مشكلتي مع بنت حماي

[نانا_فلسطين]

مش حابة اطول عليكم ... بس انا بجد متضااااااااااايقة وبدي انفجر .. رح أفوت بالموضوع عطول
أنا عندي 4 بنات حما .. وحدة منهم قضت عمرها بغربة ... وصارلها تقريبا 3 سنوات جاية لهون ... امها ميتة وحماي متزوج ... حماي بيحبها كتيــــــــــر وبيحزن عليها لأنها قضت حياتها بغربة .. وهي أكبر وحدة ببناته .. وبتأثر فيه كتير .. انا والله وربنا بيعلم اني ماعمري قصرت معها بشي .. بس هي ربنا يهديها .. كتير عم تعملي مشاكل بحياتي .. واللي بيقهرني أكتر .. انه ابوها دايما واقف معها عالصح وعالغلط ... بتعتبر حالها انه هي المسؤولة عن خواتها والها الحق انها تدافع عنهم .. وانه هي رحم ... واخوتها مجبورين يتحملوها ويتحملوا تصرفاتها .. انا ما بكرهها بس مش قادرة أتحمل اكتر ... يعني بحسها بتستناني على غلطة صغيرة مشان تقلب الدنيا عراسي ... حاليا انا مابحكي معها ... صارت مشكلة بينها وبين سلفتي ... وحكت قدامي وانا دافعت عن سلفتي فهي زعلت ... وبطلت تحكي معي ... هي حرة ... وانا مابعتذر الا لشخص بكون متاكدة اني غلطت بحقه ... المهم هلأ انه اجا رمضان ... وزوجي بالعادة بيروح على خواته بهاد الشهر .. وطبعا رح يروح عليها مشان يعطيها مصاري متل خواتها ... وهاد اللي انا خايفة منه ... انه هي ما تقبل توخدهم .. أو تسمعه كلام يجرحه .. او تجيب سيرتي قدامه وتسببلي مشكلة جديدة ... والله اني تعبت من التفكير ... لأني بعرف طبعها .. ولانها قبل فترة طلعت معه بالسيارة وحكتله انها زعلانة منه ومني لانه انا نقلت حكي وزدت عليه لسلفتي ... ولأنه زوجي كان مطلع عالقصة كلها من اولها وبيعرف شو اللي صار بالزبط دافع عني وما سمع لاخته .. من هداك الوقت وهي زعلانة منه كمان وماعم تحكي معه .... شو لازم أعمل؟؟!!! مش عارفة
بس والله اني تعبت .. وزوجي طول اليوم بيحكيلي انتي مش طبيعية .. وانا مش عارفة شو احكيله .. ولا كيف لازم اتصرف

[kamer14]

الأهم في الموضوع أن زوجك يعلم اللي صار بينكم و هو في صفك
و المهم أيضا أنك مقتنعة بتصرفاتك و غير ندمانة عليها
لا تحملي الأمر فوق طاقته و لا داعي لكل هذا القلق
فليذهب زوجك لأخته كما العادة و ليتوقع أي تصرف منها إيجابي كان أو سلبي
و ليحاول يهدئ الأوضاع بالنقاش معها و إن كانت صعبة الطباع فالصمت أولى
و مهما قالت فيك فلن يضرك شيئا فالكل يعرفك و يعرفها
و لا يزيدك كلامها و لا ينقصك شيئا

حاولي تتجنبي الجدال معها مااستطعت
و خل علاقتك معها واجبات و رسميات تجنبا للمشاكل
أغلب مشاكلنا هي نتيجة ردود أفعالنا و ليس لأفعال الآخر
فنحن نتحكم في أنفسنا و لا نتحكم في الآخر

تقبلي مروري

[ســـــاميــــة]

عزيزتي نانا
أنا عضوة جديدة في المنتدى ولفتت نظري مشكلتك فحبيت أعلق
أولا .. كل عام وانت بخير
ثانيا.. جميل منك جداً حرصك على علاقة زوجك بأخواته وعائلته .. فهذا يدل على أصلك الطيب
ثالثاًً.. القاعدة الذهبية في التعامل مع الآخرين (خاصة الغير قريبين إلى القلب)
"إدفع بالتي هي أحسن ، فإذا الذي بينك وبينه عداوة كأنه وليٌ حميم"
فهي الطريقة الربانية . وبتشتغل جدا ولو بعد حين
احرصي على تقديم الخير والحسنى لأخت زوجك .. ومع إلتزامك بالدفع بالحسنى ستتحول معاملتها معكِ بإذن الله

[@ام الخير@]

اختي نانا

لا تفكري كثيرا

عامليها بلطف وتجنبي ذكر خصوصياتك امامها وتجنبي ابداء رايك كثيرا فيما يضايقها

لا ادعوك لتصمتي دائما ولكن احيانا ينفع مع امثالها لهجة الاستغراب والتجاهل وكانك لا تعرفي شيئا

