماتنازلت عن حقي وخليت اليي يسوى واليي مايسوى يتعدى عليه....

ام 3 بنات ..ممكن اعرف ايش دخل شغل البيت ؟ ..

صدى ..تصدقي عاد بغيت اسويها هي كمان قوية مستوية بعدين قلت بلاش سدة النفس ....

ام سهيل.. ..اظن ارجع ابهدلها شوية ..بس الين دحين ماقررت على شي اكيد

[أم3بنات]

حمرة لاتضحكي علي
كانت نفسي مصدودة مرة ومالي خلق اقوم اشتغل وجلست على النت والا مرة عجبتني وقمت زي الملوينة
عرفت ايش دخله

[ام سهيل]

حمرة
اما زوجها غلس غلاسة
الحرمة توها نفسانة ويجي يحرق دمها .

اما مسلسل .

[إيمان علي]

بتجننننننننننننننننننننننننننننننننننننننننن يا وجنات يا أديبة انت
عباسية؟ والا انه مفتري ههههههههههههههههههههه
بس شفتي.. طلعت بنت مثل ما بدي
وأعتقد أنه الرجال متزوج والا هي بهالدنيا..
يالله اختمي عاد لأني شوبت من التحمس

[حمرة الورد]

الى هنا ونصل الى ختام الحلقة الاولى من المسلسل الحجازي يوميات ربيعة ..
نترككم في رعاية المولى والى اللقاء في الحلقة القادمة ..بعد ما ارجع من السفر..ان شاء الله..

حللوني لو سمحتو..

[حمرة الورد]

ام 3 بنات ... اجل الحمد لله فتحت نفسك عقبال ماتقعد مفتوحة دايما..

ام سهيل ..قمة الغلاسة سبحان الله .. بس اليي يشوف مصيبة غيره تهون عليه مصيبته..الحمد لله محد سوا فينا دي المواقف ..

ايمان ..انت لك قعدة بعدين ..اعذريني اني صدمتك ..لكني مرة مشغولة والله ..ربي عالم بحالي ..اسرق الوقت سرقة عشان اكمل دي الحلقة .. بس طلعنا بشي مفيد ..الحمد لله ..