النهارده مع سؤال بيتسأل كتير:فيه دولة إسلامية ناجحة؟؟

السودان اتقسمت .. أفغانستان اتدمرت .. الجزائر حصل فيها انقلابات

::::: ^__^::::: ^__^::::: ^__^::::: ^__^::::: ^__^

أول حاجة لازم نحط قواعد لو انت موافق عليها كمل معانا لو مش موافق عليها وشايفها مش منطقية فمعلش نصيحتى متكملش:

-الشريعة اللى ربنا نزلها دى كاملة مفيش فيها أخطاء لأن ربنا اللى خلق البشر أعلم بما يصلحهم
بس أما نطبق الشريعة دى على الواقع يبقى انتقلنا من الشريعة الكاملة إلى محاولة التطبيق البشرى للشريعة
التطبيق ده يتفق أو يختلف مع الشريعة بنسبة ما وعلى قدر اتفاقه معاها يكون العدل والكمال وعلى قدر زيغه عنها يكون الظلم والجور

-خطأ التطبيق لا يعنى خطأ الشريعة فإحنا بنحكم على الشريعة من مبادئها وأحكامها مش من تطبيقها وإلا يبقى أنا ممكن
وأحكم على الليبرالية من تطبيق الغرب لها وأقول الليبرالية هى إن أمك تقلع الحجاب وتلبس بيكينى !! وإن الدعارة تبقى مرخصة ونعمل قانون لزواج الشواذ

-تالت حاجة هو إيه مقياس نجاح الأمم فى وجهة نظرك؟
-إن الدولة تبقى متقدمة وعايشة فى رفاهية

-ماشى كل ده تمام
وبعدين؟
-وبس كده

-يعنى لو الدولة دى متقدمة جداً بس هى بتنشر الظلم فى الأرض وتساعد دول إرهابية على قتل الأبرياء ومفيش عندها مانع تحتل دول تانية وتبيد آلاف وملايين البشر عشان تحقق مصالحها بس تبقى الدولة دى ناجحة؟
هل الدولة الناجحة هى اللى عندها استعداد ترمى القمح فى البحر مقابل إن بقية الدول تفضل فى حاجة ليها؟
هل الدول الناجحة هى اللى بتاخد ملايين السود قهراً من افريقيا يموت منهم فى الطريق الآلاف وتخليهم عبيد يشتغلوا فى مصانع الفحم عشان الدولة تنهض ؟

لو انت شايف مفيش مانع من كده طالما الدولة متقدمة
يبقى ركز معاى فى السطرين دول:
عندما تحدث القرآن عن الأمم السابقة فذكر عاد (إرم ذات العماد) وثمود (الذين جابوا الصخر بالواد) وفرعون (ذى الأوتاد) وكأنه يريد أن ينبهنا إلى حقيقة هامة أن مقياس نجاح الأمم لا يقاس مطلقاً بالتقدم المادى الذى تحققه إلا إذا قامت أولاً بالغاية التى خلقت من أجلها السماوات والأرض وهى تعبيد العباد لرب العباد (كنتم خير أمة أخرجت للناس تأمرون بالمعروف وتنهون عن المنكر)

لو انت اقتنعت بكده
وقلت أنا عاوز
دولة متقدمة توفر حياة كريمة لمواطنيها ولكن تسعى لنشر العدل فى الأرض
يبقى خلاص وصلنا

::::: ^__^::::: ^__^::::: ^__^::::: ^__^

فيه نموذج واحد فى تاريخ العالم اتطبقت فيه الحاجات دى
كان فيه دولة قوية جداً امتت لقرون طويلة برغم لحطات الضعف اللى أصابها كانت كل مرة بتقوم أقوى من الأول

كانت قايمة على العدل
-تانى حاكم فيها قال لشعبه:أنا مش أحسن واحد فيكم لو شوفتونى بعمل حاجة غلط انصحونى وقومونى
-تالت حاكم فيها عاقب المحافظ لأن ابنه استغل سلطة والده وظلم أحد المواطنين اللى هما على دين تانى برضه
-وخامس حاكم فيها وقف قدام القاضى بدون ألقاب والقاضى حكم إنه مدان وعليه رد الحق لمواطن على دين تانى من الأقليات
-كان فيها حاكم اسمه "بايزيد" وقف مرة قدام القاضى فقال القاضى:""
هذا الرجل لا تقبل شهادته , لأنه لا يحضر صلاة الجماعة مع المسلمين فى المسجد ومن لا يصلى فى جماعة دون عذر شرعى ممكن له أن يكذب فى شهادته !! "

كانت قايمة على فصل السطات واحترام التخصص
-كان القاضى من حقه يحاسب الحاكم على أى تهمة صغيرة أو كبيرة مش بس على الخيانة العظمى
-وكان الحاكم بيحاسب الموظفين بتوعه بصورة سنوية مع موسم الحج
-كان اللى بيمسك المناصب فيها بيمسكها على أساس كفاءته
-أمين الأمة فيها اتعزل من قيادة الجيش لما رأى الحاكم أن هناك من أكثر منه خبرة
-حبر الأمة وترجمان القرآن فيها عمره ما مسك منصب سياسى اعتماداً على علمه الغزير فى التفسير

كانت بتدافع عن حق أى "مواطن" فيها
-أول من أرسى دعائمها أجاب إمرأة إلى طلبها وقال قد أجرنا "أصدرنا قراراً بحماية" من أجرت يا أم هانىء
-أرسلت إمرأة ذات يوم إلى حاكمها رسالة تشكو أن فراخها يتجاوزن سور بيتها المتهدم ويهربن فأمر الحاكم محافظه أن يبنى لها بيتها ويقيم جداره وأن يتابع ذلك بنفسه
-كان فيها حاكم جيش الجيوش عشان مواطنة اتظلمت وكانت مقيمة خارج المملكة وأقسم إنه مش هيرجع إلا إذا رجع حقها

كانت بتنشر الخير والعدل فى الأرض
-كانت شعوب الأرض بتذوب فى هوية الدولة دى وتتأثر بثقافتها طواعية ومع الوقت بتتحول لجزء منها
-مرة الحاكم بعد ما اتأكد إن كل البشر فى مملكته شبعوا أمر إن الحبوب تترمى على أعلى الجبال عشان الطير ياكلها
-عمرها ما غدرت بمواثيقها ولا خدت المعاهد على خيانة
-كانت الأوامر فى الحروب إن إحنا بنحارب اللى بيحاربنا بس وإن اللى بيعتزل الحرب ويقفل على نفسه بيته أو مكان عبادته ملناش دعوة بيه

كانت دولة متقدمة جداً
-على مدار قرون طويلة كانت تعتبر مركز الإشعاع الثقافى للعالم كله
-كان الدولة الوحيدة اللى شوارعها تنار ليلاً فى أوربا كلها وكانت الدولة الوحيدة اللى عرفت دورات المياه
-كانت أول دولة فى العالم عملت شهادة تخصص زى مزاولة المهنة للأطباء عشان مفيش حد يعمل دكتور من غير مؤهلات
-الدولة اللى اكتشفت العدوى قبل أوربا ب 8 قرون
-كان حكام الدول التانية بيبعتوا أولادهم عشان يتعلموا فى الدولة دى ويفخروا إنهم رجعوا وعارفين اللغة بتاع البلاد دى لأن هى دى كانت لغة كل الأبحاث العلمية

اللى فاتت دى كانت الدولة الإسلامية
وللحديث بقية.........