اما زوجك فاحمدي الله انه صدقك ولتزيلي اي تاثر لها عليه ضدك احرصي دائما على تحنين قلبه عليها وذكر بعض محاسنها وشاركيه في اختيار هدية مميزة لها او حثيه على زيارتها


دعيه يشعر بحبك لها وحرصك على اسعادها

وبين الحين والاخر بطريقة لطيفة قولي مثلا : فلانة قلبها خنون وبتحب كل اخوتها بس الله يهديها لو انها ما تدخلت بين فلان وزوجته وخلتهم يحلوا المشكلة لحالهم

وهيك تعليقات بسيطة توصل للمستمع انك تنتقدي من باب المحبة وليس الاستياء


شجعي زوجك على تحمل كلامها لو اظهرت اي زعل او استياء منه وان حصل وزعل منها لا قدر الله فكوني معه تلك الزوجة الحريصة على علاقة سليمة بين زوجها واخواته

فانك تكسبيه دائما معك ويزداد احترامه لك وفهم سلوك اخته اكثر



وان استمرت في التدخل فحددي علاقتك بها وقيدي المواضيع المشتركة بينكم

يعني كلامكم بوجودها عن الامور العامة اخبار سوريا والبلدة وغزة والاردن والمدارس واللي صايبها والكلاب وعدم اهتمامهم بالدراسة والبنات واللي بيعملوه من ورا اهاليهم

وهيك مواضيع

[نانا_فلسطين]

رجعت مشان أحكيلكم شو صار باليوم اللي أنا كنت خايفة منه .... بس قبل ما أحكي بدي أشكر " أم الخير " على نصائحها ... وان شالله ربنا بيفتحها بوجهها يارب
المهم .. زوجي أخد ابوه وراحوا اشتروا " دجاج " وهاد عنا شي معتادين عليه بفلسطين ... وراح على خواته كلهم ... مشيت الامور تمام .. لحتى وصل عند اخته اللي انا كاتبة عنها ... حكتله : أنا حالفة يمين ما آخد شي منك ومابدي منك ولا جاج ولا عيدية ... بدي 2000 شيكل الي ولخواتي ... كل وحدة 500 ... بدل دهب امي اللي انت اخدته .... واعطته الكيس وهو طالع ..... هي بتحكي بموضوع قبل 15 سنة .... وانا وقتها ماكنت متزوجة .. حماتي الله يرحمها كان معها سرطان .. وكان زوجي الوحيد اللي مش متزوج باخوته .. فهو كان ياخدها عالمستشفى ويجيبها ويصرف عليها ويحممها ويغيرلها عالجروح ... فهي قبل ماتموت كان معها خواتم وحلق ... واعطتهم لبنتها هاي وحكتلها تعطيهم لزوجي .. وزوجي اخدهم وباعهم .. وقبل سنتين اشترى كولر مي وحطه بالمسجد عن روحها ... وحكالي .. كل فترة ان شالله رح اعمل شي عن روحها .. الله يرحمها ويحسن اليها

[نانا_فلسطين]

القصة تاعت الجاج كانت قبل يومين .. مبارح اجت سلفتي وبنتها تسهر عنا .. وحكت لزوجي انه اخته حاكية عن زوجي حكي معين .. وهو زوجي ماحكاه ... فاليوم كنت انا عازمة حماي ومرته عنا ... زوجي بيحكي لابوه : انا لما رحت عند اختي انت كنت معي صح؟؟ شفتني جبت سيرة حدا؟؟ حكاله لا ... زوجي حكاله : طيب ليش بنتك بتحكي عني للناس شي ماحكيته؟؟؟ والله ماهي مصلية عالنبي .. انا تركتهم وطلعت عالبيت اكمل طبخ ... نزلت بعد شوي لقيت حماي بيحكي معها تلفون ... وسمعتها بتحكيله : لا تطمعلها ولاتسمحلها تتدخل فينا ... ولا تعطيها وجه ..... طبعا انا عصبت لانه فعليا انا ماعم اجيب سيرتها لا بالخير ولا بالشر .. بس طبعا هي حاولت تخرب بيني وبين ابوها وماقدرت ومشان هيك هي زعلانة ... انا عصبت واتصلت فيها قدام زوجي وابوه .. وقلتلها انت شو اللي بدك اياه؟؟ انا شو عاملة فيكي ؟؟ بدي افهم؟؟ حكتلي انا زعلانة منك لانه انت شبكتي بيني وبين فلانة وانا قلتلك ماتدخلي فيي .. قلتلها انا؟؟ حسبي بالله ونعم الوكيل بس ... مانتوا كل يوم مع بعض انتي وفلانة ... عالعموم ازا انتي زعلانة انا ما براضي حدا وما بهمني غير زوجي ورجاء لا توجعي راسي وهاي المرة رح اسكت عشان زوجي بس المرة الجاي اقسم بربي لاوصل الموضوع لاهلي ويلا السلام عليكم وسكرت الخط
الا هي بتتصل عابوها وبتحكيله : شوف احكيلك .. احكي لاخوي ازا بيعطيني ال 2000 شيكل رح انسى كل اللي صار .. وازا ما اعطاني لا هو اخوي ولا بعرفه ... جوزي طبعا عصب وحكى لابوه والله لو انها محتاجة لاعطيها اللي بدها اياه .. بس هي معها اكتر مني
للعلم بس ... هي الها ابن باوروبا وبيبعتلها مصاري دايما .. وعندها عمارة ومخازن للايجار بالاردن ... وعم تبني بيت هون كمان ... يعني وضعها احسن من وضعي .. وخواتها كلهم وضعهم منيح
حماي حكى لزوجي : خلص اعطيها اللي بدها اياه .. زوجي حكاله : مارح اعطيها لانه هاد مش اسلوب للحكي وانا مابحب حد يجبرني اعمل شي ... وكملنا اليوم طبيعي ... وحماي روح من عنا مبسوط ....
وكمان اسبوعين بييجي العيد ... وبتيجي قصة جديدة معه ... وحسبي بالله ونعم الوكيل فيها ...

[~~زهرة المدائن~~]

افضل شي بالنسبة الك تنسي الموضوع..لا تراضيها ولا تراضيكي,,وخلي علاقتك فيها رسمية جدااا

واتركي زوجك وابوة يتصرفوا,, يعني خليكي بعيدة .
اذا اخوها تصالح معها وبدة يعزمها مثلا
قومي بواجبها واحترميها ,هوة واياها بيختلصوا

[نانا_فلسطين]

افضل شي بالنسبة الك تنسي الموضوع..لا تراضيها ولا تراضيكي,,وخلي علاقتك فيها رسمية جدااا

واتركي زوجك وابوة يتصرفوا,, يعني خليكي بعيدة .
اذا اخوها تصالح معها وبدة يعزمها مثلا
قومي بواجبها واحترميها ,هوة واياها بيختلصوا

هي وخواتها اصلا ما بحبوا انه اخوتهم يعزموهم ... بيحكولهم ودولنا جاج عالبيت وخلص .. والله بريحوني ...
وانا بعد اللي صار .. قررت عمري ما اتعامل معها ولا بأي شكل من الاشكال .. خلص ما بتلزمني .. بعد ماسمعتها عم تحكي عني .. بطلت اتحمل .. الله لا يوفقها بس

[DAHUBA14]

اختي نانا روقي و استهدي بالله
ما تدعي عليها بس قولي ربي يهديها و يسعدها و يبعدها عني
واذا كنتي كتير مزعوجه قولي حسبيا الله و نعم الوكيل ( وافوض امري الى الله )
وقولي اللهم كل من كادلي بسوء رد كيده في نحره .

زوجك اهم شيئ انه ما يزعل ابوه و يكسب رضاه واخته يعاملها بالحسنى
وانتي خليك في حالك و هى في حالها ، انسيها تماما و ما تنكدي على حالك
ركزي في هل ايام الفضيله على العباده و الدعاء و انسيها تماما
تجاهلي وجودها وما تنسي المثل إلي بيقول ( الباب إلي بيجيلك منه الريح سده و ستريح )

[مجد الاقصى]

الله يكون بعونك يا نانا بس طنيها هو الواحد لما يزعل من حدا بصير يحكي شروي غروي
الله يهديها ويصلحها

[@ام الخير@]

بتعرفي اختي نانا

انتي اللي تاعبة حالك وموجعة راسك


اخته رحم لاله ومزعجة وبتسيي بكم مشاكل

بكل بساطة

اعملي ديليت عليها

بسرعة البرق للمحذوفات

والاهم لا تقبلي اي حدا يحكيلك عنها شي

او يحكيلك اي كلام حدا قاله عنك او عنكم


لانه وجع راس وما في منه فايدة

انتي ابسطس زوجك وبري ابوه ولا تمنعيه من صلة رحمه

وكان الله بالسر عليم

زياراتك خليها باضيق اضيق الحدود لما ما يكون مفر تعتذري زي عرس وهيك شي

اما العيد والزيارات العائلية فخلي زوجك يروحها لحاله مع الاولاد ولا تنسي اولادك ما يسمعوا منك اي ذم لعماتهم بل كل خير


ما سمعتي ب " طنش تعش تنتعش"

الله ما حلاه لما يكون المشكل مع الاهل الدنيا بتروووق لحالها والنفوس بتمل المحاولة للنكد

وبتزهق من عدم ردة الفعل وبتلاقيها صارت طيبة فجأة او على الاقل غير فتانة


رمضانك كريم

[نانا_فلسطين]

بتعرفي اختي نانا

انتي اللي تاعبة حالك وموجعة راسك


اخته رحم لاله ومزعجة وبتسيي بكم مشاكل

بكل بساطة

اعملي ديليت عليها

بسرعة البرق للمحذوفات

والاهم لا تقبلي اي حدا يحكيلك عنها شي

او يحكيلك اي كلام حدا قاله عنك او عنكم


لانه وجع راس وما في منه فايدة

انتي ابسطس زوجك وبري ابوه ولا تمنعيه من صلة رحمه

وكان الله بالسر عليم

زياراتك خليها باضيق اضيق الحدود لما ما يكون مفر تعتذري زي عرس وهيك شي

اما العيد والزيارات العائلية فخلي زوجك يروحها لحاله مع الاولاد ولا تنسي اولادك ما يسمعوا منك اي ذم لعماتهم بل كل خير


ما سمعتي ب " طنش تعش تنتعش"

الله ما حلاه لما يكون المشكل مع الاهل الدنيا بتروووق لحالها والنفوس بتمل المحاولة للنكد

وبتزهق من عدم ردة الفعل وبتلاقيها صارت طيبة فجأة او على الاقل غير فتانة


رمضانك كريم

بارك الله فيك ووفقك لما فيه الخير
سآخذ بنضيحتك

[-بلسم الجروح-]

نانا قصتك قصتى باسلوب اخر

او بطريقة اخرى


لكن نكد

فى المناسبات


والزيارات والافراح والاتراح


لدرجة احمل هم العيد والمناسبات وافكر فيها كثيرا قبل موعدها


الحل الوحيد الطناش

والعمل مع الله

دوسى على جراحك معهم


وقولى "اللهم انى مغلوب فانتصر" وبس

والحمدلله زوجك معك وخلاص


اثارت شجونى هالمشكلة والله

[نانا_فلسطين]

شكرا لكل اللي تابعوا موضوعي .. راح هم رمضان وهلا جاي العيد .... بس بهاي المرة زوجي مش ناوي يروح عليها .. لانها المرة الماضية حكتله : مابدي منك ولا جاج ولاعيدية ... بدي مصاري ... 2000 شيكل بدي .... يعني بتحكيله بطريقة او بأخرى .. لاتيجي عندي عالعيد لاني رح افشلك ....
اليوم تناقشت مع حماي بالموضوع .. طبعا هو اللي فتحه .... بيحكيلي حماي : الأخت رحم ولو سكرت الباب بوجه اخوها لازم يفوتلها من الشباك ... قلتله : واحترام الأخ واجب على أخته كمان وبنتك طردت زوجي من بيتها مع انه ما قصر فيها ....
هلا انا سؤالي ........ الأخ فعلا لازم يتحمل كل شي من تصرفات أخته ؟؟؟ حتى لو هي عم تعمل مشاكل بينه وبين أهل بيته .؟؟؟؟
وللعلم بس ... زوجي حكى لأبوه : أنا مابحب اروح على بنتك لانها بتوجعلي رااااااااااااااااااااااااااااسي ... لأول مرة بحياتي بحس زوجي زعلان منها لهالدرجة .. وطبعا كلامها عني مستمر ... والحكي عم يوصلني .. من ابوها اكتر شي
شو رأيكم؟؟ ياريت تساعدوني ... بصراحة مش حابة زوجي يقطع اخته بس بنفس الوقت مش متحملة تصرفات اخته .. وانه هي تاخد مصاري منا بالغصب ... وهي ما الها حق فيهم

[رورو رنوش]

اخت نانا حبيبتي هو صلة الرحم واجبه على زوجك حتى لو اخت وجعتلو راسو بقدر زوجك يتصل عليها ويطمن عليها لانها بضل اختو وبامكانو اختصارها وما يروح عليها وبالتلفون كفايه انو يطمن عليها ويشوفها عند دار اهلو ويطمن عليها لانو بتسببلو وجع راس وبتفشلو لما يروح عليها فالافضل تلفون او عند اهلو واتاكدي انو لما يتم يتصل عليها كل فترة بدون ما يروح رح تتراجع عن اللي هي فيه وتنسى وبالنسبه للمصاري لا ما بحقلها فيهم حتى لو كان دهب ممكن يطلعلها شي بسيط من قيمة الدهب لانها تعتبر ورثه بس مش هي اللي بتحدد المبلغ وما الها دخل اطالب بلسان غيرها